Read O Debleskro Drom - I Bibla an o Romano Rakepen 2021 Johanni 18 Bible Online

Johanni 18 - O Debleskro Drom - I Bibla an o Romano Rakepen 2021 bible

Johanni 18

¹Har o Jesus kowa penas, djas job peskre malentsa win. Un jon djan wergel ko pani, hoi kharella Kidron. Koi his i baar[49]. Koi dren djas o Jesus peskre malentsa.

²Kote his lo bud kope peskre malentsa. Doleske prindjras ninna o Judas, ko phukepaskro, koi baar.

³Un o Judas djas kote. Leha wan kol lurde un kliste, kolen i bare rashaja un i Farisarja bitchran. Len his chare un kashta un hidjran momlia un jag.

⁴O Jesus djinas halauter, hoi ap leste wella un djas win pash lende un putchas lendar: “Kones rodenn tumer?”

⁵“O Jesuses dran Nazaret,” penan jon ap leste. “Me hom kowa!” penas o Jesus. O Judas, ko phukepaskro, his pash lende tardo.

⁶Har o Jesus ap lende penas “Me hom kowa,” djan jon i kotar pale un peran ap i phub.

⁷Pale putchas o Jesus lendar: “Kones rodenn tumer?” “O Jesuses dran Nazaret,” penan jon.

⁸“Me penom tumenge, kai me kowa hom,” penas o Jesus. “Te hom me kowa, koles tumer rodenna, palle mukenn kol wawaren te djal.”

⁹Kowa penas o Jesus, te well tchatcho, hoi job glan-wi penas: “Tata, me nashrom kekes kolendar, kai tu man dal.”

¹⁰O Simon Petro, koles his i charo pash peste. Job las peskro charo, un das jek klisteske o tchatcho kand tele. Kowa kharas Malcho un his i klisto, kai budras o baro rashajeske.

¹¹Koi penas o Jesus ap o Petreste: “Tchip tiro charo pale! Djap me gar ko drom, kai miro dad kamell, te djap les, ninna te wenn kote bare duka ap mande?”

¹²Un i lurde pengro pralstuneha un i biboldengre kliste tapran o Jesuses un pandan les.

¹³Un anan les pash o Hannas. Kowa his o dad o Kajafeskri romjatar. O Kajafas his an kau bersh baro rashai.

¹⁴Job his kowa, kai penas i biboldenge: “Wals feteder menge, te merals jek i tsele menshenge.”

¹⁵O Petro un i wawar o Jesuseskre malendar djan o Jesuseske palla, har job an o kheer o baro rashajestar anlo was. O baro rashai prindjras ko wawar males. Doleske djas nai job o Jesuseha an ko kheer.

¹⁶O Petro atchas win glan o wudar tardo. Koi was ko wawar pale, kowa, kai his o baro rashajestar prindjedo, un rakras koi djuwjah, kai das garda glan o wudar, un las o Petres dren.

¹⁷Koi djuwel, kai das glan o wudar garda, putchas o Petrestar: “Hal tu gar jek kol malendar ko murshestar koi?” “Na-a, me gar!” penas job.

¹⁸Koi his budepangre un kliste tardo, kai kran i jag. Lenge his shila un jon tatsran pen. O Petro his ninna pash lende tardo, te tatsrell lo pes.

¹⁹Kanna putchas o baro rashai o Jesuses win pral leskre malende un pral kowa, hoi job i menshenge penas.

²⁰O Jesus penas ap leste: “Me rakrom glan i tsele menshende jaake, kai hakeno kowa nai shunas. Hako tsiro rakrom an i biboldengri kangri un an o Debleskro baro kheer, kai i tsele bibolde khetne wan. Me penom tchi tchorchanes.

²¹Hoske putcheh tu mandar? Putch kolendar, kai shunan man. Jon djinenna, hoi me penom!”

²²Har job kowa penas, das jek kol biboldengro klistendar, kai koi pashel tardo his, o Jesuses an o mui un penas: “Har nai rakreh tu jaake o baro rashajeha?”

²³Koi penas o Jesus ap leste: “Nai peneh tu, kai me tchilatcho koowa rakrom? Te penom me lauter, hoi tchatcho hi, hoske dal tu man?”

²⁴O Hannas anas les pandlo pash ko baro rashajeste Kajafas.

²⁵O Petro his koi tardo un tatsras pes. Koi penan le ap leste: “Hal tu gar jek leskre malendar?” Job das buchoste un penas: “Me hom kowa gar.”

²⁶“Dikom me tut gar an i baar pash leste?” penas jek klisto, kai budrell ko baro rashajeske. Kau klisto his jek koleskre menshendar, koleske o Petro o kand tele das.

²⁷Pale das o Petro buchoste, un penas: “Me homs gar pash leste.” Kanna das o bashno gole.

²⁸Kanna anan le o Jesuses dran o Kajafeskro kheer win, un anan les an o baro kheer o themeskro rajestar, kai i Remari his. His taissarlake. I bibolde djan gar leha an ko baro kheer dren, te wenn le gar pale-tchiddo. Jon kaman te nai chan le ko chapen ap ko baro diwes, kai kharella Passa.

²⁹O themeskro rai, — leskro lab his Pilato — djas pash lende win un putchas lendar: “Hawo tchilatcho koowa kras job?”

³⁰Jon penan ap leste: “Te wals kau mursh gar tchilatcho, anams les gar pash tute.”

³¹“Ake, lenn les un denn les tumer i phagi pal o biboldengro tchatchepen!” penas o Pilato ap lende. “Mer nai marah kekes pal o Remarjengro tchatchepen,” penan kol bibolde.

³²Jaake was kowa tchatcho, hoi o Jesus pral peskro merepen glan-wi penas.

³³O Pilato djas pale an peskro kheer, un mukas o Jesuses dren te anell, un putchas lestar: “Hal tu o baro rai pral i biboldende?”

³⁴“Peneh tu kowa dran tute win? Penan kowa tuke wawar mandar?” putchas o Jesus.

³⁵“Hom me i biboldo?” penas o Pilato. “Tire menshe un i bare rashaja dan tut an mire wasta. Hoi kral tu?”

³⁶Koi penas o Jesus: “Miro them un i menshe, kolengro rai me hom hi gar kai phubjatar. Te wals miro them kai phubjatar, un ninna i menshe, kolengro rai me hom, palle kurans pen mire budepangre i biboldentsa, te perap me gar an kolengre wasta. Me penau tuke: Miro them un mire menshe, kolengro rai me hom, hi gar kai phubjatar.”

³⁷Putchas o Pilato lestar: “Hal tu tchatchepah i baro rai?” Penas o Jesus: “Awa, hi jaake har tu penal. Me hom i baro rai. Me wom boldo ap kai phub, te penap o tchatchepen. Koon an o tchatchepen tardo hi, kowa shunell ap mande.”

³⁸“Hoi hi o tchatchepen?” putchas o Pilato lestar. Un har job kowa penas, djas lo pale win pash i biboldende un penas ap lende: “Me hatsau kek doosh ap leste.

³⁹Shunenn, pash tumende well hako bersh ap kol bare diwessa, kai kharenna Passa, i stildo dran o stilepen muklo. Kamenn tumer, te mukap o baro rajes pral i biboldende te djal?”

⁴⁰Jon dan pale gole: “Gar koles! Mer kamah, te mukess o Barabes dran o stilepen win!” Kowa his i marepaskro.