Read O Debleskro Drom - I Bibla an o Romano Rakepen 2021 5. Mose 17 Bible Online

5. Mose 17 - O Debleskro Drom - I Bibla an o Romano Rakepen 2021 bible

5. Mose 17

¹Tu maress tiro baro Debleske kek grumni, kek bakro oder busni, hoi nasselo oder djungelo hi. Kowa wals i tchilatcho koowa glan tiro baro Debleste.

²Te shunenn tumer i murshestar, i djuwjatar an jek foro tumendar, hoi tumaro baro Dewel tumen dell, un kowa oder koja krell sau koowa, hoi an i jaka tumaro baro Deblestar djungelo hi, un phagell koi sowel, hoi tumer leske dan,

³un djal koi un mangell wawar deblen an, un witsrell pes tele glan o kham, o tchon un i bolepangre momlia, un krell jaake sawo koowa, kolestar me penom, te krenn kowa gar,

⁴un kowa well tumenge penlo, palle rodenn mishto un putchenn palla un dikenn, te hi kowa tchatcho. Te hatsenn tumer win, te hi tchatchepah tchatcho, te was sawo djungelo koowa an Israel kerdo,

⁵palle lenn ko murshes oder koi djuwjat, un anenn len win glan tumaro foro, un witsrenn barra ap lende bis te hi le mulo.

⁶Ap o rakepen dui, triin menshendar, kai kowa dikan, wenn le mulo dino. Ap o rakepen jekestar kokres, nai well kek mensho mulo dino.

⁷Kolla, kai dikan ko djungelo koowa, wenn i glanstune, te witsrenn le barra ap lende. Un pal lende wenn kol wawar, kai glan o foro wan, un witsrenn len mulo. Jaake lenn tumer o tchilatchepen mashkral tumende krik.

⁸Te well tchomone glan i tchatchepangre anlo, hoi hi jaake phares lenge, te djinenn le gar, hoi te krenn, — sawo koowa, te das jek i wawares mulo, oder dukas les, oder tchingepen pral kowa, hoi o jekeske oder o wawareske hi, palle krenn tumen ap o drom un djan ap koi platsa, hoi tumaro baro Dewel peske win rodell.

⁹Kote djan pash i rashajende dran o kheer Levi un pash o tchatchepaskro mursheste, kai an kol diwessa koi hi. Un len putchenn! Un jon penenn tumenge, hoi hunte krenn.

¹⁰Un kowa, hoi le tumenge penenn, hunte krenn tumer. Denn jak, te krenn halauter jaake, har jon tumenge sikran.

¹¹Ap lengre laba hunte rikrenn tumen, un kolendar gar tele djan, gar tchatches un witar gar serwes.

¹²Te hi jek koi, kai hi jaake pre-phurdo, te shunell lo gar ap o rashajeste, kai krell i budi o baro Debleske, oder ap o tchatchepaskro mursheste, palle hunte well ko mursh maredo. Tumer hunte lenn o tchilatchepen dran Israel win.

¹³Palle shunell hakeno kowa, un darell. Un kek phurdell pes buder pre, te krell sawo koowa.

¹⁴Te wenn tumer an ko them, hoi dell tumen tumaro baro Dewel, un tumer lenn les dren, un djiwenn koi dren, un penenn palle: Mer kamah i rai pral mende, jaake har pash kol menshende an i wawar themma trul mende ninna hi,

¹⁵palle well kowa o rai, koles tumer pral tumende tchiwenn, koles tumaro baro Dewel win rodell. Mashkral tumare phralende lenn jekes un tchiwenn les pral tumende, te well job tumaro rai. Lenn kekes dran o wi-them, kai gar tumare phralendar hi.

¹⁶Tumaro rajes hunte well gar bud graja un hunte bitchrell gar i Israelitarjen pale an o them Egiptia, te ginenn le leske graja. O baro Dewel penas tumenge, te djan tumer kau drom gar buder pale.

¹⁷Witar gar hunte lell peske tumaro baro rai bud djuwjen, te well leskro dji gar tele anlo o tchatcho dromestar. Ninna lell lo peske gar bud rup un sonakai khetne.

¹⁸Ap ko tsiro, kai hi lo ap peskri rajeskri beshepaskri beshdo, hunte mukell lo peske kau liil tele te tchinell, kau liil, hoi pash i rashajende dran o kheer Levi tchiddo hi.

¹⁹Un kau liil well palle hako tsireske pash leste. Un job drawerell hako diwes an leste jaake rah, har djiwell lo. Jaake te haiwell lo, har te djiwell lo peskro baro Debleha, un dell lo jak ap hako lab an kau liil, un rikrell pes ap kal tchatchepaskre laba, un krell pal lende.

²⁰Job hunte krell pes gar bares pral peskre phralende un hunte djal gar tele o baro Debleskro dromestar, gar ap i tchatchi rig un gar ap i serwi rig kolestar, hoi tchinlo hi. Palle atchell lo i rah tsiro baro rai an Israel, job un leskre mursh tchawe pal leste.