Read O Debleskro Drom - I Bibla an o Romano Rakepen 2021 Johanni 11 Bible Online

Johanni 11 - O Debleskro Drom - I Bibla an o Romano Rakepen 2021 bible

Johanni 11

¹Koi his jek nasselo tchiddo. Leskro lab his Lazaro. Job his dran ko gab Betani, kai ninna i Maria un lakri pheen Marta djiwan.

²I Maria his koi djuwel, kai ko kutch djet ap o Jesuseskre pire tchoras. Un peskre ballentsa khossas joi leskre pire. Kolakro phraal his o Lazaro. Kowa his nasselo.

³Kol dui phenja bitchran menshen pash o Jesuseste, te penenn le leske: “Rai, koles, kai tu kameh, hi nasselo.”

⁴Har o Jesus kowa shunas, penas lo: “Kau nasslepen was gar ap leste, te merell lo. Job was nasselo, te dikenn tumer, hawi bari soor o Debles hi, un te well o Debleskro tchawo sharedo.”

⁵O Jesus kamas i Martat un lakri phenjat un o Lazares o djijestar.

⁶Har job shunas, kai kowa nasselo his, atchas job dui diwessa koi, kai job his.

⁷Pal kowa penas job ap peskre malende: “Awenn, mer djah pale an o them Judea!”

⁸Penan leskre mala ap leste: “Sikepaskro, his gar rah, koi kaman tut i bibolde mulo te dell i barrentsa. Un pash kolende kameh tu pale te djal?”

⁹O Jesus penas: “An o diwes hi deesh-te-dui tsirja[38]. Koon ap o diwes trujel nashella, kowa perell gar. Ap o diwes chatchell o kham.

¹⁰An i rat chatchell o kham gar. Koon an i rat ap o drom hi, kowa perella.”

¹¹Har o Jesus lenge kowa penas, penas lo: “Maro maal Lazaro sowas dren. Me djau koi, te djangrap les pre.”

¹²Kal labentsa penas o Jesus, kai o Lazaro meras. Jon haiwan kowa gar. Jon patsan, kai o Jesus penas, kai job sowella. “Rai,” penan le ap leste, “te sowell lo, well lo pale sasto.”

¹³

¹⁴Kanna penas o Jesus lenge an o mui: “O Lazaro meras.

¹⁵Doleske hom bachtelo tumenge, kai me gar koi homs, te patsenn nai tumer ap mande kanna. Awenn, mer djah kanna pash leste!”

¹⁶Penas o Thomas, koles dan le ninna Didimo gole, ap leskre malende: “Awenn, mer djah ninna leha, te meras leha!”

¹⁷Har o Jesus an o gab Betani was, shunas lo, kai o Lazaro star diwessa paskedo his.

¹⁸O gab Betani his gar dur o forestar Jerusalem, nai well triin kilometarja.

¹⁹Un bud bibolde his pash i Marta un pash i Maria, te rakrenn le lentsa, te hi i duk gar jaake baro pral lengro phraleskro merepen.

²⁰Har i Marta shunas, kai o Jesus wella, djas joi pash leste. I Maria atchas khere.

²¹“Rai,” penas i Marta ap o Jesuseste, “te wals tu kai, merals miro phraal gar.

²²Me djinau ninna, hoi tu o Deblestar mangeh, dell job tut.”

²³Penas o Jesus ap late: “Tiro phraal stella pale i mulendar pre.”

²⁴“Me djinau,” penas li, “kai job i mulendar pre stella ap ko palstuno diwes, kai hake mule pre stenna.”

²⁵Penas o Jesus ap late: “Me hom kowa, kai djangrau[39]len pre dran o merepen un dau len o djipen. Koon ap mande patsella, djiwella, ninna te merell job.

²⁶Koon djiwella un patsell ap mande, kowa merell buder gar. Patseh tu kowa?”

²⁷“Awa, rai,” penas li, “me patsau, kai tu hal o Kristo, o Debleskro tchawo, kai was ap kai phub.”

²⁸Un har joi kowa penas, djas joi pash peskri phenjate un penas tchorchanes ap late: “O sikepaskro hi koi un dell tut gole.”

²⁹Har i Maria kowa shunas, stas joi sik pre un was pash leste.

³⁰O Jesus his gomme glan o gab, kai i Marta les tapras.

³¹Kol bibolde, kai pash i Mariate an o kheer his, te rakrenn le latches lah, dikan, har joi sik pre stas un win nashas. Koi djan le lake palla. Jon patsan, joi djal pash o mulengro kheer, te rowell li koi.

³²Har i Maria koi was, kai o Jesus hi, tchiwras pes li glan leste tele un penas: “Rai, te wals tu koi, merals miro phraal gar.”

³³Har o Jesus dikas, kai joi rowella un kol bibolde ninna, kai lah wan, djas kowa leske phares an o dji. Un leskro dji rowas.

³⁴Un job penas ap lende: “Kai hi job tchiddo?” Jon penan ap leste: “Rai, am un dik!”

³⁵Un o Jesus rowas.

³⁶“Dikenn,” penan i bibolde, “job hunte kamas les o djijestar!”

³⁷Mashkral lende his menshe, kai penan: “Job kras ko murshes, kai dikas nai gar, sasto. Job nai krals ninna, te merals o Lazaro gar.”

³⁸Kowa djas o Jesuseske pale phares an o dji. Un job was pash ko mulengro kheer, kai o Lazaro paskedo his. Glan ko mulengro kheer his i bar tchiddo.

³⁹“Lenn ko bar krik!” penas o Jesus. I Marta, koi pheen kolestar, kai meras, penas: “Rai, job khandella. Star diwessa hi lo mulo.”

⁴⁰Penas o Jesus ap late: “Penom me tuke gar: Te patseh tu, dikeh tu o Debleskri bari soor?”

⁴¹Koi tchiwan le ko bar ap i rig. Un o Jesus dikas pre, un penas: “Tata, me parkrau man, kai shunal man.

⁴²Me djinau, kai tu man hako tsiro shuneh. Me penau kawa kol bud menshenge, kai hi kai tardo, te dikenn le un te patsenn le, kai tu man bitchral.”

⁴³Har job kowa penas, das lo soreles gole: “Lazaro, am win!”

⁴⁴Un kowa, kai meras, was win. Trul leskre herja un wasta his laintikre kotja pandlo. Ninna trul leskro mui his i diklo pandlo. Penas o Jesus ap lende: “Lenn kol kotja lestar lauter tele, un mukenn les te djal!”

⁴⁵Bud kol biboldendar, kai pash i Mariate wan, dikan kowa, hoi o Jesus kote kras, un jon patsan ap leste.

⁴⁶Mashkral lende his menshe, kai djan pash kol Farisarja, un penan lenge, hoi o Jesus kras.

⁴⁷Doleske wan kol bare rashaja un kol Farisarja i pralstune biboldentsa khetne, un penan: “Hoi kras mer? Job krell bud baro un sorelo koowa, hoi kek wawar nai krell.

⁴⁸Te mukah les mer jaake dureder te krell, patsell hakeno ap leste. Un kol Remarja wenna un lenn menge o tselo them un i menshen mendar krik.”

⁴⁹Jek lendar his o Kajafas. Kowa his an ko bersh o baro rashai. Job penas: “Tumer djinenna tchi.

⁵⁰Tumer haiwenna gar, kai feteder hi, te merell jek mursh i menshenge, har te djan i tsele menshe nashedo.”

⁵¹O Kajafas penas kowa gar dran peste. An ko bersh his lo o baro rashai, un job penas glan-wi, kai o Jesus hunte merell i biboldenge,

⁵²un gar i biboldenge kokres. Job hunte merella ninna, te anell lo i tsele Debleskre tchawen khetne.

⁵³Kowa his ko diwes, kai wan le o ersto kopo khetne, te rodenn le i drom, har nai marenn jon les.

⁵⁴Doleske mukas pes o Jesus buder gar te dikell pash i biboldende. Job djas an ko foro, kai kharas Efrajim. Kowa his pash o mulo them. Koi atchas job peskre malentsa.

⁵⁵His i tikno tsiro glan kol bare biboldengre diwessa, kai kharenna Passa. Dran ko tselo them wan i menshe an o foro Jerusalem, te thowenn pen le an o pani glan o Passa, jaake har i biboldengro koowa hi.

⁵⁶Jon halauter kaman o Jesuses te dikell, un rodan les. Har jon an o Debleskro baro kheer khetne his, putchas jek o wawarestar: “Hoi peneh tu? Well job ap o festo Passa?”

⁵⁷Kol bare rashaja un kol Farisarja penan, te djinell jek, kai job hi, hunte penell job les, te taprenn jon les nai.