Read O Debleskro Drom - I Bibla an o Romano Rakepen 2021 Johanni 7 Bible Online

Johanni 7 - O Debleskro Drom - I Bibla an o Romano Rakepen 2021 bible

Johanni 7

¹Pal kowa djas o Jesus an o them Galilea trujel. Job kamas gar an o them Judea te djal. I pralstune bibolde kote kaman les te marell.

²I tikno tsiro glan kol biboldengre bare diwessa, hoi kharenna Sukkot[26], penan leskre phrala ap leste: “Ma atch an o them Galilea! Dja an o them Judea, te dikenn ninna tire mala, hawo baro koowa tu kreh!

⁴Kek mensho khatrell pes, te kamell lo i menshen te sikrell, hoi job nai krella. Te kreh tu sawo baro koowa, palle muk kowa i tsele menshen te dikell!”

⁵Leskre phrala patsan gar ap leste. Doleske rakran jon jaake.

⁶Koi penas o Jesus ap lende: “O tsiro hi mange kanna gar kai, te djap kote. Tumer nai djan hako tsiro koi.

⁷I menshe hi gar tchilatcho ap tumende. Ap mande hi le tchilatcho. Me penom lenge, kai kowa, hoi jon krenna, tchilatcho hi.

⁸Djan tumer ap o festo! Me djau gar peha. O tsiro hi mange kanna gar kai.”

⁹Kowa penas job, un atchas an o them Galilea.

¹⁰Har leskre phrala ap o festo his, djas job ninna tchorchanes koi.

¹¹Koi rodan les kol pralstune bibolde mashkral kolende, kai wan ap o festo, un putchan hakenestar: “Kai hi ko mursh?”

¹²Ninna kol bud menshe, kai wan koi, rakran pral leste. His menshe mashkral lende, kai penan: “Job hi i latcho mursh.” Wawar penan: “Na-a, job chochella i menshen.”

¹³I darjatar i pralstune biboldendar rakran le halauter tchorchanes pral leste.

¹⁴Har ko festo paash trujel his, djas o Jesus an o Debleskro baro kheer, un penas i menshenge o Debleskro lab.

¹⁵Koi kran i pralstune bibolde bare jaka, un penan: “Har nai djinell job jaake bud? Kek anas leske kowa pashel.”

¹⁶Penas o Jesus lenge: “Hoi me tumenge penau well gar mandar. Kowa well kolestar, kai bitchras man.

¹⁷Koon kowa krella, hoi o Dewel kamella, kowa haiwella, kai mire laba o Deblestar wenna, un gar mandar.

¹⁸Koon pral peste mishto rakrella, kowa kamella, te well job sharedo. Koon kamella, te well kowa sharedo, kai bitchras les, kowa hi tchatcho. Un an leste hi kek tchilatchepen.

¹⁹O Mose das tumen i lila, kai tchinlo hi, har tumer hunte djiwenna. Kek tumendar djiwell jaake. Hoske kamenn tumer man te marell?”

²⁰“An tute hi i beng[27]”, penan kol tsele menshe. “Koon kamell tut te marell?”

²¹Penas o Jesus: “Jek baro koowa krom me pash tumende an o foro Jerusalem. Un tumer han chojedo pral kowa.

²²Te hi tumare mursh tchawe ochta diwessa phuro, tchinenn tumer len ap o mass, ninna ap o Debleskro Diwes. O Mose penas tumenge, te krenn kowa. Un o Mose his gar kokres, kai penas tumenge kowa. Ninna tumare phure, kai djiwan glan leste, penan kowa un rikran pen koi pre.[28]

²³Tumer tchinenn tumare tchawen ap o mass ap o Debleskro diwes, te well rikedo, hoi o Mose tchinas an peskre lila. Hoske han tumer jaake chojedo ap mande, kai krom i tselo menshes sasto ap o Debleskro diwes?

²⁴Tumer te penenn, kai i mensho i doosh ap peste anas, palle djan pal o tchatchepen un gar pal kowa, hoi dikenn tumare jakentsa!”

²⁵Koi penan kolla, kai hi dran o foro Jerusalem: “Hi kowa gar ko mursh, kai kaman le les te marell?

²⁶Kanna rakrell lo glan hakeneste. Un kek dell les trad. Dikan mare pralstune kanna dren, kai job ko baro rai hi, kolestar o Dewel penas, te well job?

²⁷Mer djinah, dran hawo foro ko mursh wella. Te well ko baro rai, kolestar o Dewel penas, te well job, djinell kek dran hawo foro job wella.”

²⁸O Jesus, kai an o Debleskro baro kheer i menshenge o Debleskro lab penas, shunas kowa, un das gole: “Har nai prindjrenn tumer man, un djinenna, kai wom? Me wom gar mandar kokres! Tchatchepah, koles, kai bitchras man, prindjrenn tumer gar!

²⁹Me prindjrau les! Me wom lestar! Un job bitchras man!”

³⁰Koi kaman jon les te taprell. Un kek nai hadas o wast ap leste. O tsiro his leske kanna gar koi, kai well job tapedo.

³¹Bud kol menshendar patsan ap leste un penan: “Te well o baro rai, kolestar o Dewel penas, te well job, nai krell kowa bareder koowa, har kau mursh Jesus?”

³²I Farisarja shunan, hoi kol menshe pral o Jesuseste rakran. Un i Farisarja un i bare rashaja bitchran klisten, te taprenn le o Jesuses.

³³Koi penas o Jesus: “Me hom buder gar rah pash tumende. Me djau pash koleste, kai bitchras man.

³⁴Tumer rodenn man, un hatsenn man gar. Kote, kai me palle hom, nai wenn tumer gar.”

³⁵“Kai kamell job te djal, kai hatsah mer les gar?” putchas jek i wawarestar. “Kamell job pash kol biboldende te djal, kai djiwenn an o grichtikro them, te penell lo kote i menshenge o Debleskro lab?

³⁶Har haiwas mer leskro rakepen: Tumer rodenn man, un hatsenn man gar un kote, kai me palle hom, koi nai wenn tumer gar?”

³⁷Ap ko pralstuno un shukeder diwes, was o Jesus pale glan kol tsele menshende, un das gole: “Kones trush hi, kowa te well pash mande un pijella!

³⁸Koon ap mande patsella, har o Debleskro lab penella, dran koleste well ko pani, kai dell o djipen.”

³⁹Job penas kowa pral o Debleskro Ducho, hoi kolla lenna, kai ap leste patsenna. O Debleskro Ducho his gomme gar koi. Ap ko tsiro his o Jesus gomme gar pash o Debleste an o bolepen, te bitchras lo les ap lende.

⁴⁰Mashkral kolende, kai shunan ko rakepen, his menshe, kai penan: “Kau mursh hi tchatchepah ko Debleskro rakepaskro, kolestar penlo was, te well job.”

⁴¹Wawar penan: “Kowa hi ko baro rai, kai well o Deblestar.” Un wawar penan: “Well ko baro rai dran o them Galilea? Na-a!

⁴²O Debleskro lab penella, ko baro rai, kai well o Deblestar, kowa hi o Davideskre menshendar, un well an o foro Betlehem boldo har o David.”

⁴³Kanna djinan i menshe gar, hoi tchatcho hi. Ko jek penas kawa, ko wawar penas kowa.

⁴⁴Mashkral lende his ninna sawe, kai kaman les te taprell. Un kek hadas peskro wast pal leste.

⁴⁵Har i kliste pale pash i bare rashaja un i Farisarja wan, putchan kolla lendar: “Hoske anenn les tumer gar peha?”

⁴⁶“Har kawa mursh rakras, shunam mer maro tselo djipen gar!” penan i kliste ap lende.

⁴⁷“Chochas lo tumen ninna?” putchan kol Farisarja.

⁴⁸“Patsell jek i pralstunendar un i Farisarendar ap leste? Na-a!

⁴⁹Kol bud menshe djinenn gar, hoi an o Moseskre lila tchinlo hi. Jon hi praassedo!”

⁵⁰O Nikodemus, kai his ninna i Farisari, kowa kai was jek rati pash o Jesuseste, penas ap lende:

⁵¹“Pal maro tchatchepen nai dah kekes i phagi[29], te shunam gar lestar, hoi job rakrell pral kowa win. Mer dah ninna kekes i phagi, te djinah gar, hoi job kras.”

⁵²“Hal tu ninna dran o them Galilea?” putchan le lestar. “Tu te drawereh[30] mishto an o Debleskre lila, palle dikeh, kai kek Debleskro rakepaskro wella dran o them Galilea.”

⁵³Un hakeno djas khere.