Read O Debleskro Drom - I Bibla an o Romano Rakepen 2021 Johanni 9 Bible Online

Johanni 9 - O Debleskro Drom - I Bibla an o Romano Rakepen 2021 bible

Johanni 9

¹Ap o drom dikas o Jesus i murshes. Kowa was koreles boldo.

²Un o Jesuseskre mala putchan o Jesusestar: “Sikepaskro, koon anas i doosh[34] ap peste, te was kau mursh koreles boldo? Anas job i doosh ap peste? Anan leskro dad un leskri dai i doosh ap pende?”

³“Kek lendar anas i doosh ap peste,” penas o Jesus. “Job gar, leskro dad un leskri dai witar gar. Job hi korelo, te well o Debleskri bari soor ap leste diklo.

⁴Jaake rah har diwes hi, kras mer, hoi o Dewel menge penas, kowa, kai bitchras man. I rati wella: Koi nai krell kek i budi.

⁵Jaake rah, har me ap kai phub hom, jaake rah hom me koi momeli i menshenge.”

⁶Har job kowa penas, tchungras lo an i tchik, las kowa, un makas leske ap i jaka.

⁷Un job penas ap leste: “Dja pash ko pani Siloam, un thob tut koi!” Siloam kharella: O Dewel bitchras man. Koi djas job un thowas pes kote. Har job pale was, dikas lo nai.

⁸Kol menshe, kai pash leste djiwan, un wawar, kai djinan, kai job o mangepaskro his, penan: “Hi kowa gar ko mursh, kai kote beshdo his un mendar lowe mangas?”

⁹His menshe koi, kai penan: “Kowa hi ko mursh.” Wawar penan: “Na-a! Kowa dikell win har job.” Ko mursh penas: “Me hom kowa.”

¹⁰“Har well kowa, kai tu dikeh nai ap jek kopo?” putchan le lestar.

¹¹Penas job: “O mursh, kai kharell Jesus, makas mange tchomone ap i jaka, un penas: Dja pash ko pani Siloam, un thob tut koi! Me djom kote, un thowom man, un dikom nai.”

¹²“Kai hi job?” putchan le lestar. “Me djinau gar,” penas job.

¹³Un jon anan kol murshes pash i Farisarja.

¹⁴His i Debleskro diwes, har o Jesus makas koi tchik ap leskre jaka, un kras, te dikell job.

¹⁵Kanna putchan ninna i Farisarja kolestar, kai sasto was: “Har well kowa, kai dikeh nai ap jek kopo?” Un job penas lenge: “Job makas mange tchomone ap i jaka, me thowom man, un kanna nai dikau.”

¹⁶Kote his Farisarja, kai penan: “Kau mursh was gar o Deblestar. Job budrell ap o Debleskro diwes.” Wawar penan: “Har nai krell i tchilatcho mursh sawo baro koowa?” Un mashkral lende djas o tchingepen.

¹⁷Un pale putchan le kolestar, kai sasto was: “Hoi peneh tu lestar, kai job tire jaka pre kras? Hoi peneh tu, koon job hi?” “Job hi i Debleskro rakepaskro,” penas lo.

¹⁸Kol pralstune bibolde patsan gar, kai job nai dikas gar, un kanna dikell job nai. Doleske kharan le leskro dades un leskri da,

¹⁹un putchan lendar: “Hi kawa tumaro tchawo, kai penenn lestar: Job was koreles boldo? Har well kowa, kai dikell job nai ap jek kopo?”

²⁰Leskro dad un leskri dai penan: “Mer djinah, kai kawa maro tchawo hi, kai koreles boldo was.

²¹Har kowa djas, kai job nai dikell kanna, djinah mer gar. Un koon kras, kai job nai dikella, djinah witar gar. Putchenn lestar! Job hi phuro doha. Job nai penell tumenge halauter.”

²²Len his daar kol pralstune biboldendar. Doleske rakran jon jaake. I pralstune bibolde kaman hakenes pale-tchiddo te krell, kai penella o Jesusestar: Job hi o baro rai, kolestar o Dewel penas, te well job.

²³Doleske penan o dad un i dai: “Job hi phuro doha. Putchenn lestar!”

²⁴Kol pralstune bibolde dan koles, kai korelo his, o duito kopo gole, un penan ap leste: “Pen kanna o tchatchepen glan o Debleste! Mer djinah, kai djal kau Jesus gar ap o Debleskro drom.”

²⁵Koi penas job ap lende: “Djinau gar, te djal job ap o Debleskro drom, witar gar, te djal job gar ap o Debleskro drom. Jek djinau me: Me dikom nai gar. Kanna dikau me nai.”

²⁶“Hoi kras job tuha?” kaman jon pale te djinell. “Har kras job tut sasto, kai dikeh nai?”

²⁷“Har kowa was, penom me tumenge,” penas job, “haiwan tumer man gar? Hoske kamenn tumer kowa pale te shunell? Kamenn tumer, te well job ninna tumaro sikepaskro?”

²⁸Koi tchingran jon ap leste un penan: “Tiro sikepaskro hi lo. Maro sikepaskro hi o Mose.

²⁹Mer djinah, kai o Dewel o Moseha rakras. Konestar kawa wella, djinah mer gar.”

³⁰Ko mursh penas ap lende: “Kowa haiwau me gar. Kau mursh kras, kai dikau nai. Un tumer djinenn gar, konestar job wella.

³¹Mer halauter djinah, kai o Dewel ap kekeste shunella, kai djal gar ap leskro drom. O Dewel shunell ap koleste, kai darell lestar un djiwell jaake, har job kamella.

³²Jaake rah, har i phub tardo hi, shunas kek, kai i mensho jekes sasto kras, kai korelo boldo was.

³³Te wals kau mursh gar o Deblestar, nai krals job sawo koowa gar.”

³⁴Koi penan jon ap leste: “Tu, kai boldo hal an o tchilatchepen, kameh kanna maro sikepaskro te well?” Un jon witsran les win.

³⁵O Jesus shunas, kai jon les win witsran. Un har job les hatsas, putchas lo lestar: “Patseh tu ap o Menshengro Tchaweste?”

³⁶Penas ko mursh: “Miro rai, koon hi kowa, te patsap ap leste?”

³⁷“Tu dikal les,” penas o Jesus ap leste, “job hi kowa, kai rakrell tuha.”

³⁸“Rai, me patsaua!” das job gole, un witsras pes glan leste tele.

³⁹Un o Jesus penas: “Me wom ap kai phub, te sikrap i menshen, koon i doosh ap peste anas, un koon kek doosh ap peste anas, jaake kai kolla, kai dikenn nai gar, dikenn nai. Un kolla, kai dikenn nai, kolende sikrau me, kai jon tchi dikenna.”

⁴⁰Kowa shunan i Farisarja, kai his kote pashel tardo. Kolla putchan lestar: “Ham mer ninna korelo?”

⁴¹Koi penas o Jesus ap lende: “Te hans korelo, wals tumen kek doosh. Tumer penenn: Mer dikah. Doleske atchell i doosh ap tumende.”