Read O Debleskro Drom - I Bibla an o Romano Rakepen 2021 Johanni 4 Bible Online

Johanni 4 - O Debleskro Drom - I Bibla an o Romano Rakepen 2021 bible

Johanni 4

¹I Farisarja shunan, kai bud menshe djan o Jesuseske palla. Jon shunan ninna, kai job taufras budeder menshe har o Johanni.

²His gar o Jesus, kai taufras len. Kowa kran leskre mala.

³Har o Jesus shunas, hoi pral leste rakedo was, djas lo dran o them Judea win, un kamas pale an o them Galilea te djal.

⁴Job hunte djas pral ko them Samaria, te well lo an o them Galilea.

⁵Jaake was lo pash ko foro Sichar an o them Samaria. Ko foro his pash ko kotar phub tchiddo, hoi o Jakob peskro tchaweste Josef das.

⁶Koi his o Jakobeskro pani. O Jesus was khino ap ko dur drom un beshas pes pash ko pani. His deesh-te-dujenge.

⁷Koi was i djuwel pash ko pani, te lell li pani. Koja his i Samaritetsa. O Jesus penas ap late: “De man te pijell!”

⁸Leskre mala his gar koi. Jon his an o foro, te ginenn le tchomone te chal.

⁹Koi djuwel penas ap leste: “Tu hal i biboldo. Me hom i Samaritetsa. Har nai mangeh tu mandar pani, te dap tut te pijell? I bibolde chan gar khetne i Samaritentsa.”

¹⁰Penas o Jesus ap late: “Te djinals tu, hoi o Dewel kamell tut te dell, un koon tutar ko pani mangella, mangals tu mandar, te dap tut o pani. Un me doms tut o pani, hoi dell o djipen.”

¹¹“Romeha,” penas koi djuwel, “tut hi tchi, kai leh ko pani nai win. Un ko pani hi tel an i phub. Kai kameh tu ko pani, hoi dell o djipen, te lell?

¹²Hal tu bareder har o Jakob, maro kutch dad, kowa, kai hadas i phub kate win, te well kau pani win. Job un peskre tchawe un vieche pijan dran kau pani.”

¹³Penas o Jesus: “Hakeno, kai pijell kau pani, lell pale trush.

¹⁴Koon ko pani pijella, hoi me les dau, kowa lell an peskro tselo djipen buder kek trush. Ko pani, hoi me les dau, well an leste i djido pani, hoi dell les o djipen, hoi gar pre-herella.”

¹⁵“Romeha, de man ko pani!” penas koi djuwel, “te well man buder kek trush, te wap buder gar kai, te lap kau pani.”

¹⁶“Dja khere!” penas o Jesus, “de tiro romes gole, un am leha pale kai!”

¹⁷“Man hi kek rom,” penas koi djuwel. Penas o Jesus ap late: “Tiro hi tchatcho, te peneh tu: Man hi kek rom.

¹⁸Pantch romma his tut. Un kowa, kai tut kanna hi, kowa hi gar tiro rom. Koi penal tu o tchatchepen.”

¹⁹Penas koi djuwel: “Romeha, me dikau, tu hal i Debleskro rakepaskro.

²⁰Mare phure mangan o Debles ap kai berga an. Tumer bibolde penenn menge: Halauter hunte mangenn o Debles an o foro Jerusalem an!”

²¹Penas o Jesus: “Romnija, pats man, ko tsiro wella, kai mangenn tumer o Debles gar ap kai berga an, witar gar an o foro Jerusalem.

²²Tumer djinenn gar, kones tumer an-mangenna. Mer djinah, kones mer an-mangah. I biboldendar wella kowa, kai lell i menshen dran o tchilatchepen un o merepen win.

²³Ko tsiro wella, un hi kanna kai, koi della menshe, kai mangenn o dades an o tchatchepen an. Kal menshen hunte well o Debleskro Ducho. O dad rodell kolen, kai mangenn les jaake an.

²⁴O Dewel hi kek mensho, — job hi i ducho. Un kolla, kai mangenn les an, kolen hunte well o Debleskro Ducho. Kowa sikrell len, har te mangenn le les tchatchepah an.”

²⁵Penas i djuwel: “Me djinau, kai well ko baro rai, kolestar o Dewel penas, te well job,[15] kai kharell ninna o Kristo. Te well job pash mende, penell lo menge halauter.”

²⁶Penas o Jesus: “Me hom kowa. Tu rakreh leha.”

²⁷Koi wan leskre mala pale dran o foro. Har jon dikan, kai job i djuwjah rakras, kran le bare jaka. Kek putchas lestar: Hoi kameh tu latar? Un kek putchas lestar witar gar: Hoske rakreh tu lah?

²⁸Kanna mukas koi djuwel ko panjeskro khoro tardo un djas pale an ko foro un penas i menshenge:

²⁹“Awenn un dikenn! Me taprom i murshes, kowa djinas halauter pral mande. Nai hi job ko Kristo?”

³⁰Koi djan kol menshe dran o foro pash o Jesuseste, te dikenn le les.

³¹Har i djuwel an o foro his, penan leskre mala ap leste: “Sikepaskro, cha tchomone!”

³²Penas o Jesus ap lende: “Man hi i chapen, kowa prindjrenn tumer gar.”

³³Koi putchan leskre mala mashkral pende: “Anas leske jek tchomone chapaske?”

³⁴Penas o Jesus lenge: “Me djiwau kolestar, te krap, hoi o Dewel mandar kamella. Un leskri budi krau jaake rah, har job kamella. Doleske bitchras man lo ap i phub.

³⁵Tumer penenna: An star tchon[16] anenn le o djob dren. Krenn tumare jaka pre, un dikenn tumen trujel: O tsiro hi kanna kai. Kanna well o djob dren anlo.

³⁶Kanna anenn i budepangre kolen khetne, kai lenn o djipen, hoi gar pre-herella. Un lengri budi well plaissedo. Jaake hi hake dui bachtelo: Kowa, kai o tikno djob an i phub witsras, un kowa, kai anell o djob dren.

³⁷Ko lab hi tchatcho: Jek witsrell o tikno djob an i phub. Un i wawar anell ko djob dren.

³⁸Me bitchrom tumen, te anenn tumer kote o djob dren, kai i wawar maran pen tele, te witsran le ko tikno djob an i phub. Un tumer nai anenn kanna o djob dren.”

³⁹Bud kol menshendar dran o foro Sichar patsan ap o Jesuseste doleske, kai koi djuwel lenge penas: “Halauter, hoi me krom, penas job mange.”

⁴⁰Har i Samaritarja pash o Jesuseste wan, mangan le les, te atchell lo i tsiro pash lende. Un job atchas dui diwessa pash lende.

⁴¹Jaake shunan bud menshe, hoi job penas, un patsan ap leste.

⁴²Jon penan koi djuwjake: “Kanna patsah mer ap leste, un gar kokres, hoi tu menge lestar penal. Mer shunam les, un djinah kanna, kai job kowa hi, kai lell i menshen dran o tchilatchepen un o merepen win.”

⁴³Pal kol dui diwessa djas o Jesus dureder un was an o them Galilea.

⁴⁴Job penas jek kopo: I Debleskro rakepaskro well gar sharedo kote, kai job khere hi.

⁴⁵Har job an o them Galilea was, lan kol menshe les kamles pre. Ap ko tsiro, har o Jesus an o foro Jerusalem his, his jon ninna kote un dikan lauter, hoi job kras an kol diwessa, kai Passa kharenna. Doleske lan le les kanna kamles pash pende pre.

⁴⁶Un o Jesus was pale an ko gab Kana. Kowa his o gab an o them Galilea, kai kras lo i mool dran o pani. An o foro Kapernaum djiwas i pralstuno, kai budras o baro rajeske pral ko them. Koleskro tchawo his nasselo.

⁴⁷Har job shunas, kai o Jesus pale dran o them Judea an o them Galilea was, djas job pash leste, un mangas lestar: “Am tele an o foro Kapernaum! Un kre miro tchawes sasto, kai ap o merepen tchiddo hi!”

⁴⁸O Jesus penas ap leste: “Te dikenn tumer gar bud Debleskro koowa, kai kek mensho nai krella, patsenn tumer gar.”

⁴⁹Ko pralstuno penas pale ap leste: “Miro rai, am tele! Miro tchawo merella.”

⁵⁰“Dja khere,” penas o Jesus, “tiro tchawo djiwella!” Ko mursh patsas kowa, hoi o Jesus leske penas un djas khere.

⁵¹Job his gomme gar khere, koi wan leskre budepangre pash leste, un penan: “Tiro tchawo djiwella un hi sasto.”

⁵²Koi putchas job lendar pal ko tsiro, kai o tchaweha feteder was. Koi penan le: “Taissar, har eftenge his,[17] djas o nasslepen lestar.”

⁵³Kanna djinas ko dad, kai kowa ko tsiro his, kai o Jesus ap leste penas: “Tiro tchawo djiwella.” Un job patsas peskre tsele menshentsa ap o Jesuseste.

⁵⁴Kau duito baro koowa kras o Jesus an o Debleskri soor, har job dran o them Judea an o them Galilea was.