Read O Debleskro Drom - I Bibla an o Romano Rakepen 2021 Johanni 8 Bible Online

Johanni 8 - O Debleskro Drom - I Bibla an o Romano Rakepen 2021 bible

Johanni 8

²O wawar diwes taissarlake was job pale an o Debleskro baro kheer. Un i tsele menshe wan pash leste. Un job beshas pes tele, un penas lenge o Debleskro lab.

³Koi wan i tchatchepangre un i Farisarja. Kolla anan i romedini romjat pash leste. Koja was tapedo koi pashel, har joi i wawar mursheha khetne his. Jon tchiwan lat mashkral i menshende, jaake, kai dikell lat nai hakeno.

⁴Un jon penan ap o Jesuseste: “Sikepaskro, kai romni was tapedo, har joi i wawar mursheha khetne his.

⁵An o Moseskre lila, kai tchinlo hi, har mer djiwas, penas o Mose menge, kai sawe djuwja hunte wenn mulo dino i barrentsa. Hoi peneh tu pral kowa?”

⁶Kowa putchan le lestar, te nai taprenn le les an leskre laba, jaake te nai anenn le i doosh ap leste pre. O Jesus tchiwas pes glan tele, un tchinas o gushteha an i phub.

⁷Har jon lestar pale putchan, hadas job pes pre, un penas: “Koon kek tchilatcho koowa kras, mu well ko ersto, kai witsrell i bar ap late!”

⁸Un pale tchiwas pes job glan tele, un tchinas pale an i phub.

⁹Har jon kowa shunan, djan le penge, jek pal o wawar. I phureder djan sikeder lendar, har kol wawar. Job atchas kokres koi romjah, kai kote tardo his.

¹⁰Kanna hadas pes o Jesus pale pre, un putchas koi romjatar: “Hi kek koi, kai kamell, te less i phagi?”

¹¹“Na-a, miro rai, kek hi koi,” penas koi romni. Penas o Jesus: “Jaake kamau me witar gar, te less i phagi. Dja khere, un ma an buder kek doosh[31] ap tute!”

¹²Pale rakras o Jesus i menshentsa un penas: “Me hom koi momeli i menshenge. Koon mange palla djala, djal gar an o tamlepen[32]. Me hom koi momeli, kai o djipen della.”

¹³Koi penan kol Farisarja ap leste: “Tu rakreh tutar kokres un peneh, koon tu hal. Doleske hi kowa tchi moldo, hoi tu rakreh.”

¹⁴Penas o Jesus: “Ninna te rakrau mandar kokres, hi kowa tchatcho, hoi penau. Me djinau, konestar me wom, un kai me djaua. Tumer djinenn gar, konestar me wom, witar gar, kai me djaua.

¹⁵Tumer dikenn i menshes tumare jakentsa, un penenn: Kowa anas doosh ap peste! Me krau kowa gar.

¹⁶Me te penau: Kowa anas i doosh ap peste! palle hi kowa tchatcho. Me krau kowa gar mandar kokres. Miro dad, kai bitchras man, hi pash mande.

¹⁷Ninna an o Moseskre lila hi tchinlo: Te penenn dui pral jekeste win, jaake hi kowa tchatcho.[33]

¹⁸Me penau o tchatchepen pral mande, un miro dad, kai bitchras man, penell ninna o tchatchepen pral mande.”

¹⁹Putchan jon lestar: “Kai hi tiro dad?” Penas o Jesus: “Tumer prindjrenn man gar, witar gar miro dades. Te prindjrans tumer man, jaake prindjrans ninna miro dades.”

²⁰Har job kawa penas, his job an o Debleskro baro kheer, kote, kai i pirja tardo his, kai i menshe lowe o Debleske dren tchiwan. Kote penas job i menshenge o Debleskro lab. Un kek tapras les. I tsiro his leske kanna gar koi.

²¹Pale penas o Jesus ap lende: “Me djau mange. Tumer rodenn man, un tumer merenn an tumaro tchilatchepen. Kote, kai me djaua, nai wenn tumer gar.”

²²Penan kol bibolde: “Hoi penell job kai: Kote, kai me djau, nai wenn tumer gar? Kamell job pes te marell?”

²³Penas job ap lende: “Tumer han i phubjatar. Me hom dran o bolepen. Tumer han kai phubjatar. Me hom gar kai phubjatar.

²⁴Doleske penom tumenge: Tumer merenn an tumaro tchilatchepen. Tumer te patsenn gar, kai me kowa hom, koon me hom, palle merenn tumer an tumaro tchilatchepen.”

²⁵“Pen menge, koon tu hal!” penan jon ap leste. Penas o Jesus: “Me penom tumenge kowa jaake bud kope.

²⁶Me nai penoms tumenge bud koowa, kai dikom o tchilatchepen ap tumende. Me krau kowa gar. Me penau i menshenge, hoi shunom kolestar, kai bitchras man. Un hoi job penella, hi tchatcho.”

²⁷Jon haiwan gar, kai o Jesus o Deblestar, peskro dadestar, rakras.

²⁸Koi penas o Jesus ap lende: “Te hadan tumer o Menshengro Tchawes pral, palle djinenn tumer, koon me hom, un kai me tchi mandar kokres kraua. Hoi o dad mange penas, kowa penau me dureder.

²⁹Un kowa, kai bitchras man, hi pash mande. Job mukas man gar kokres. Me krau hako tsiro, hoi job kamella.”

³⁰Har o Jesus kowa penas, patsan bud ap leste.

³¹Ap kol biboldende, kai kanna ap leste patsan, penas lo: “Tumer te krenna, hoi me tumenge penau, palle han tumer tchatchepah mire mala, kai mire laba pre lan.

³²Un tumer prindjrenna o tchatchepen. Un o tchatchepen krella, te han buder gar pandlo.”

³³Penan jon: “Mer ham o Abrahameskre tchawe. Un an kek tsiro hams pandle budepangre. Har nai peneh tu menge, te atchenn buder gar pandlo?”

³⁴Penas o Jesus: “Tchatchepah, me penau tumenge: Koon o tchilatchepen krella, hi pandlo ap o tchilatchepen.

³⁵I budepaskro atchell gar hako tsiro an peskro rajeskro kheer. O tchawo atchella jaake rah, har job djiwella.

³⁶Te krell o Debleskro tchawo, kai han buder gar pandlo, jaake han tchatchepah buder gar pandlo.

³⁷Me djinau, kai han o Abrahameskre tchawe. Ninna te hi jaake, kamenn tumer man te marell. Kowa, hoi me tumenge penau, lenn tumer gar pre. Doleske kamenn tumer man te marell.

³⁸Me penau tumenge kowa, hoi pash miro dadeste dikom. Tumer krenna, hoi shunan tumaro dadestar.”

³⁹Koi penan jon ap leste: “Maro dad hi o Abraham.” Penas o Jesus: “Te wans tumer lestar, krans, hoi job kras.

⁴⁰Kanna, kai me tumenge ko tchatchepen penom, kai shunom o Deblestar, kamenn tumer man te marell. Kowa kras o Abraham gar.

⁴¹Tumer krenn kowa, hoi tumaro dad ninna kras.” Penan jon ap leste: “Mari dai hi kek lubni. Men hi jek dad. Kowa hi o Dewel.”

⁴²“Te wals o Dewel tumaro dad”, penas o Jesus, “kamans man tumer. Lestar wom me. Me wom gar mandar. Hi o Dewel, kai bitchras man.

⁴³Hoske haiwenn tumer miro rakepen gar? Tumaro dji hi pandlo. Tumer shunenn nai miro lab gar.

⁴⁴Tumaro dad hi o beng. Un tumer krenna, hoi tumaro dad ninna kamella. Job hi jek, kai marell i menshen hako tsiro. Un job hi gar an o tchatchepen tardo. O tchatchepen hi gar an leste. Te rakrell job o chochepen, well kowa dran leste. Job hi i chocheno, un anas o chochepen ap kai phub.

⁴⁵Me penau o tchatchepen. Doleske patsenn tumer man gar.

⁴⁶Koon tumendar nai penella, kai me jek tchilatcho koowa krom? Me te penau o tchatchepen, hoske patsenn tumer man gar?

⁴⁷Koon o Deblestar wella, shunella ap kowa, hoi o Dewel penella. Tumer wenn gar lestar. Doleske shunenn tumer gar ap leskre laba.”

⁴⁸“Hi maro gar tchatcho?” penan kol bibolde. “Tu hal i Samaritari un an tute hi o beng, jaake har mer les penam.”

⁴⁹“Na-a,” penas o Jesus, “an mande hi kek beng. Me sharau miro dades. Tumer kamenn man gar te sharell.

⁵⁰Me kamau gar, te sharenn man i menshe. Kowa hi o Dewel, kai kamella, te wap me sharedo. Job rakrell i phagi pral tumende win.

⁵¹Tchatchepah, me penau tumenge: Te hi jek koi, kai krella, hoi me penom, kowa merell buder gar.”

⁵²Koi penan jon: “Kanna djinah mer, kai hi an tute i beng. O Abraham meras, un o Debleskre rakepangre meran ninna. Un tu peneh: Te krell jek, hoi me kamau, kowa merell buder gar.

⁵³Hal tu budeder har maro dad Abraham, kai meras? Un kol Debleskre rakepangre meran ninna. Hal tu feteder har jon?”

⁵⁴Penas o Jesus: “Te sharoms me man, wals kowa tchi moldo. Miro dad hi kowa, kai sharell man. Kolestar penenn tumer: Job hi maro Dewel.

⁵⁵Tumer prindjrenn les gar. Me prindjrau les. Te penaus me, kai prindjrau les gar, woms i chocheno har tumer. Me prindjrau les un krau, hoi job penella.

⁵⁶O Abraham, tumaro dad, his bachtelo, har job dikas, kai me wau. Job dikas kau diwes, un his bachtelo.”

⁵⁷Penan kol bibolde ap leste: “Tu hal kek pantch-desha bersha phuro un peneh, kai dikal o Abrahames.”

⁵⁸Penas o Jesus ap lende: “Tchatchepah, me penau tumenge: O Abraham his gomme gar boldo, koi homs me koi.”

⁵⁹Koi hadan jon barra pre, te witsrenn le kolla ap leste. Un job khatras pes, un djas dran o Debleskro baro kheer win.