Read O Debleskro Drom - I Bibla an o Romano Rakepen 2021 Bitchepangre 11 Bible Online

Bitchepangre 11 - O Debleskro Drom - I Bibla an o Romano Rakepen 2021 bible

Bitchepangre 11

¹Kol Jesuseskre bitchepangre un kol wawar patsle an o them Judea shunan, kai ninna kolla, kai kek bibolde hi, ap o Debleskro lab patsan.

²Har o Petro an o foro Jerusalem was, tchingran kol patsle bibolde leha.

³Un jon penan ap leste: “Tu djal pash kolende, kai hi gar bibolde, un chal lentsa.”

⁴Koi penas o Petro lenge, jek pal o wawar, hoi koi djas:

⁵“Me homs an o foro Joppe,” penas job, “un mangom o Debles an. Koi mukas o Dewel man tchomone te dikell. Me dikom tchomone har i bari plachta. Koja was ap star rigja rikedo, un was tele dran o bolepen pash mande.

⁶Har me dren dikom, dikom me bud vieche: star-herjengre vieche, sapa un tchirkle.

⁷Un jek rakras ap mande: Petro, mare len un cha len!

⁸Penom me: Na-a, rai! An miro tselo djipen chom me tchi, hoi hi pale-tchiddo.

⁹Ko rakepen dran o bolepen penas pale: Ma kre pale-tchiddo, hoi o Dewel erligo kras!

¹⁰Kowa djas triin kope. Un halauter djas pale an o bolepen.

¹¹Ap jek kopo his triin mursha tardo glan ko kheer, kai djiwom. Kolla wan dran o foro Cesarea pash mande.

¹²Un o Debleskro Ducho penas ap mande: Pats, hoi jon tuke penenna! Dja lentsa! Un me djom shob phralentsa an o kheer ko murshestar, kai kol triin murshen pash mande bitchras.

¹³Kowa penas menge, har dikas job i bolepaskres an peskro kheer, un kai kowa ap leste penas: Bitche murshen an o foro Joppe, te lenn le o Simones. Job kharella ninna Petro.

¹⁴Kowa penell tuke, har leh tu un i menshe an tiro kheer o Debleskro djipen.

¹⁵Har me, o Petro, lentsa rakrom, peras o Debleskro Ducho ap lende. Kowa his jaake har pash mende an o foro Jerusalem, har o Debleskro Ducho ap mende peras.

¹⁶Koi djan kol laba an miro shero trujel, hoi menge maro rai Jesus penas: O Johanni tchiwas i menshen an o pani. Ap tumende tchiwell o Dewel peskro Debleskro Ducho.

¹⁷Me dikom, o Dewel das lende ninna peskro Ducho, jaake har job mende das, har mer patsam ap o rajeste, o Jesus Kristeste. Koon hom me, te rikrap me o Debles pre?”

¹⁸Har jon kowa shunan, tchingran le buder gar ap o Petreste. Jon sharan o Debles un penan: “O Dewel sikras ninna kolende peskro drom an o newo djipen, kai hi kek bibolde. Jon nai mukenn pengro tchilatcho drom un wenn ap o Debleskro drom.”

¹⁹An ko tsiro, kai o Stefano maredo was, wan i patsle palla lino. Kolla nashan dran o foro Jerusalem, un djan an i themma Fenicia un Ciprus, un an o foro Antiochia. Un jon penan kote kokres i biboldenge o Debleskro lab, un kek wawarenge.

²⁰Mashkral kol patslende his ninna mursha dran Ciprus un Kirene. Kolla wan an o foro Antiochia, un penan ninna kolenge, kai kek bibolde hi, o latcho lab o rai Jesusestar.

²¹Un o rajeskri soor his lentsa. Un bud kolendar, kai kek bibolde hi, wan patslo, un wan ap o Jesuseskro drom.

²²Un i patsle an o foro Jerusalem shunan kowa, un bitchran o Barnabes an o foro Antiochia.

²³Har job koi his un dikas, hoi o Dewel an peskro baro latchepen kote lauter kras, was lo bachtelo un mangas len, te atchenn le pengro tselo djijeha pash o Jesuseste.

²⁴O Barnabas his i latcho mursh. Job his pherdo Debleskro Ducho. Un les his i baro patsepen. Un bud wan patslo ap o rai Jesuseste.

²⁵Un o Barnabas djas an o foro Tarsus, te rodell lo o Saules.

²⁶Har o Barnabas les hatsas, anas lo les an o foro Antiochia. Un kol dui atchan i tselo bersh kote pash i patslende, un penan bud menshenge o Debleskro lab. Kote dan jon i patslen ko lab Kriste.

²⁷An kol diwessa wan Debleskre rakepangre dran o Jerusalem an o foro Antiochia.

²⁸Jek lendar his o Agabo. Job stas mashkral i patslende pre, un penas glan-wi, hoi o Debleskro Ducho leske penas, te well i bari bok pral i tseli phub. Un har o Klaudio o baro rai an o foro Rom his, was kowa jaake.

²⁹Koi penan kol patsle an o foro Antiochia: “Mer dah mare phralen an o them Judea jaake bud lowe, har hakeno nai della.”

³⁰Un jon dan o Barnabes un o Saules kol lowe, te denn jon kol lowe kolende, kai hi i phureder mank i patslende an o them Judea.