Read O Debleskro Drom - I Bibla an o Romano Rakepen 2021 5. Mose 24 Bible Online

5. Mose 24 - O Debleskro Drom - I Bibla an o Romano Rakepen 2021 bible

5. Mose 24

¹Te lell i mursh peske i romjat, un palle hatsell lo tchomone ap late, hoi kamell lo gar, un tchinell lake i liil win, an koleste tardo hi, te mukas lo lat, un dell ko liil an lakro wast, un tradell lat dran peskro kheer win,

²un joi djal dran leskro kheer un well i romni i wawar murshestar,

³un ko wawar mursh kamell lat buder gar, un tchinell lake ninna i liil, an koleste tardo hi, te mukas lo lat, un dell les ninna an lakro wast, un tradell lat dran peskro kheer, palle nai lell lat gar lakro ersto rom i duito kopo. Kowa nai krell lo witar gar, te meras lakro duito rom. Lakro ersto romeske was li pale-tchiddo. Te romedinerals lo lat i duito kopo, wals kowa djungeles o baro Debleske. Tumer hunte krenn gar ko them pale-tchiddo, kowa tumaro baro Dewel tumen dell, te well lo tumenge.

⁵I mursh, kai i tikno tsiro romedino hi, hunte djal gar an o kurepen, witar gar hunte krell lo i budi o foreske. Jek bersh nai atchell lo khere un pash peskri romjate, te wenn le bachteles.

⁶Te patseh tu jekes tchomone un kameh lestar i kutch koowa te lell, hoi deh leske pale ap ko tsiro, kai lo kowa pale dell, hoi lo tutar patsas, palle less tu gar ko bar, koleha job jarro krell. Kau barreha lals tu kowa, hoi les djipaske hunte well.

⁷Te well i mursh tapedo, kai i wawar Israelitares tchoras un leha krell, har te wals lo i ginlo budepaskro, oder job bikras les, palle hunte well ko tchorepaskro mulo dino. Tumer hunte tchiwenn o tchilatchepen mashkral tumende win.

⁸Te lell jek tumendar i djungelo nasslepen ap peskro mass, hoi les pale-tchiddo krell, palle denn jak, te krenn halauter jaake, har kol rashaja dran o kheer Levi tumenge penenn. Me penom lenge, hoi te krenn. Un ap kowa hunte rikrenn tumen.

⁹Ma bistrenn, hoi tumaro baro Dewel ap i Mirjam kras ap o drom, har tumer dran o them Egiptia win djan.

¹⁰Te patseh tu jekes tchomone, palle djas tu gar an leskro kheer, te rodess tuke win, hoi kameh te rikrell, bis te job pale plaissras, hoi lo tutar patsas.

¹¹Win glan leskro wudar atchess tu. Un ko mursh, koles tu tchomone patsal, djal dren un anell tuke tchomone win, hoi job tuke koleske dell, bis te job kowa pale pale das, hoi tu leske patsal.

¹²Te hi lo i tchorwelo mursh, pale tchiweh tu tut gar tele koleha, hoi lo tut das.

¹³Te djal o kham tele, dess tu les kowa pale, te nai tchiwell lo pes tele an peskri plaashka, un job rakrell bacht pral tute win. Un jaake hal tu an o tchatchepen tardo glan tiro baro Debleste.

¹⁴Te budrell tuke i tchorwelo Israelitari, ninna i wi-themari, kai djiwell an tiro foro un tiro them, hunte rikress gar leskro plaissepen pale, hoi jek diweske hi.

¹⁵Ap ko emligo diwes dess tu les peskre lowe i budjake, hoi lo tuke budras, glan te djas o kham tele. Job hi tchorwelo, un les hunte well kol lowe djipaske. De len leste, te dell lo gar gole ap o baro Debleste pral tute, un jaake doosh ap tute well.

¹⁶I dada wenn gar maredo koleske, hoi lengre tchawe kran. Un i tchawe wenn gar maredo koleske hoi lengre dada kran. Hakeno, kai kras sawo tchilatcho koowa, koleske job merell hunte, kowa well peskri doshake maredo.

¹⁷Te hal tu i tchatchepaskro, hunte dess tu ninna i wi-themares peskro tchatchepen, ninna i tchawen kolengro dad meras. Un kol djuwjen, kolengro rom meras. Ma le o ripen i romjatar, kolakro rom meras, te rikress les, bis te joi peskri sijaan plaissras.

¹⁸Ma bistrenn te hans pandle budepangre an o them Egiptia, un te las tumen tumaro baro Dewel dran o pandepen win. Doleske penau me tumenge, te dikenn ap i tchorwelende.

¹⁹Te bistral i pandepen newo djob ap tiro hachetikri phub an ko tsiro, kai aneh tiro djob dren, palle djas tu gar pale, te aness les. Muk les kolenge, kai dran i wawar them pash tumende djiwenn, ninna kol tchawenge, kolengro dad meras, un kol djuwjenge, kolengro rom meras. Koleske dell tut tiro baro Dewel bacht an halauter, hoi tire wasta an-taprenn.

²⁰Te lal tu i drake tele tiro djeteskre rukendar, palle djas tu gar pale pash kol ruka, un rodess len tele pal wawar drake. Muk len kolenge, kai dran i wawar them pash tumende djiwenn, ninna kol tchawenge, kolengro dad meras, un kol djuwjenge, kolengro rom meras.

²¹Te lal tu i drake dren tiri moljakre rukendar, palle djas tu gar pale pash kol ruka, un rodess len tele pal wawar drake. Muk len kolenge, kai dran i wawar them pash tumende djiwenn, ninna kol tchawenge, kolengro dad meras, un kol djuwjenge, kolengro rom meras.

²²Ma bistrenn, te hans pandle budepangre an o them Egiptia. Doleske penau me tumenge, te dikenn ap i tchorwelende.