Read O Debleskro Drom - I Bibla an o Romano Rakepen 2021 Johanni 1 Bible Online

Johanni 1 - O Debleskro Drom - I Bibla an o Romano Rakepen 2021 bible

Johanni 1

¹Har o bolepen un i phub gar koi his, his o Lab koi. Kowa, kai hi o Lab, his pash o Debleste. Un job his o Dewel.

²Job his pash o Debleste, har o bolepen un i phub gar koi his.

³Khetne leha kras o Dewel o bolepen un i phub. Tchi hi koi, hoi gar leha kerdo was.

⁴An leste his o djipen. Un ko djipen his i bari momeli i menshenge.

⁵Koi momeli chatchella an i rat. Un i rat nai kras koi momeli gar win.

⁶Koi was i mursh, ko was o Deblestar bitchedo. Leskro lab his Johanni.

⁷Job was, te penell lo hakeneske, koon koi bari momeli hi, te patsenn halauter ap koi momeli.

⁸Job his gar koi momeli. Job was, te penell lo, koon koi momeli hi.

⁹Koi tchatchi momeli was ap i phub, te chatchell li hakeneske.

¹⁰Kowa, kai hi o Lab, his ap i phub, un i phub was leha kerdo. Un i menshe ap i phub prindjran les gar.

¹¹Job was an peskro them, un leskre menshe lan les gar pre.

¹²Halauter kolla, kai lan les pre un ap leste patsan, kolen das job i soor, te wenn jon o Debleskre tchawe.

¹³Kowa wan le gar, har jon boldo wan. O newo djipen was gar dran o menshengro kamlepen. Na-a, o newo djipen lan le kokres o Deblestar.

¹⁴Ko lab was i mensho, un djiwas pash mende. Un mer dikam leskro railepen un leskri soor, kai o Dewel peskro tchawes das. Kowa his pherdo latchepen un tchatchepen.

¹⁵O Johanni rakras lestar, un das gole: “Job hi kowa, kolestar penom: Kowa, kai pal mande wella, hi pral mande. Job his glan mande koi.”

¹⁶Mer halauter lam pale un pale bud latchepen lestar, kai les jaake bud hi.

¹⁷O Mose das men kol laba, kai penenna, har mer djiwas. O Jesus Kristo anas menge o Debleskro latchepen un tchatchepen.

¹⁸Kek mensho dikas o Debles. O Debleskro tchawo kokres sikras men, koon o Dewel hi. Job hi jek o Debleha.

¹⁹Har bitchran i pralstune bibolde dran o foro Jerusalem i rashajen un i Levitarjen pash o Johanneste, te putchenn le lestar: “Koon hal tu?” penas job glan i tsele menshende, kai kote tardo hi: “Tchatchepah, me hom gar o Kristo[1].”

²⁰

²¹“Koon hal tu?” kaman jon te djinell. “Hal tu o Elija?” putchan le lestar. “Na-a,” penas lo, “kowa hom me gar!” “Hal tu o Debleskro rakepaskro, kolestar penlo was, te well job? putchan le lestar.” “Na-a,” penas job.

²²Jon penan ap leste: “Pen menge, koon tu hal, te penas mer kowa kolenge, kai bitchran men. Hoi peneh tu tchatchepah, koon tu hal?”

²³Job penas: “Me hom kowa, kai dell gole an o mulo them: Lenn halauter krik, hoi o Debleske an o drom tchiddo hi. Jaake penas kowa o Debleskro rakepaskro, o Jesaja, glan i rah tsiro.”

²⁴Kolla, kai wan pash o Johanneste, his i Farisarendar bitchedo.

²⁵Jon putchan lestar: “Te hal tu gar o Kristo, witar gar o Elija, un witar gar ko Debleskro rakepaskro, kolestar penlo was, te well job, hoske taufreh tu i menshen?”

²⁶Penas o Johanni lenge: “Me taufrau len an o pani. Mashkral tumende hi jek, koles prindjrenn tumer gar.

²⁷Kowa well pal mande. Me hom gar mishto doha, te krap leskre kircha pre.”

²⁸Har o Johanni kowa rakras, his job an o foro Betani ap i wawar rig o panjestar Jordan, kote, kai taufras lo i menshen.

²⁹Ap o wawar diwes dikas o Johanni, kai o Jesus pash leste wella. Un o Johanni penas: “Dikenn, kawa hi o Debleskro bakro, kai lell i menshengri doosh[2] ap peste.

³⁰Kawa hi ko mursh, kai penom lestar: Pal mande wella i mursh, ko his pral mande. Job his koi, har me gar koi homs.

³¹Me djinom gar, koon kowa hi. Me wom, te taufrap i menshen an Israel an o pani, te sikrap nai len, koon job hi.”

³²Un o Johanni penas: “Tchatchepah, me dikom o Debleskro Ducho har i parno tchirklo, kai was dran o bolepen pral tele, un atchas ap leste.

³³Un me prindjrom les gar. Kowa, kai bitchras man, te taufrap i menshen an o pani, kowa penas ap mande: Tu dikeh, har well o Debleskro Ducho ap i mursheste un atchell ap leste. Kowa hi ko mursh, kai dell i menshen o Debleskro Ducho.

³⁴Me dikom kowa halauter. Doleske nai penau me ninna: Kau mursh hi o Debleskro tchawo.”

³⁵O wawar diwes his o Johanni pale koi tardo. Dui leskre malendar his pash leste.

³⁶Un har job dikas, kai o Jesus koi djal, penas lo: “Dikenn, kawa hi o Debleskro bakro!”

³⁷Har kol dui kowa shunan, djan le o Jesuseske palla.

³⁸Un o Jesus rissras pes trujel, un dikas len. Un job putchas lendar: “Hoi rodenn tumer?” Penan jon: “Sikepaskro, kai chah un soweh tu?”

³⁹“Awenn un dikenn!” penas job. Koi djan kol dui leha, un dikan, kai job chala un sowella. His deshenge. Un jon atchan ko diwes pash leste.

⁴⁰Jek kol dujendar, kai shunan, hoi o Johanni penas, un o Jesuseha djan, his o Andreas. Leskro phraal his o Simon Petro.[3]

⁴¹Kowa hatsas peskro phrales Simon, un penas ap leste: “Mer hatsam ko baro rajes, kolestar o Dewel penas, te well job[4].” Kowa kharella ap grichtikes Kristo.

⁴²Un o Andreas anas peskro phrales pash o Jesuseste. Har o Jesus koles dikas, penas lo: “Tu hal o Simon, ko Johanneskro tchawo. Tu khareh kanna Kefas.” Ko kharella baro bar.

⁴³O wawar diwes kamas o Jesus an o them Galilea te djal. Ap o drom tapras lo o Filipo, un penas ap leste: “Dja mantsa!”

⁴⁴O Filipo his dran o foro Betsaida. Ninna o Andreas un o Petro his dran ko foro.

⁴⁵O Filipo hatsas o Natanael un penas ap leste: “Mer hatsam koles, pral koleste o Mose an peskre lila tchinas. Ninna o Debleskre rakepangre tchinan pral leste. Job kharella Jesus un hi dran o foro Nazaret. Leskro dad hi o Josef.”

⁴⁶Un o Natanael penas ap leste: “Dran Nazaret nai well tchi, hoi mishto hi.” “Am un dik!” penas o Filipo.

⁴⁷Har o Jesus dikas, kai o Natanael was, penas job: “Dikenn, koi well i tchatcho Israelitari. Un kek chochepen hi an leste.”

⁴⁸“Har nai djineh tu, koon me hom?” putchas o Natanael lestar. Penas o Jesus: “Har tu tel o faigetikro ruk hals, dikom me tut, glan ko tsiro, kai o Filipo das tut gole.”

⁴⁹“Sikepaskro,” penas o Natanael, “tu hal o Debleskro tchawo. Tu hal o baro rai pral Israel.”

⁵⁰Penas o Jesus ap leste: “Me penom tuke: Me dikom tut tel ko ruk. Doleske patseh tu. Tu dikeh bareder koowa, har kawa.

⁵¹Kowa hi tchatcho, hoi me tumenge penau: Tumer dikenn har o bolepen pre djala. Un o Debleskre bolepangre[5] djan pral un wenn pale tele ap o Menshengro Tchaweste.” [6]