Read O Debleskro Drom - I Bibla an o Romano Rakepen 2021 Johanni 15 Bible Online

Johanni 15 - O Debleskro Drom - I Bibla an o Romano Rakepen 2021 bible

Johanni 15

¹“Me hom ko tchatcho drakengro ruk. Un miro dad hi ko hacho, kai budrell an koi baar[46], kai i drakengre ruka tardo hi.

²Hako senelo kasht ap mande, hoi anell kek drake, tchinell job tele. Un ko kasht, hoi anell drake, krell job djudjo, te anell lo budeder drake.

³Tumer han djudjo. Mire laba, hoi penom tumenge, kran tumen djudjo.

⁴Atchenn an mande un me atchau an tumende! Te atchenn tumer gar an mande, well kek latcho koowa dran tumende, jaake har ko kasht nai anell dran peste kek drake. Job hunte atchell ap o ruk.

⁵Me hom ko drakengro ruk. Un tumer han kol kashta. Koon atchell an mande un me an leste, dran koleste well bud latchepen. Tumer te han gar mantsa khetne, nai krenn tumer tchi.

⁶Koon atchell gar an mande, kowa well win witsedo, har kol kashta, kai tele tchinlo hi. Jon wenn khetne rodedo un an i jag tchiddo, te chatchrenn le.

⁷Te atchenn tumer an mande un krenn kowa, hoi me penom, palle nai mangenna mandar, hoi kamenna. Un kowa lenn tumer.

⁸Te well bud latchepen dran tumende, well miro dad sharedo. Un tumer wenn mire mala.

⁹Har miro dad man o djijestar kamella, jaake kamau me tumen ninna o djijestar. Atchenn an miro kamlepen!

¹⁰Te krenn tumer kowa, hoi me tumenge penom, atchenn tumer an miro kamlepen jaake, har me kowa krau, hoi miro dad mange penas. Un me atchau an leskro kamlepen.

¹¹Kowa penom me tumenge, te well miri bacht an tumende jaake baro, har djal gar bareder.

¹²Kowa kamau tumendar, te kamell jek o wawares o djijestar jaake har me tumen kamau o djijestar.

¹³Kekes hi bareder kamlepen har kowa, kai merell peskre malenge.

¹⁴Te krenn tumer, hoi me tumenge penom, han mire mala.

¹⁵Tumer han mange buder gar budepangre. I budepaskro djinell gar, hoi leskro rai krella. Tumenge penom halauter, hoi shunom miro dadestar. Doleske han tumer kanna mire mala.

¹⁶Tumer rodan man gar win. Me rodom tumen win, te djiwenn jaake, te well dran tumaro djipen latcho koowa, hoi atchella. Un o dad dell tumen halauter, hoi mangenn lestar an miro lab.”

¹⁷“Krenn, hoi me tumenge penau: Kamau, te kamell jek o wawares o djijestar!

¹⁸Te kamenn tumen i menshe ap kai phub gar, ma bistrenn, kai jon kaman man witar gar.

¹⁹Te hans tumer menshe kai phubjatar, palle kamans le tumen. Jon kamenn kolen, kai hi jaake har jon. Tumer han gar kolendar. Me rodom tumen dran lende win. Doleske kamenn le tumen gar.

²⁰Rikrenn an tumaro shero, hoi me tumenge penom: I budepaskro hi gar bareder har leskro rai. Lan man jon palla, lenn jon tumen ninna palla. Te shunan jon ap kowa, hoi me lenge penom, shunenn jon ninna, hoi tumer lenge penenna.

²¹Tumer han miro. Doleske hi jon tchilatcho ap tumende. Jon prindjrenn koles gar, kai bitchras man.

²²Te woms me gar pash lende, un penoms lenge gar halauter, lans le kek doosh[47] ap pende. Kanna nai penenn jon gar: Mer djinam gar, kai kowa, hoi kram, tchilatcho hi.

²³Koon man gar kamella, kowa kamell witar gar miro dades.

²⁴Te kroms me gar glan lengre jaka ko baro koowa, hoi nai kek wawar kras, wals len kek doosh. Kanna dikan jon kowa. Un ninna te dikan le les, hi le tchilatcho ap mande un ap miro dadeste.

²⁵Jaake was kowa tchatcho, hoi an o Debleskro lab tchinlo hi: Jon hi tchilatcho ap mande, ninna te krom kek tchilatchepen ap lende.[48]

²⁶Te hom pash o dadeste, palle bitchrau tumenge o rakepaskres, kai wella ap tumari rig. Kowa hi o Debleskro Ducho. An leste hi o tchatchepen. Job wella o dadestar, un penell o tchatchepen pral mande.

²⁷Ninna tumer, kai hans o tselo tsiro pash mande, penenn i menshenge mandar, hoi tumer dikan un shunan.”