Read O Debleskro Drom - I Bibla an o Romano Rakepen 2021 Johanni 17 Bible Online

Johanni 17 - O Debleskro Drom - I Bibla an o Romano Rakepen 2021 bible

Johanni 17

¹Pal kol laba dikas o Jesus pre an o bolepen un penas: “Tata, o tsiro hi kai. Sike, hawo railepen un hawi soor tu tiro tchaweste dal, te sikrell job ninna tiro railepen un tiri soor!

²Tu dal les i soor pral i tsele menshende, te dell job lauteren, kai tu les dal, o djipen, hoi gar pre-herella.

³Kowa hi ko djipen, hoi gar pre-herella: Te prindjrenn jon tut, kai tu hal o tchatcho Dewel, un te prindjrenn jon o Jesus Kristes, koles tu bitchral ap kai phub.

⁴Me sikrom kol menshen tiro railepen un tiri soor ap i phub. Un me krom halauter, hoi tu mange penal.

⁵Un kanna, tata, de man ko railepen un koi soor, hoi his man pash tute, har o bolepen un i phub gar koi his!

⁶Tu dal menshen dran kai phub gole un dal len mande. Kolende sikrom, koon tu hal. Jon his tiro un tu dal len mande. Un jon rikran pen ap tiro lab.

⁷Jon djinenna kanna, kai halauter, hoi tu man dal, tchatchepah tutar well.

⁸Hoi tu mange penal, penom me lenge dureder. Un jon lan mire laba pre un haiwan, kai me tchatchepah tutar wom. Un jon patsan, kai tu man bitchral.

⁹Kolenge mangau me. Me mangau gar kol wawar menshenge ap kai phub. Me mangau kolenge, kai tu man dal. Jon hi tire.

¹⁰Halauter, hoi miro hi, hi ninna tiro. Un hoi tiro hi, hi ninna miro. Ap lende well miro railepen un miri soor diklo.

¹¹An i tikno tsiro hom buder gar ap kai phub. Me wau pash tute. Jon hi ap kai phub. Miro dad, tu hal o baro Dewel, rike len an tire wasta, te atchenn jon pash tute, te wenn jon jek, jaake har mer ham!

¹²Jaake rah har me pash lende homs, dom garda ap lende an tiri soor, kai tu man dal. Me rikrom len, te djan jon gar krik tutar. Kek lendar djas nashedo. Jek kokres djas nashedo, jaake te was tchatcho, hoi lestar tchinlo was.

¹³Kanna wau me pash tute. Kowa rakrau lauter jaake rah, har hom me ap kai phub, te well koi bacht an lengre djia jaake bari, bareder djal gar.

¹⁴Me penom lenge tire laba. Jon hi gar kai phubjatar, jaake har me hom witar gar kai phubjatar. Doleske hi i menshe ap kai phub chojemen ap lende.

¹⁵Me mangau tutar gar, te less len tu dran kai phub win. Me mangau tut, te rikress tu o benges lendar pale.

¹⁶Jon hi gar kai phubjatar, jaake har me hom witar gar kai phubjatar.

¹⁷Muk len tiro tchatchepen te dikell, te djiwenn le pengro tselo djipen tuke kokres! Tiro lab hi o tchatchepen.

¹⁸Me bitchrau len pash i menshende, jaake har tu man pash i menshende bitchral.

¹⁹Me dau tut miro tselo djipen. Kowa krau lenge, te wenn jon ninna tire an o tchatchepen.

²⁰Me mangau gar lenge kokres. Me mangau ninna kol menshenge, kai shunenna, hoi jon mandar penenna, un dran kowa ap mande patsenna.

²¹Me mangau tutar, te wenn le halauter jek, jaake har tu, tata, an mande hal, un me an tute hom. Jaake te wenn jon jek an mende, te patsenn i menshe, kai tu man bitchral.

²²Me dom len ko railepen un koi soor, hoi tu man dal, te wenn jon jek, jaake har mer jek ham.

²³Me djiwau an lende. Un tu djiweh an mande. Jaake te wenn jon jek. Un i menshe dikenna, kai tu man bitchral, un kai tu len jaake kameh, har tu man kameh.

²⁴Tata, me kamau, te wenn kolla, kai tu man dal, pash mande, kote, kai me hom, te dikenn le miro railepen un miri soor, hoi tu man dal. Tu kamal man o djijestar, har o bolepen un i phub gar koi his.

²⁵Tata, tu hal an o tchatchepen tardo! I menshe ap kai phub prindjrenn tut gar. Me prindjrau tut. Un kalla haiwan, kai tu man bitchral.

²⁶Me sikrom lende, koon tu hal. Kowa krau me dureder, te well tiro kamlepen, hoi hi tut mange, ninna an lende. Jaake djiwau me an lende.”