Read O Debleskro Drom - I Bibla an o Romano Rakepen 2021 Johanni 6 Bible Online

Johanni 6 - O Debleskro Drom - I Bibla an o Romano Rakepen 2021 bible

Johanni 6

¹Pal i tsiro djas o Jesus ap i wawar rig o baro panjestar Galilea. Ko pani kharella ninna Tiberias.

²Bud bud menshe djan leske palla. Jon dikan, hawo baro koowa job an o Debleskri soor kras ap i nasslende.

³Khetne peskre malentsa djas o Jesus ap i berga, un beshas pes lentsa tele.

⁴His i tikno tsiro glan i biboldengre bare diwessa, kai kharenna Passa.

⁵Har o Jesus dikas, kai bud bud menshe leske palla djan, putchas lo o Filipestar: “Kai nai ginah mer jaake bud mare, te well i tsele menshen chapaske?”

⁶Job kamas te dikell, har leskro patsepen hi. Doleske putchas job lestar kowa. O Jesus djinas kokres, hoi job kamas te krell.

⁷O Filipo penas: “Ninna te wals men dui-sheel rupene beme, wals kowa gar doha, te lell hakeno i tikno kotar maro.”

⁸Jek leskre malendar, o Andreas, ko phraal o Simon Petrestar, penas ap o Jesuseste:

⁹“Kate hi i tchawo. Koles hi pantch mare un dui matche. Kowa hi tchi jaake bud menshenge.”

¹⁰O Jesus penas: “Penenn i menshenge, te beshenn pen le!” Koi his bud senlepen. Un jon beshan pen koi. Kolla his nai jaake pantch serja (5.000) mursha.

¹¹Un o Jesus las kol mare, parkras pes pash o Debleste un das len i menshende. Kowa kras lo ninna kol matchentsa. Un hakeno las jaake bud, har job kamas.

¹²Har jon halauter tchalo his, penas job ap peskre malende: “Tchiwenn i tsele kotja khetne, hoi pral atchan, te djal kowa gar nashedo!”

¹³Koi tchiwan leskre mala halauter khetne, hoi pral atchas kol marendar. Koi wan deesh-te-dui marengre gone pherdo kol pantch marendar.

¹⁴Har kol menshe dikan, hoi o Jesus kras an o Debleskri soor, penan le: “Kowa hi tchatchepah ko Debleskro rakepaskro, kolestar penlo was, kai well lo ap kai phub.”

¹⁵O Jesus haiwas, kai kaman jon les te taprell, te krenn le les lengro baro rai. Doleske djas job dureder pral ap koi berga, te well lo peske kokres.

¹⁶Har i rat was, djan leskre mala tele pash o pani,

¹⁷djan an i bero[21], un uleran wergel o pani, te wenn le an o foro Kapernaum. His rati, un o Jesus his gar pash lende.

¹⁸Koi phurdas i baro sorelo ducho pral o pani. Un o pani was diwjo.

¹⁹Har leskre mala pantch, shob kilometarja win ap o baro pani his, dikan le o Jesuses: Job djas ap o pani, un was pash o bero. Un jon lan traash.

²⁰Job penas: “Me hom! Ma darenn!”

²¹Koi kaman jon les an o bero te lell. Ap jek kopo his le ap i wawar panjeskri rig, kote, kai jon kaman te djal.

²²O wawar diwes putchan pendar kol menshe, kai atchan ap i wawar panjeskri rig, kai o Jesus hi. Jon dikan, kai taissar jek bero tchiddo his pash o pani, un kai leskre mala djan penge. Jon djinan, o Jesus his gar pash lende.

²³Koi wan wawar bere[22] dran o foro Tiberias, un tchiwan pen kote, kai chans le ko maro, koleske o Jesus parkras pes pash o Debleste.

²⁴Har kol menshe haiwan, kai o Jesus buder gar koi hi, witar gar leskre mala, beshan pen jon an kol bere, uleran wergel o baro pani, un wan an o foro Kapernaum, te rodenn les le.

²⁵Kote hatsan le les, un putchan lestar: “Sikepaskro, kaana[23] wal tu kate?”

²⁶Penas o Jesus: “Tchatchepah, me penau tumenge: Tumer rodan man gar doleske, kai dikan i baro koowa, hoi krom an o Debleskri soor. Tumer chan ko maro, un wan tchalo. Doleske rodenn tumer man.

²⁷Ma djiwenn o chapaske, hoi paash djala! Djiwenn jaake, te lenn ko djipen, hoi gar pre-herella! O Menshengro Tchawo kokres nai dell tumen kowa. Jaake sikras o Dewel, kai kowa leskro tchawo hi.”

²⁸Koi putchan jon lestar: “Hoi hunte kras mer? Hoi kamell o Dewel mendar?”

²⁹Penas o Jesus ap lende: “O Dewel kamella, te patsenn ap koleste, kai job bitchras.”

³⁰Penan jon: “Kre menge i baro koowa an o Debleskri soor, te patsas mer ap tute! Sike men, hoi tu haiweh!

³¹De men hako diwes maro te chal, jaake har mare phure menshe chan o Debleskro maro an o mulo them! Kowa hi tchinlo an o Debleskro lab: Job das len maro dran o bolepen chapaske.”

³²Penas o Jesus: “Tchatchepah, me penau tumenge: Hi gar o Mose, kai das tumen o maro dran o bolepen. Kowa hi miro dad, kai dell tumen ko tchatcho maro dran o bolepen.

³³O Debleskro maro hi kowa, kai was dran o bolepen, un dell i menshen o djipen.”

³⁴“Rai,” penan jon, “de men ko maro hako tsiro!”

³⁵O Jesus penas lenge: “Me hom ko maro, kai della ko djipen. Koon pash mande wella, koles well buder kek bok. Un koon ap mande patsella, koles well buder kek trush.

³⁶Hi jaake har me tumenge penom: Tumer dikan man, un kamenn gar ap mande te patsell.

³⁷Halauter kolla, kai dell man o dad, wenn pash mande. Un halauter kolla, kai wenn pash mande, kolen witsrau me gar win.

³⁸Me wom gar dran o bolepen te krap kowa, hoi me kamau. Me wom te krap, hoi kowa kamella, kai bitchras man.

³⁹Un o Dewel kamella, te nashrap me kekes kolendar, kai job man das. Job kamella, te krap len i mulendar djido ap o palstuno diwes[24].

⁴⁰Kowa kamell miro dad: Hakeno, koon o tchawes dikella, un ap leste patsella, lell o djipen, hoi gar pre-herella. Un me krau les i mulendar djido ap o palstuno diwes.”

⁴¹I bibolde his chojemen pral kowa, kai job penas: Me hom ko maro, hoi dran o bolepen tele was.

⁴²“Hi kowa gar o Jesus, ko Josefeskro tchawo?” penan jon. “Mer prindjrah leskro dades un leskri da. Har nai penell lo: Me wom dran o bolepen?”

⁴³Koi penas o Jesus ap lende: “Ma choirenn tumen pral kowa, hoi me tumenge penom!

⁴⁴Kek nai well pestar pash mande. O dad, kai bitchras man, hunte anell les pash mande. Un koon pash mande wella, koles krau me i mulendar djido ap o palstuno diwes.

⁴⁵An o Debleskro lab tchinan kol Debleskre rakepangre: O Dewel hi o sikepaskro halauterenge.[25] Hakeno, koon ap o dadeste shunella un krell, hoi job kamella, well pash mande.

⁴⁶Kek dikas o dades. Kowa kokres, kai was o Deblestar, dikas les.

⁴⁷Tchatchepah, me penau tumenge: Koon ap mande patsella, koles hi o djipen, hoi gar pre-herella.

⁴⁸Me hom ko maro, hoi dell tumen ko djipen.

⁴⁹Tumare phure chan ko maro, hoi o Dewel len das an o mulo them, un jon meran.

⁵⁰Me hom ko tchatcho maro, hoi dran o bolepen wella. Koon kowa chala, kowa merell gar.

⁵¹Me hom ko maro, hoi dell o djipen, un hoi was dran o bolepen. Hakeno, koon chala kau maro, lell o djipen, hoi gar pre-herella. Un ko maro hi miro mass. Me dau les i menshenge, te lenn le ko djipen.”

⁵²Kanna tchingran pen kol bibolde, un penan: “Har nai dell men ko mursh peskro mass te chal?”

⁵³Koi penas o Jesus ap lende: “Tchatchepah, me penau tumenge: Te chan tumer gar o Menshengro Tchaweskro mass, un pijenn gar leskro rat, hi tumen gar o djipen, hoi gar pre-herella.

⁵⁴Koon chala miro mass, un pijell miro rat, lell o djipen, hoi gar pre-herella. Un me krau les i mulendar djido ap o palstuno diwes.

⁵⁵Miro mass hi o tchatcho chapen, un miro rat o tchatcho pipen.

⁵⁶Koon chala miro mass, un pijell miro rat, kowa atchella an mande, un me atchau an leste.

⁵⁷Jaake har o dad, kai bitchras man, hi djido, un das man o djipen, jaake dau me o djipen kolende, kai chan miro mass.

⁵⁸Kawa hi ko maro, hoi was dran o bolepen. Koon kau maro chala, lell o djipen, hoi gar pre-herella. Kawa hi i wawar maro har kowa, hoi tumare phure chan.”

⁵⁹Kowa penas job an i biboldengri kangri, har job an ko foro Kapernaum lenge o Debleskro lab penas.

⁶⁰Har kolla, kai leha djan, kowa shunan, penan bud lendar: “Kowa hi kek shukar koowa, hoi job koi penella. Koon shunell kowa nai?”

⁶¹Har o Jesus lendar haiwas, kai jon pen pral leste choirenna, penas lo ap lende: “Choirell tumen kowa?

⁶²Hoi krans tumer, te dikans tumer, te djal o Menshengro Tchawo pale an o bolepen?

⁶³O Debleskro Ducho hi kowa, kai dell o djipen. O mensheskri soor nai krell kowa gar. Mire laba, hoi me tumenge penom, wan dran o Debleskro Ducho. Doleske anenn le tumenge ko djipen.

⁶⁴Mashkral tumende hi menshe, kai patsenn gar.” O Jesus djinas, koon kolla his, kai patsenn gar. Ninna djinas lo, koon ap leste phukrella.

⁶⁵Un job penas dureder: “Doleske penom me tumenge, kai kek nai well pestar pash mande. O dad kokres nai anell les pash mande.”

⁶⁶Ap ko tsiro tserdan pen bud kolendar pale, kai leske palla djan, un djan buder gar leha.

⁶⁷Koi putchas o Jesus kol deesh-te-dujendar: “Kamenn tumer man ninna te mukell?”

⁶⁸“Rai, pash koneste djas mer?” penas o Simon Petro. “Tut hi laba, kai denn men o djipen, hoi gar pre-herella.

⁶⁹Mer patsah un djinah, tu weh o Deblestar. O Dewel bitchras tut.”

⁷⁰O Jesus penas lenge: “Me rodom tumen deesh-te-dujen win. Un an jekeste tumendar hi o beng.”

⁷¹Job rakras o Judasestar, leskro dad hi o Simon Iskariot. O Judas his jek kol deesh-te-dujendar, kowa kai phukrella ap leste.