Read O Debleskro Drom - I Bibla an o Romano Rakepen 2021 5. Mose 27 Bible Online

5. Mose 27 - O Debleskro Drom - I Bibla an o Romano Rakepen 2021 bible

5. Mose 27

¹Un o Mose khetne i phureder murshentsa dran Israel penas ap i Israelitarja: Denn jak ap i tsele laba, hoi me tumenge kau diwes penom!

²Ap ko diwes, kai tumer pral o lengsto pani Jordan wergel djan an ko them, hoi tumaro baro Dewel tumen dell, palle lenn bare barra, un tchiwenn len jek ap o wawar, un makenn len parnes.

³Un tchinenn kol tsele laba pre, hoi sikrenn, har te djan miro drom. Un tchiwenn kal barra pre ap i berga Ebal! Kowa krenn ap ko diwes, kai wenn an ko them, kai baro Dewel tumen dell. Job hi o Dewel, koles tumare phure an-mangan. Un jaake har job lenge penas, hi kowa i them, an koleste thud un gwin nashell.

⁵Un kote ap i berga Ebal tchiwenn tumaro baro Debleske i chatchepaskri pre dran barra, hoi gar i sasteha dino wan!

⁶Kol barrentsa, hoi gar dino wan, krenn i chatchepaskri, un marenn un chatchrenn viechen kote tumaro baro Debleske, sawe viechen, kai wenn tseles chatchedo,

⁷un wawar, kolengro rat leske win tchoredo well, un kolengro mass tumer khetne chan, un bachteles han glan leste.

⁸Un ap kol pre-tchidde barra tchinenn i tsele tchatchepaskre laba jaake, te nai dikell jek len mishto.

⁹Un o Mose un i rashaja dran o kheer Levi penan ap i tsele Israelitarjen: “Atchenn Un shunenn, tumer Israelitarja! Kau diwes wan tumer o baro Debleskre menshe. Job hi tumaro Dewel.

¹⁰Doleske shunenn ap leste, un rikrenn tumen ap leskre laba un ap leskro tchatchepen, hoi tumenge kau diwes penau!”

¹¹Ap kau diwes penas o Mose i menshenge, hoi te krenn le. Job penas:

¹²Te djan tumer wergel o panjestar Jordan, hunte djan i menshe dran i khera Simeon, Levi, Juda, Issachar, Josef un Benjamin ap i berga Garizim, te shunenn le hawi Debleskri bacht pral i menshende win rakedo well.

¹³Un i menshe dran i khera Ruben, Gad, Asser, Sebulon, Dan un Naftali kolla djan ap i berga Ebal, te shunenn le, hawo praassepen nai well pral i menshende win rakedo.

¹⁴Un i Levitarja hunte denn ap i tsele murshende an Israel gole, un penenn:

¹⁵“Praassedo well kowa, kai krell pes i sasterni figura, ninna i kashteni figura, te mangell lo lat tchorchanes an! Sawi figura kerdi mensheskre wastentsa hi djungeles glan o baro Debleskre jaka.” Un i tsele menshe hunte penenn: Amen!

¹⁶“Praassedo well kowa, hoi ap peskro dadeste un peskri date tele dikell!” Un i tsele menshe hunte penenn: Amen!

¹⁷“Praassedo well kowa, hoi i barra ap i rig tchiwell, hoi sikrenn har baro o wawareskro kotar them hi.” Un i tsele menshe hunte penenn: Amen!

¹⁸“Praassedo well kowa, kai anell i koreles ap i chocheno drom.” Un i tsele menshe hunte penenn: Amen!

¹⁹“Praassedo well kowa, kai dell kek tchatchepen kolenge, kai wenn dran i wi-them, kol tchawenge, kolen kek dad buder hi, un kol romjenge, kolengro rom meras.” Un i tsele menshe hunte penenn: Amen!

²⁰“Praassedo well kowa, hoi i romjah peskro dadestar sowell, un jaake ladj ap peskro dadeste anell.” Un i tsele menshe hunte penenn: Amen!

²¹“Praassedo well kowa, kai i viecheha sowell!” Un i tsele menshe hunte penenn: Amen!

²²“Praassedo well kowa, kai peskri phenjah sowell, pash i tchate peskro dadestar oder peskri datar!” Un i tsele menshe hunte penenn: Amen!

²³“Praassedo well kowa, kai i romjah peskri romjakro dadestar sowell.” Un i tsele menshe hunte penenn: Amen!

²⁴“Praassedo well kowa, kai i wawares tchorchanes mulo dell!” Un i tsele menshe hunte penenn: Amen!

²⁵“Praassedo well kowa, kai i wawarestar lowe lell, te dell lo koleske i wawares mulo, ap koleste kek doosh hi.” Un i tsele menshe hunte penenn: Amen!

²⁶“Praassedo well kowa, kai rikrell gar kal tsele tchatchepaskre laba.” Un i tsele menshe hunte penenn: Amen!