Read O Debleskro Drom - I Bibla an o Romano Rakepen 2021 Johanni 20 Bible Online

Johanni 20 - O Debleskro Drom - I Bibla an o Romano Rakepen 2021 bible

Johanni 20

¹Sik taissarlake, pal o Debleskro diwes, har gomme rati his, was i Maria Magdalena pash ko mulengro kheer, un dikas, kai ko bar buder gar glan o wudar hi.

²Koi nashas joi pash o Simon Petreste un pash ko wawareste kol deesh-te-dujendar, koles, kai kamas o Jesus o djijestar, un penas ap lende: “Jon lan o rajes dran ko mulengro kheer win. Un mer djinah gar, kai jon les tchiwan.”

³Koi djas o Petro un ko wawar pash ko mulengro kheer.

⁴Kol dui nashan khetne. Ko wawar nashas sikeder har o Petro. Jaake was job glan leste pash o mulengro kheer,

⁵dikas koi dren, un dikas kol laintikre kotja kote tchiddo. Job djas gar dren.

⁶Pal leste was o Simon Petro un djas an ko mulengro kheer dren, un dikas kol laintikre kotja kote tchiddo.

⁷Ko diklo, kai trul o Jesuseskro shero pandlo his, his gar pash kol wawar laintikre kotja tchiddo. Kowa his khetne pandlo, un his kokres tchiddo.

⁸Kanna djas ninna ko wawar o Jesuseskre malendar dren, kai glan leste pash ko mulengro kheer was. Un job dikas un patsas.

⁹Jon haiwan gar, hoi an o Debleskro lab tardo hi, kai job hunte stella i mulendar pre.

¹⁰Pal kowa djan kol dui pale khere.

¹¹I Maria his win glan o mulengro kheer tardo un rowas. Har joi jaake rowas, dikas li an o mulengro kheer dren.

¹²Kote, kai o Jesus tchiddo his, dikas joi dui bolepangren an parne ripja beshdo. Ko jek his kote, kai leskro shero tchiddo his, un ko wawar, kai leskre herja his.

¹³“Hoske roweh tu, romnija?” putchan kol bolepangre i Mariatar. “Jon lan miro rajes krik,” penas li, “un me djinau gar, kai jon les tchiwan.”

¹⁴Un har joi kowa penas, rissras pes li trujel, un dikas o Jesuses. Job his glan late tardo, un joi prindjras les gar.

¹⁵Koi penas o Jesus ap late: “Romnija, hoske roweh tu? Kones rodeh tu?” I Maria patsas: Job hi kowa, kai budrell an i baar. Doleske penas li: “Romeha, te anal tu les krik, pen mange, kai tu les tchiwal, te djap koi, un lap les pale!”

¹⁶“Maria!” penas o Jesus. Koi rissras pes li trujel, un penas ap hebretikes: “Rabuni!” Kowa kharella Sikepaskro.

¹⁷Penas o Jesus ap late: “Ma tape ap mande! Me djom gomme gar pash o dadeste pale. Dja pash mire phralende un pen lenge: Me djau pash miro dadeste un pash tumaro dadeste un pash miro Debleste un pash tumaro Debleste.”

¹⁸Koi djas i Maria Magdalena pash o Jesuseskre malende, un penas lenge: “Me dikom maro rajes!” Un joi penas lenge, hoi job lake penas.

¹⁹Har rati his ap kau diwes, — kowa his i kurko[61] — his o Jesuseskre mala khetne. I darjatar kol biboldendar his lengro wudar klidedo. Ap jek kopo was o Jesus dren, un djas mashkral lende, un penas ap lende: “O Debleskri bacht tumentsa!”

²⁰Har job kowa penas, sikras job lende peskre wasta, un peskri rig. Koi wan o Jesuseskre mala bachtelo, kai dikan le pengro rajes.

²¹Pale penas o Jesus ap lende: “O Debleskri bacht tumentsa! Har miro dad man bitchras, jaake bitchrau me tumen.”

²²Un har job kowa penas, phurdas job ap lende, un penas: “Lenn o Debleskro Ducho!

²³Ap koneste tumer penenna: Tiri doosh hi krik lino, koleske well li krik lino. Un ap koneste tumer penenna: Tiri doosh atchell ap tute, ap koleste atchell li.”

²⁴O Thomas, jek kol deesh-te-dujendar, koles dan le ninna Didimo[62] gole, his gar koi pashel, har o Jesus pash lende was.

²⁵Ap leste penan i wawar kol deesh-te-dujendar: “Mer dikam maro rajes!” Job penas ap lende: “Te dikau me gar leskre wasta, kai saster dren dino was, un te tchiwau me gar miro gushto koi dren un miro wast an leskri rig, patsau me kowa gar.”

²⁶Un pal ochta diwessa his o Jesuseskre mala pale khetne an ko kheer. Un o wudar his klidedo. Kau kopo his o Thomas pash lende. Ap jek kopo his o Jesus mashkral lende tardo, un penas: “O Debleskri bacht tumentsa!”

²⁷Pal kowa penas job ap o Thomas: “Tchip tiro gushto ap mire wasta, un tchip tiro wast an miri rig. Atch gar har jek, kai patsell gar. Pats kanna!”

²⁸Koi penas o Thomas ap leste: “Miro rai un miro Dewel!”

²⁹“Kanna, kai dikal man, patseh tu,” penas o Jesus. “Bachtele hi kolla, kai patsenna, ninna te dikenn le man gar.”

³⁰Bud wawar baro koowa kras o Jesus an o Debleskri soor glan peskre malende, kai gar an kau liil tchinlo hi.

³¹Kawa was tchinlo, te patsenn tumer, kai o Jesus ko baro rai hi, kolestar o Dewel penas, te well job. Job hi o Debleskro tchawo. Un te patsenn ap leste, lenn tumer o tchatcho djipen lestar.