Read O Debleskro Drom - I Bibla an o Romano Rakepen 2021 5. Mose 6 Bible Online

5. Mose 6 - O Debleskro Drom - I Bibla an o Romano Rakepen 2021 bible

5. Mose 6

¹Un kawa hi o lab, lauter, hoi tumaro baro Dewel tumendar kamella, un leskre tchatchepaskre laba, hoi lo mande das, te penap len tumenge, te nai djiwenn pal lende an o them, an kowa tumer kanna djan, te lenn les tumenge dren,

²jaake te rikrenn tumaro baro Debles glan i jaka tumaro tselo djipen, un denn jak ap halauter, hoi lo tumendar kamella, ap leskre tsele laba, hoi me tumenge penau, te rikrenn tumen ap lende, tumer un tumare tchawe un tchawengre tchawe. Jaake djiwenn tumer i rah tsiro an tumaro them.

³Jaake shun kanna, Israel, un de jak te kress kowa halauter, te djal tuke mishto. Un tumer wenn i bari natsjona an ko them, kai hi bud thud un gwin, jaake har o baro Dewel, o Dewel tumare phurendar, kowa tumenge penas.

⁴Shun Israel! O baro Dewel hi maro Dewel, job kokres un kek wawar!

⁵Tu kamess les tiro tselo djijestar un tiro tselo djipah un tiri tseli sorjah.

⁶Un kol laba, hoi me tuke kau diwes penau, less an tiro dji,

⁷un peness len ninna tire tchawenge, te bistrenn le len gar. Rake lendar, te hal khere beshdo, un te djah ap o drom, un te tchiweh tut tele un te steh pale pre.

⁸Pande kol laba ap i pandepen trul tiro wast un trul tiro shero pral i jaka, te bistress len gar.

⁹Un tu tchiness len ap i pesse kashta tchatches un serwes pash tiro khereskro wudar un ap i wudar pral.

¹⁰O baro Dewel, kai tiro Dewel hi, anell tut an ko them, kai job pes pash o Abraham, o Isaak un o Jakob sowel das, te dell lo les tute. Kote hi bare un shukar forja, hoi tu gar kral,

¹¹ninna khera pherdo latcho koowa, hoi tu gar khetne lal, un wi-dine brunne, hoi tu gar dran o bar win dal, ninna drakengre ruka un djeteskre ruka, hoi tu gar an i phub tchiwal. Un palle, te chah kolestar lauter un weh tchalo,

¹²palle de jak, te bistress gar o baro Debles, kai anas tut win dran o pandepen dran o them Egiptia.

¹³Tu mangess o baro Debles an, un rikress les glan tire jaka pash halauter, hoi kreh. Te deh tut sowel, dess tiri sowel pash leskro lab.

¹⁴Ma dja wawar deblenge palla, kolen i menshe dran i themma trul tumende, an-mangenn.

¹⁵Tiro baro Dewel hi mank tumende un kamell te kamess les kokres. Te rikreh gar pash leste, well leskri choli pral tute, un job lell tut krik i phubjatar.

¹⁶Ma krenn jaake, har te wals o baro Dewel gar pash tumende un dals tumen gar kowa, hoi tumen hunte well djipaske, jaake har kowa kran, har hans an o foro Massa!

¹⁷Rikrenn mishto o baro Debleskre laba un djiwenn jaake, har tumaro Dewel tumenge sikras. Krenn, hoi job tumendar kamell!

¹⁸Te krenn, hoi tchatcho un latcho hi glan leskre jaka, djal tumenge mishto. Un tumer wenn dren an ko latcho them, kolestar o baro Dewel tumare phurenge penas, te tradell lo kolen glan tumende kote win, kai tumen gar kamenn. Un job das ninna peskro wast koi pre.

²⁰Te well ko tsiro, kai putchell tut tiro tchawo: Hoske hunte rikras kol laba, hoi sikrenn, har te djiwas, un hoi maro baro Dewel mendar kamell, un hunte djiwas pal leskre tchatchepaskre laba?

²¹Palle peness tu ap tiro tchaweste: “Mer hams budepangre o baro rajestar an o them Egiptia. Un o baro Dewel anas men win dran Egiptia peskri bari sorjah.

²²Un o baro Dewel kras baro un sorelo koowa, hoi kek wawar nai krell un anas bari bibacht pral i Egiptarja un pral o baro rajeste un koleskro tselo kheer. Kowa dikam mare jakentsa.

²³Un men las lo koi win, te anell lo men an kau them, jaake har job pes sowel das glan mare phurende, te dell lo men kau them.

²⁴Un maro baro Dewel penas, te kras kowa lauter, hoi job mendar kamell, un te rikras les glan mare jaka pash halauter, hoi krah, te djal menge mishto an maro tselo djipen, jaake har kowa kau diwes ninna hi.

²⁵Mer te krah pal kal tsele laba un shunah ap kowa, hoi maro baro Dewel menge penas, palle ham glan leste an o tchatchepen tardo.”