Read O Debleskro Drom - I Bibla an o Romano Rakepen 2021 Johanni 14 Bible Online

Johanni 14 - O Debleskro Drom - I Bibla an o Romano Rakepen 2021 bible

Johanni 14

¹“Tumaro dji hunte trashell gar. Patsenn ap o Debleste un patsenn ap mande!

²An miro dadeskro kheer hi bud iseme[45]. Te wals kowa gar jaake, penoms me kowa gar. Me djau koi un dikau, te wenn kol iseme tumenge kerdo.

³Un te krom halauter jaake, te nai tserdenn dren, wau me pale, un lau tumen pash mande, te wenn tumer kote, kai me hom.

⁴Tumer djinenn ko drom, kai me djaua.”

⁵“Rai,” penas o Thomas ap leste, “mer djinah gar, kai tu djah. Har nai djinah ko drom?”

⁶“Me hom o drom, un o tchatchepen un o djipen,” penas o Jesus. “Dell kek wawar drom pash o dadeste, har man.

⁷Te prindjrans man, prindjrans ninna miro dades. Un kanna prindjrenn les tumer un dikan les.”

⁸“Rai,” penas o Filipo ap leste, “sike mende o dades! Kowa hi menge doha.”

⁹“Jaake rah hom pash tumende un tu prindjreh man gar, Filipo?” penas o Jesus. “Koon man dikella, kowa dikell o dades. Har nai peneh tu: Sike mende o dades?

¹⁰Patseh tu gar, kai me an o dadeste hom un o dad an mande hi? Hoi me tumenge penau, kowa well gar mandar. Na-a! O dad, kai an mande hi, krell kowa halauter.

¹¹Patsenn man, kai me an o dadeste hom, un kai o dad an mande hi. Te patsenn tumer kowa gar, palle patsenn ap kowa, hoi me krau!

¹²Tchatchepah, me penau tumenge: Koon ap mande patsella, krell ninna kowa, hoi me krau. Un job krell bareder koowa har me, kanna, kai djau me pash o dadeste.

¹³Un hoi tumer an miro lab mangenna, kowa kamau me te krell tumenge. Kowa, hoi o tchawo krella, sikrell i menshende o Debleskro railepen un leskri soor.

¹⁴Kowa, hoi tumer mangenn an miro lab, kamau me tumenge te krell.”

¹⁵“Te kamenn tumer man o djijestar, krenn tumer, hoi me tumenge penom.

¹⁶Un me mangau o dadestar, te bitchrell job tumenge i rakepaskres, kai well ap tumari rig. Job djal buder gar krik tumendar.

¹⁷Kowa hi o Debleskro Ducho, kai penell i menshenge o tchatchepen pral o Debleste. Kolla, kai patsenn gar ap o Debleste, nai lenn les gar. Jon dikenn les gar un prindjrenn les gar. Tumer prindjrenn les. Job atchell pash tumende, un hi an tumende.

¹⁸Me mukau tumen gar kokres, har te well tumen kek dad. Me wau pash tumende.

¹⁹An i tikno tsiro dikenn man i menshe ap kai phub buder gar. Tumer dikenn man. Me djiwau. Doleske djiwenn tumer ninna.

²⁰Ko diwes wella, kai tumer djinenna, kai me an miro dadeste hom, un tumer an mande han, un me an tumende hom.

²¹Koon mire laba shunella un krell, hoi me penau, kowa kamell man tchatchepah o djijestar. Un koon man kamella, koles kamell miro dad. Un me kamau les ninna o djijestar un me sikrau leste, koon me hom.”

²²“Rai, hoske kameh tu mende te sikrell, koon tu hal, un gar i wawar menshende?” putchas lestar o Judas, kowa, kai his gar o Judas Iskariot.

²³Koi penas o Jesus ap leste: “Te kamell man jek o djijestar, kowa krell, hoi me penau. Koles kamell miro dad. Un mer wah pash leste un atchah pash leste.

²⁴Koon man gar kamella, kowa krell witar gar, hoi me penau. Un hoi me penau, well gar mandar. Kowa well miro dadestar, kai bitchras man.

²⁵Kau koowa penom me tumenge, jaake rah har me pash tumende homs.

²⁶Me te hom buder gar pash tumende, bitchrell o dad tumenge o rakepaskres, kai well ap tumari rig. Kowa hi o Debleskro Ducho. Un job penell tumenge halauter jaake, te nai haiwenn kowa mishto. Un job mukell tumenge halauter an o shero te well, hoi me tumenge penom.

²⁷Ninna te hom me gar pash tumende, atchell koi bacht, hoi me dom tumen, an tumare djia. Me dau tumen miri bacht. Koi bacht nai denn tumen gar i menshe ap kai phub. Ma trashenn! Ma awenn dareno!

²⁸Tumer shunan, hoi me penom: Me djau mange un wau pale pash tumende. Te kamans man o djijestar, wans tumer bachtelo, kai me pash o dadeste djau. Miro dad hi bareder har me.

²⁹Me penau tumenge kawa kanna, te patsenn tumer ap ko tsiro, kai kowa wella, kai kowa tchatcho hi, hoi me tumenge penom.

³⁰Man hi buder gar bud tsiro, te rakrap tumentsa. O beng, kai hi o rai pral kai phub, wella. Les hi kek soor pral mande.

³¹Me krau, hoi miro dad mange penas, te dikenn i menshe ap kai phub, kai kamau les o djijestar. Stenn pre, te djas menge!”