Read O Debleskro Drom - I Bibla an o Romano Rakepen 2021 Johanni 12 Bible Online

Johanni 12 - O Debleskro Drom - I Bibla an o Romano Rakepen 2021 bible

Johanni 12

¹Shob diwessa glan ko festo Passa was o Jesus pale an o foro Betani, kai o Lazaro djiwella. Koles kras o Jesus i mulendar djido.

²Koi kran le leske i chapen. I Marta anas lenge ko chapen. O Lazaro his jek lendar, kai chas leha.

³Un i Maria las i tushni, kai bud[40] latcho un kutch djet dren hi, un tchoras kowa pral o Jesuseskre pire. Peskre ballentsa khossas joi leskre pire. Un an o tselo kheer his o latcho sungepen o djetestar.

⁴Jek leskre malendar, o Judas Iskariot, kowa, kai phukrella ap leste, penas:

⁵“Hoske was ko djet gar bikedo un mer lams triin-sheel rupene beme? Un kol lowe nai dams i tchorwelende.”

⁶Job penas kowa gar, te krell lo i tchorwelenge latcho koowa. Job his i tchorepaskro. Kol tsele lowe, hoi i menshe lende dan, his pash leste. Un job las peske kol lowendar tchomone krik.

⁷“Muk lat!” penas o Jesus. “Joi kras kowa, te makell li man dren ko diweske, kai wau paskedo.

⁸I tchorwele hi hako tsiro pash tumende. Me hom buder gar rah pash tumende.”

⁹Bud bibolde shunan, kai o Jesus an o gab Betani hi, un wan koi. Jon wan gar, te dikenn le o Jesuses kokres. O Lazares kaman le ninna te dikell, koles, kai o Jesus i mulendar djides kras.

¹⁰Jaake djan bud bibolde pash o Lazareste, un patsan ap o Jesuseste. Doleske rodan kol bare rashaja i drom, har nai marenn jon ninna o Lazares.

¹¹

¹²O wawar diwes shunan kol bud menshe, kai ap ko Passa wan, kai o Jesus an o foro Jerusalem wella.

¹³Koi lan le patria, kai phagan le tele, un djan dran o foro pash leste, un dan gole: “Sharas o Debles! Sharedo well kowa, koles o Dewel bitchras, o baro rai pral Israel!”

¹⁴Un o Jesus hatsas i terni esla, un beshas pes ap late, jaake har tardo hi an o Debleskro lab:

¹⁵“Tumer menshe an o foro Jerusalem, ma darenn! Tumaro baro rai wella un hi beshdo ap i terni esla.”

¹⁶Ap ko tsiro djinan o Jesuseskre mala gar, kai kowa lestar glan i rah tsiro penlo was. Har o Jesus an o Debleskro railepen djas, haiwan le, kai i menshe kran leha jaake, har pral leste tchinlo his.

¹⁷Kol bud menshe, kai pashel his, har o Jesus o Lazares dran o mulengro kheer gole das, un i mulendar djides kras, penan kowa dureder.

¹⁸Doleske nashan ninna jaake bud menshe pash leste. Jon kaman koles te dikell, kai ko baro Debleskro koowa kras.

¹⁹Un i Farisarja rakran mashkral pende: “Tumer dikenna, kai wah jaake gar dureder. I tsele menshe nashenn leske palla.”

²⁰Mashkral i biboldende, kai wan an o foro Jerusalem, te mangenn le o Debles an ap o festo Passa, his ninna menshe dran o grichtikro them.

²¹Kolla wan pash o Filipo, kai dran o gab Betsaida an o them Galilea his. Un penan ap leste: “Rai, mer kamah o Jesuses te dikell.”

²²Koi djas o Filipo pash o Andreas un penas leske kowa. Un o Andreas un o Filipo djan pash o Jesuseste un penan les leske.

²³O Jesus penas ap lende: “Ko tsiro hi kanna kai, kai o Dewel sikrell o Menshengro Tchaweskro railepen.

²⁴Tchatchepah, me penau tumenge: Te well o djob gar an i phub un merell tele, anell lo nai kek newo djob. Te merell lo tele, anell job bud newo djob.

²⁵Koon peskro djipen kamella, kowa nashrell les. Koon peskro djipen ap kai phub gar kamella, kowa lell o djipen, hoi gar pre-herella.

²⁶Koon kamell mange koi te well, kowa hunte djal mantsa. Kote, kai me hom, hi ninna kowa, kai mange koi hi. Kowa, kai mange koi hi, well sharedo miro dadestar.

²⁷Man hi daar an miro dji. Hoi nai penap me? Tata, le mandar kowa krik, hoi ap mande wella? Na-a, me wom ap kai phub, te lap kowa ap mande, hoi kanna wella.

²⁸Tata kre, te sharell hakeno tiro lab!” Koi was i rakepen dran o bolepen un penas: “Me krom, kai well job sharedo. Un kowa krau me pale.”

²⁹Bud menshe, kai koi pashel tardo hi un shunan kowa, penan: “O bolepen das gole.” Wawar penan: “Kowa his i Debleskro bolepaskro, kai rakras leha.”

³⁰Penas o Jesus: “Ko rakepen was tumenge rakedo, gar mange.

³¹Kanna well i phagi pral i tseli phub wi-rakedo. Kanna witsrell o Dewel koles win, kai hi o rai pral kai phub[41].

³²Te hom pral i phub hadedo, tserdau lauteren pash mande.”

³³Kowa penas job, te sikrell lo, har job merella.

³⁴Koi penan i menshe ap leste: “Dran o Debleskro lab shunam, kai ko baro rai, kolestar o Dewel penas, te well job, atchell hako tsiro. Har nai peneh tu, kai o Menshengro Tchawo hunte well ap o trushel dino? Koon hi ko Menshengro Tchawo?”

³⁵Penas o Jesus ap lende: “Koi momeli hi gar buder rah pash tumende. Djan tumaro drom jaake rah, har koi momeli pash tumende hi, te well gar i rati pral tumende! Koon an i rati djala, djinell gar, kai job djala.

³⁶Patsenn ap koi momeli, jaake rah har tumen koi momeli hi! Palle wenn tumer menshe, kolen hi i momeli ap pengro drom un djiwenn gar an o tamlepen[42].” Har o Jesus kowa ap lende penas, djas lo peske, un khatras pes lendar.

³⁷Ninna te kras job bud baro un sorelo koowa glan lende, kai kek mensho nai krella, patsan jon gar ap leste.

³⁸Jaake was kowa tchatcho, hoi o Jesaja, ko Debleskro rakepaskro, glan i rah tsiro penas: Rai, koon patsell men, hoi mer penah? Koon haiwella o Debleskri bari soor?

³⁹O Jesaja penas ninna glan-wi, hoske jon nai gar patsenna:

⁴⁰O Dewel kras, kai dikenn jon nai gar. Un lengro dji kras job pandlo. Kowa kras job, te dikenn jon nai tchi pengre jakentsa, un te djal tchi dren an lengro dji. Te nai mukenn le gar pengro tchilatcho drom un wenn pash o Debleste, te krell lo len sasto.

⁴¹Glan i rah tsiro dikas o Jesaja o Jesuseskro railepen un rakras lestar. Doleske penas job kowa glan-wi.

⁴²Ninna bud kol pralstune biboldendar patsan ap leste. Un jon penan tchi i wawarenge, kai jon ninna ap o Jesuseste patsenna. Jon daran i Farisarendar, te wenn le lendar gar pale-tchiddo kerdo.

⁴³Lenge his budeder moldo, te wenn jon sharedo i menshendar har o Deblestar.

⁴⁴Un o Jesus das soreles gole: “Koon ap mande patsella, kowa patsell gar ap mande kokres. Kowa patsell ninna ap koleste, kai bitchras man.

⁴⁵Un koon man dikella, kowa dikell koles, kai bitchras man.

⁴⁶Me hom koi bari momeli, hoi was ap kai phub. Hakeno, koon ap mande patsella, atchell gar an i rati.

⁴⁷Te shunell jek mire laba un krell gar, hoi me penom, hom gar me, kai rakrau i phagi pral koleste win. Me wom gar ap i phub, te dap i menshen i phagi. Me wom, te lap len dran o tchilatchepen un o merepen win.

⁴⁸Koon lell man gar pre, un kamell gar mire laba te shunell, kowa lell peskri phagi. Kol laba, hoi me rakrom, denn les i phagi ap ko diwes, kai o tchatchepen pral i tsele menshende wi-rakedo wella.

⁴⁹Kowa, hoi me penom, well gar mandar. O dad, kai bitchras man, penas mange, hoi me penap un rakrap.

⁵⁰Me djinau, leskro lab dell tumen o djipen, hoi gar pre-herella. Doleske rakrau me kowa jaake, har miro dad les mange penas.”