Read O Debleskro Drom - I Bibla an o Romano Rakepen 2021 Johanni 21 Bible Online

Johanni 21 - O Debleskro Drom - I Bibla an o Romano Rakepen 2021 bible

Johanni 21

¹Pal kowa mukas pes o Jesus glan peskre malende pale te dikell, har jon pash o baro pani Tiberias his. Un kowa was jaake:

²O Simon Petro un o Thomas, kowa, kai dan le les Didimo gole, un o Natanael dran o gab Kana an o them Galilea, un kol Zebedeskre tchawe un wawar dui o Jesuseskre malendar his koi khetne.

³Un o Simon Petro penas ap lende: “Me djau te matchrell.” “Mer kamah tuha te djal,” penan kol wawar. Jon djan win un djan an o bero dren. Un koi rati tapran le tchi.

⁴Sik taissarlake his o Jesus pash o pani tardo, un leskre mala prindjran les gar.

⁵Un o Jesus putchas lendar: “Tapran tumer tchi?” “Na-a,” penan le.

⁶Penas o Jesus: “Witsrenn tumare matchengre gone tchatches win pash o bero! Un tumer taprenna i matche.” Koi witsran jon i matchengre gone win, un tapran jaake bud matche, kai tserdan le nai i matchengre gone buder gar dran o pani win.

⁷Koi penas ko jek kol deesh-te-dujendar, koles o Jesus o djijestar kamas, ap o Petreste: “Kowa hi maro rai.” Har o Simon Petro kowa shunas, riwas lo peskro pralstuno ripen an, hoi riwas lo win, un witsras pes an o pani, te well lo sikeder ap o them.

⁸Kol wawar mala wan an ko bero, un tserdan ko matchengro gono pal pende. Jon his gar dur o themestar, nai well sheel metarja.

⁹Har jon dran o bero djan, dikan le i jag. Koi his pekle matche pre. Maro his ninna koi.

¹⁰Un o Jesus penas ap lende: “Anenn kol matchendar, kai tumer kanna tapran!”

¹¹Koi djas o Simon Petro pale an o pani dren, un tserdas ko matchengro gono ap o them. Koi his sheel-te-pantch-deesh-te-triin (153) bare matche dren. Ninna te his jaake bud matche koi dren, djas o matchengro gono gar paash.

¹²“Awenn un chan!” penas o Jesus ap lende. Kek lendar putchas lestar: Koon hal tu? Halauter djinan, kai job lengro rai hi.

¹³O Jesus was pash lende, las ko maro, un das les lende. Jaake kras job ninna kol matchentsa.

¹⁴Kowa his o triinto kopo, kai mukas pes o Jesus glan peskre malende te dikell pal kowa, har job i mulendar djido was.

¹⁵Pal o chapen penas o Jesus ap o Simon Petreste: “Simon, tu o Johanneskro tchawo, kameh tu man budeder har kal tsele wawar man kamenna?” “Awa, rai!” penas job ap leste. “Tu djineh, kai me kamau tut o djijestar.” “De mire tikne bakren te chal!” penas o Jesus.

¹⁶I duito kopo putchas o Jesus lestar: “Simon, tu, o Johanneskro tchawo, kameh tu man o djijestar?” “Awa, rai!” penas job. “Tu djineh, kai me kamau tut o djijestar.” “De garda ap mire bakre!” penas o Jesus ap leste.

¹⁷O Jesus putchas lestar o triinto kopo: “Simon, tu, o Johanneskro tchawo, kameh tu man o djijestar?” Koi was o Petreske ropaske pral kowa, kai job triin kope putchas: Kameh tu man o djijestar? Un job penas: “Rai, tu djineh halauter. Tu djineh, kai me tut kamau o djijestar.” Penas o Jesus: “De mire bakren te chal!

¹⁸Tchatchepah, me penau tuke: Har tu terno hals, pandal tu tiri dori kokres trul tiro ripen, un djal kote, kai tu kamal. Te wal tu phuro, rikreh tu tire wasta glan tute, un i wawar pandell tire wasta khetne, un anell tut kote, kai tu gar kameh te djal.”

¹⁹Jaake kamas o Jesus o Petreste te sikrell, har job merella un an peskro merepen o Debles bares un railes krella. Pal kowa penas o Jesus ap leste: “Am mantsa!”

²⁰O Petro rissras pes trujel, un dikas koles kol deesh-te-dujendar, kai o Jesus les o djijestar kamas. Job his kowa, kai tchiwas pes ap o Jesuseskro betch an koi rati, har jon khetne chan, un putchas lestar: “Rai, koon mendar phukrella ap tute?”

²¹Har o Petro koles dikas, putchas job o Jesusestar: “Rai, hoi well dran koleste?”

²²Penas o Jesus ap leste: “Te kamau me, te atchell job djido, bis te wau pale, palle hi kowa gar tiro koowa. Am tu mantsa!”

²³Jaake was mashkral kol patslende penlo: Kowa merella gar. O Jesus penas gar, kai kowa gar merella. Job penas: “Te kamau me, te atchell job djido, bis te wau pale, palle hi kowa gar tiro koowa!”

²⁴Kau maal o Jesusestar hi kowa, kai nai penell, kai kowa lauter tchatcho hi. Job dikas kowa un tchinas les an kau liil. Un mer djinah, kai kowa, hoi job penas, tchatcho hi.

²⁵Hi ninna bud wawar koowa, hoi o Jesus kras. Te wals kowa lauter an i lila tchinlo, jek pal o wawar, wals i phub gar baro doha kol tsele pesse lilenge, patsau me.