Read O Debleskro Drom - I Bibla an o Romano Rakepen 2021 5. Mose 21 Bible Online

5. Mose 21 - O Debleskro Drom - I Bibla an o Romano Rakepen 2021 bible

5. Mose 21

¹Te well i mulo mensho win glan o foro tchiddo hatslo an o them, hoi tumaro baro Dewel tumen dell, te lenn tumer les dren, un kek djinell, koon les mulo das,

²palle djan i phureder un i tchatchepangre mursha win pash koi platsa, kai lo tchiddo hi, un dikenn palla, har dur hi bis pash kol forja, hoi kote tchiddo hi.

³Un i phureder dran ko foro, hoi o glanstuno pash ko muleste tardo hi, kolla lenn i terni grumni, hoi budras gomme gar ap i hachetikri phub,

⁴un anenn lat tele an i telstuno them, kai i pani nashell, un hoi kek hachetikri phub hi, un kote phagenn le koi terni grumjake i meen.

⁵Palle stakrenn i rashaja dran o kheer Levi glan. Kolen rodas tumaro baro Dewel win, te krenn le leskri budi, un te rakrenn le leskri bacht win pral i menshende. Un an i tchingepen un pal i marepen rakrenn le o tchatchepen win.

⁶Un kol tsele phureder dran ko foro, hoi o glanstuno tardo hi pash ko muleste, kolla thowenn pengre wasta panjeha tele pral koi muli terni grumni.

⁷Un jon hunte penenn: “Mer dran kau foro, mer dam gar ko menshes mulo, un mare jaka dikan gar, koon kowa kras.

⁸Baro Dewel, mangah tut, le kai doosh mendar, tire menshendar Israel, kolen tu dran o pandepen win lal. Ma dik ap mende, har te wams mer kolla, kai maram i menshes, ap koleste kek doosh tchiddo hi.” Palle lell o baro Dewel koi doosh lendar krik.

⁹Jaake krenn tumer, hoi mishto hi glan o baro Debleskre jaka, un tchiwenn ko tchilatchepen krik mashkral tumende. Un job dikell gar ap tumende, har te wans tumer, kai dan koles mulo.

¹⁰Te djan tumer an o kurepen, un tumaro baro Dewel dell kolen, kai kurenn pen tumentsa an tumaro wast, jaake te anenn tumer lendar pandlen krik,

¹¹un jek tumendar dikell i shukar djuwel mank kol pandlende, un kamell lat un kamell te romedinerell lo lat,

¹²palle nai anell lo lat an peskro kheer. Kote hunte tchinell li peskre shereskre bal un peskre naja.

¹³Un joi riwell peskre ripja win, hoi ap late his, har li pandli was. Un joi atchell an leskro kheer un rowell i tselo tchon pral peskro dad un peskri dai. Pal ko tsiro nai djal ko mursh pash late, te romedinerell lo lat.

¹⁴Te well i tsiro, kai kamell lo lat buder gar, hunte mukell lo lat te djal, kai li kamell. Jek koowa hunte krell job gar: Job nai bikrell lat gar lowenge, un nai rikrell lat gar, te well li leskri budepaskretsa! Joi his leskri romni.

¹⁵Te hi i murshes dui romja, un job kamell koi jek budeder har koi wawar, un hakeni las lestar jek mursh tchawo, un o phureder mursh tchawo hi kolatar, kolat job gar kamell,

¹⁶ap ko diwes, kai kamell ko mursh peskro brawlepen peskre tchawende te dell, nai dell lo gar koleste budeder, kai hi kolatar, hoi kamas lo, har te wals job o phureder.

¹⁷Na-a, job hunte dell ko wawares dui kope jaake bud, job hi o phureder, ninna te his lo koi romjatar, kolat kamell lo gar. Job was glanstunes boldo un leske hi o tchatchepen, te lell lo, hoi o phureder lell.

¹⁸Te hi i romes i mursh tchawo, kai hi bipandlo, un krell halauter pal peskro shero un shunell gar ap peskro dadeste un peskri date, ninna te tchingrenn le ap leste un denn les dawa,

¹⁹palle hunte anenn o dad un i dai les pash i phurende an ko foro ap i platsa, kai wenn le khetne.

²⁰Un penenn ap lende: “Kawa hi maro mursh tchawo. Job hi bipandlo, un krell halauter pal peskro shero, un shunell gar ap mende. Job hi i pipaskro un i chapaskro.”

²¹Un i tsele mursha dran ko foro hunte witsrenn barra ap leste, bis te hi lo mulo. Jaake witsrenn tumer o tchilatchepen dran tumende win. Un i tsele Israelitarja hunte shunenn kolestar un darenn.

²²Te kras jek i tchilatcho koowa, koleske job mulo dino hunte well, un job was maredo un ap i kasht pre pandlo,

²³palle atchell ko mulo gar pral i rat ap ko kashteste. Na-a, job hunte well paskedo ap ko emligo diwes, te well ko them gar pale-tchiddo, hoi tumaro baro Dewel tumen dell. Pash leste hi kowa praassedo, kai hi pre-pandlo ap i kasht.