Read O Debleskro Drom - I Bibla an o Romano Rakepen 2021 Johanni 10 Bible Online

Johanni 10 - O Debleskro Drom - I Bibla an o Romano Rakepen 2021 bible

Johanni 10

¹“Tchatchepah, me penau tumenge: Koon gar an o wudar dren djala, te well lo pash i bakrende, un well wawartchandes dren, kowa hi i tchorepaskro un i dre-phagepaskro.

²O bakrengro djal an o wudar dren, te well lo pash lende.

³Leske krell kowa o wudar pre, kai dell garda glan o wudar. Un leskre bakre shunenn leskro rakepen. Un job dell peskre bakren gole lengre labentsa, un anell len win.

⁴Te hi leskre tsele bakre win, djal job glan lende. Un i bakre djan leske palla. Jon prindjrenn leskro rakepen.

⁵Jekes, kai prindjrenn jon gar, koleske djan jon gar palla. Jon nashenn penge lestar. Jon prindjrenn gar leskro rakepen.”

⁶Kal laba penas o Jesus lenge. Jon haiwan gar, hoi job kamas lenge te penell.

⁷Doleske penas o Jesus pale ap lende: “Tchatchepah, me penau tumenge: Me hom o wudar i bakrenge.

⁸Lauter kolla, kai wan glan mande, hi tchorepangre un dre-phagepangre. Doleske shunan kol bakre gar ap lende.

⁹Me hom ko wudar. Te djal jek an kau wudar dren, kowa djal gar nashedo. Job djal dren un win, un job hatsell shukar senlepen chapaske.

¹⁰Ko tchorepaskro wella, te tchorell lo kol bakren, te marell lo len, un te chal lo len. Me wom, te dap len o djipen, budeder har doha.

¹¹Me hom o latcho bakrengro. O latcho bakrengro mukell peskro djipen i bakrenge.

¹²Jek, kai lell lowe, te dell lo garda ap i bakrende, hi kek bakrengro. Kol bakre hi gar leskre. Te dikell kowa, kai i diwjo djuklo wella, nashell lo peske, un mukell kol bakren kokres. Un o diwjo djuklo perell pral kol bakrende, un tradell len jaake, kai jon buder gar khetne hi.

¹³Ko mursheske hi kowa jek, hoi dran kol bakrende wella.

¹⁴Me hom o latcho bakrengro un prindjrau, koon mire bakre hi. Jon prindjrenn man,

¹⁵jaake har o dad man prindjrella, un me o dades prindjrau. Un me dau miro djipen i bakrenge.

¹⁶Man hi ninna wawar bakre. Kolla hi kate gar khere. Kolen anap halauter kate. Jon shunenn ap miro rakepen, un me anau len khetne i wawarentsa. Un len hi jek bakrengro.

¹⁷Me dau miro djipen, te lap les newes pale. Doleske kamell man miro dad.

¹⁸Kek lell miro djipen mandar. Dran mande well kowa, kai dau miro djipen. Kowa hi an miro wast, te dap miro djipen. Un kowa hi an miro wast, te lap les pale. Jaake krau, hoi miro dad mange penas.”

¹⁹Har o Jesus kowa penas, tchingran pen kol bibolde pale pral kol laba.

²⁰Bud lendar penan: “I beng hi an leste un job hi dinelo. Ma shunenn ap leste!”

²¹Wawar penan: “Te wals i beng an leste, nai rakrals job gar jaake. Nai krell i beng jekeske, kai dikell nai gar, i jaka sasto?”

²²His wend. Un i bibolde an o foro Jerusalem kran i baro chapen, te bistrenn le gar ko diwes, har o Debleskro baro kheer newes kerdo was.

²³O Jesus his an o Debleskro baro kheer, un djas an koi isema[35] trujel, hoi kharella Salomeskri isema.

²⁴Koi wan i pralstune bibolde trul leste un penan: “Har rah kameh tu menge gar te penell, koon tu hal? Tu te hal ko baro rai, kolestar o Dewel penas, te well job, jaake pen menge kowa an o mui!”

²⁵Penas o Jesus ap lende: “Koon me hom, penom tumenge. Tumer patsenn man gar. Halauter, hoi me krau an miro dadeskro lab, kowa hunte sikrell tumende, koon me hom.

²⁶Tumer han gar mire bakre. Doleske patsenn tumer man gar.

²⁷Mire bakre shunenn ap miro rakepen. Un me prindjrau len. Un jon djan mange palla.

²⁸Un me dau len ko djipen, hoi gar pre-herella. Un jon djan gar nashedo. Un kek nai tserdell len dran miro wast win.

²⁹Miro dad, kai das len mande, hi bareder har halauter. Un kek nai tserdell len dran miro dadeskro wast win.

³⁰Me un o dad ham jek.”

³¹Koi hadan kol bibolde pale barra pre, te denn le les kol barrentsa mulo.

³²O Jesus penas lenge: “Me krom bud latcho koowa. Miro dad penas mange, te krap kowa. Hoi hi ko latcho koowa, koleske kamenn man mulo te dell?”

³³Penan kol bibolde ap leste: “Ko latcho koowa, hoi tu kral, koleske kamah mer tut gar mulo te dell. Tu anal ladj ap o Debleste. Tu hal i mensho un kreh, har te wals o Dewel. Doleske kamah tut te marell.”

³⁴Penas o Jesus: “An o Debleskro lab, ap koleste tumen rikrenna, kote hi tchinlo: Me, o Dewel penom: Tumer han debla[36].[37]

³⁵Kolentsa, kai o Dewel rakras, ap kolende penas job debla. Un kowa, hoi an o Debleskro lab tchinlo hi, nai well gar krik lino.

³⁶Man hi o dadeskro wast. Un miro dad bitchras man ap kai phub. Me te penau, kai hom o Debleskro tchawo, har nai penenna tumer ap mande: Tu kreh, har te wess o Dewel?

³⁷Te krau me gar, hoi o dad mange penas, hunte patsenn tumer man gar.

³⁸Te krau me, hoi o dad mange penas, patsenn ap kowa, hoi me krau! Jaake dikenn un prindjrenn tumer, kai o dad an mande hi un me an leste.”

³⁹Koi kaman jon les pale te taprell. Job khatras pes lendar.

⁴⁰Un job djas pale ap i wawar rig o panjestar Jordan un atchas kote, kai o Johanni i menshen taufras.

⁴¹Koi wan bud menshe pash leste un penan: “O Johanni kras kekes sasto. Halauter, hoi job pral kau mursheste penas, hi tchatcho.”

⁴²Un kote patsan bud ap o Jesuseste.