Read O Debleskro Drom - I Bibla an o Romano Rakepen 2021 Johanni 16 Bible Online

Johanni 16 - O Debleskro Drom - I Bibla an o Romano Rakepen 2021 bible

Johanni 16

¹“Kowa halauter penom me ap tumende, te denn tumer gar tumaro patsepen ap mande pre.

²Jon krenn tumen pale-tchiddo. Un ko tsiro wella, kai denn jon tumen mulo un penenn: O Dewel kamas kowa jaake.

³Jon prindjrenn o dades gar un man witar gar. Doleske krenn jon kowa.

⁴Te well ko tsiro, hunte djinenn tumer, kai kowa jaake wella, har me les tumenge penom. Me penom tumenge kowa gar, har homs pash tumende. Kanna penau tumenge kowa.

⁵Kanna djau me pash koleste, kai bitchras man. Un kek tumendar putchell mandar: Kai djah tu?

⁶Kowa, hoi tumenge penom, dukell tumen an o dji.

⁷Patsenn man: Hi mishto tumenge, te djap mange. Te djau me gar, nai well ko rakepaskro gar pash tumende, kai wella ap tumari rig. Me te djau mange, bitchrau les pash tumende.

⁸Job te wella, palle krell job i menshenge i jaka pre pral lengri doosh, pral o Debleskro tchatchepen un pral o Debleskri choli, hoi wella pral kai phub.

⁹Lengri doosh hi, kai patsenn le gar ap mande.

¹⁰O Debleskro tchatchepen dikenn le ap kowa, kai me djau pash o dadeste, un tumer dikenn man buder gar.

¹¹Kai o Debleskri choli pral kai phub wella, dikenn le ap kowa, kai i phagi pral o rajeste pral kai phub wi-rakedo hi.

¹²Me kamoms tumenge jaake bud te penell. Tumer haiwenn nai kowa kanna gar.

¹³Te well o Debleskro Ducho, kai o tchatchepen an leste hi, sikrell lo tumende o tselo tchatchepen. Job rakrell gar dran peste. Hoi job shunella, kowa rakrell job. Un hoi wella, penell job tumenge glan-wi.

¹⁴Job sharell man. Halauter, hoi job penell tumenge, well mandar.

¹⁵Halauter, hoi o dades hi, hi ninna miro. Doleske nai penau me: Lauter, hoi job penell tumenge, well mandar.

¹⁶Pal i tikno tsiro dikenn man buder gar. Un pale pal i tikno tsiro dikenn man tumer pale.”

¹⁷“Hoi penell lo,” putchan leskre mala jek o wawarestar, “te penell lo ap mende: Pal i tikno tsiro dikenn man buder gar; un pale pal i tikno tsiro dikenn man tumer pale; un me djau pash o dadeste?

¹⁸Hoi hi kowa, te penell lo: I tikno tsiro? Mer djinah gar, hoi job rakrella.”

¹⁹O Jesus haiwas lendar, kai kaman le lestar kowa te putchell, un job penas ap lende: “Kamenn tumer te djinell, hoi kowa hi, kai penom: Pal i tikno tsiro dikenn man buder gar; un pale pal i tikno tsiro dikenn man tumer?

²⁰Tchatchepah, me penau tumenge: Well i tsiro, kai tumer rowenna, un denn i wasta pral o shero khetne. Un i menshe, kai gar ap mande patsenna, hi bachtelo. Ninna te rowell tumaro dji ap ko diwes, djinenn: Tumaro ropen well tumendar krik lino, un tumer wenna bachtelo.

²¹I djuwel, kai lell i ternepen, kolat hi duka. Te hi ko ternepen koi, bistrell li kol duka. Jaake bari hi lakri bacht, kai joi las i ternepen.

²²Kanna rowell tumaro dji. Un me penau tumenge kanna: Me wau pale pash tumende. Un tumer wenn bachtelo. Un koi bacht nai lell tumendar kek krik.

²³Ap ko diwes, putchenn tumer mandar tchi. Tchatchepah, me penau tumenge: Te mangenn tumer miro dadestar tchomone an miro lab, kowa dell job tumen.

²⁴Bis kanna mangan tumer tchi an miro lab. Mangenn un job dell tumen, te well tumari bacht jaake bari, bareder djal gar!

²⁵Kowa penom me tumenge gar an o mui. O diwes wella, kai me rikrau buder tchi pale. Palle rakrau tumentsa miro dadestar jaake, kai haiwenna halauter.

²⁶Ap ko diwes mangenn tumer o dades an miro lab. Me penau gar, kai me mangau miro dades tumenge.

²⁷Miro dad kamell tumen ninna jaake har me kamau tumen. Tumer kamenn man o djijestar un patsenna, kai me o Deblestar wom. Doleske kamell tumen miro dad ninna o djijestar.

²⁸Me wom o dadestar, un wom ap kai phub. Un me mukau pale kai phub, un djau pash miro dadeste.”

²⁹Koi penan leskre mala ap leste: “Kanna rakreh tu jaake, kai haiwah kowa. Tu rikreh buder tchi pale.

³⁰Kanna djinah mer, kai tu halauter djineh. Tu djineh glan-wi, hoi i menshe kamenn tutar te putchell. Doleske patsah mer, kai tu o Deblestar weh.”

³¹“Kanna patsenn tumer?” penas o Jesus.

³²“Dikenn, ko tsiro wella un hi koi, kai nashenn tumer halauter mandar. Hakeno djal pale khere. Un man mukenn tumer kokres. Ninna te mukenn man, hom me gar kokres. O dad hi pash mande.

³³Kowa lauter penom tumenge, te well tumen i bari bacht an o dji pral kowa, kai han mire. Kate ap kai phub hi tumen daar. Ma darenn! Me hom sorleder har halauter ap kai phub.”