Read O Debleskro Drom - I Bibla an o Romano Rakepen 2021 Bitchepangre 15 Bible Online

Bitchepangre 15 - O Debleskro Drom - I Bibla an o Romano Rakepen 2021 bible

Bitchepangre 15

¹Koi wan mursha dran o them Judea an o foro Antiochia tele, un penan kol patslenge, kai kek bibolde hi: “Tumer hunte mukenn tumen ap o mass te tchinell, har o Mose kowa an peskre lila tchinas. Te mukenn tumen gar ap o mass te tchinell, palle nai wenn tumer gar o Debleskre tchawe.”

²Har o Paulo un o Barnabas kowa shunan, penan le kol murshenge: “Hi gar tchatcho, hoi tumer i patslenge penan!” Koi his len i baro tchingepen lentsa. Koi pre penan lenge i phrala, te djan jon dui i wawar phralentsa an o foro Jerusalem pash o Jesuseskre bitchepangre un pash i phureder mank i patslende, te putchenn le lendar, hoi jon pral kowa penenna.

³Un i phrala penan ap o Pauleste un ap o Barnabeste: “Djan o Debleha!” Un kol dui kran pen ap o drom un wan an i themma Fenicia un Samaria. Un kote penan le i menshenge, har kolla, kai kek bibolde hi, patslo wan. Koi pral wan i tsele patsle bachtelo.

⁴Palle was o Paulo un o Barnabas pash i patslende an o foro Jerusalem. Un i phureder un o Jesuseskre bitchepangre his ninna kote, un lan len o djijestar pash pende pre. Un o Paulo un o Barnabas penan lenge, kai o Dewel lentsa his, un har bud koowa job mashkral kolende kras, hoi kek bibolde hi.

⁵His Farisarja koi, kai ap o Jesuseste patslo wan. Kolla penan ap i phralende: “Kolla, kai kek bibolde hi, hunte wenn ap o mass tchinlo, un lenge hunte well penlo, te rikrenn le pen ap o Moseskre laba.”

⁶Un i Jesuseskre bitchepangre un i phureder mank i patslende wan khetne, te rakrenn le pral ko koowa.

⁷Har jon pen i rah tsiro tchingran, stas o Petro pre, un penas: “Mire phrala, tumer djinenna, kai o Dewel rodas man glan rah tsiro win, un kamas, te penap me o latcho lab o Jesus Kristestar kolenge, kai kek bibolde hi. Un kolla shunan un patsan.

⁸O Dewel, kai prindjrell i menshengre djia, sikras mende, kai das job ninna kolen o Debleskro Ducho, kai kek bibolde hi.

⁹Leske hi jon gar wawartchandes har mer, i bibolde. Jon te patsenn ap leste, palle krell lo lengro dji djudjo.

¹⁰Kamenn tumer, te well o Dewel chojedo ap tumende? Ma tchiwenn pharo koowa ap lende, kai nai hidjran mare phure gar, un mer witar gar!

¹¹Mer patsah, te dell men maro rai Jesus ko djipen, hoi gar pre-herella tchitcheske, — kokres dran leskro latchepen. Ninna kolen, kai kek bibolde hi, dell lo kau djipen tchitcheske, — kokres dran leskro latchepen.”

¹²Koi tchingran kol tsele menshe buder gar lentsa, un shunan ap o Pauleste un o Barnabeste, har kolla lenge penan, hawo baro un sorelo koowa o Dewel mashkral kolende kras, kai kek bibolde hi.

¹³Pal lengro rakepen stas o Jakobo pre, un penas: “Mire phrala, shunenn, hoi kamau te penap!

¹⁴O Simon ginas menge dren, hoi o Dewel lauter kras, te wenn ninna kolla, kai kek bibolde hi, leskre menshe, un te wenn le leske koi.

¹⁵Kowa hi ninna an o Debleskro lab tchinlo: O Dewel penas:

¹⁶Pal kowa wau me pale pash tumende, te krap o Davideskro kheer pale newes, kowa, hoi khetne peras.

¹⁷Kowa krau, te putchenn lauter, kai pral atchan, pal mande. Ninna kolla, kai kek bibolde hi, denn man an-gole. Un jon wenn miro, un wenn mange koi.[49]

¹⁸O Dewel krell kowa kanna, hoi job glan i rah tsiro penas.[50]”

¹⁹“Doleske penau me” penas o Jakobo, “mer hunte tchiwas gar o biboldengro tchatchepen ap i patslende, kai kek bibolde hi, te krenn le lauter jaake, har i bibolde krenna.

²⁰Mer tchinah lenge i liil, un penah lenge, te chan le kek mass, hoi was glan i figura anlo, hoi i menshe an-mangenn, har te wals li o Dewel; te sowenn i mursha gar wawar djuwjentsa, witar gar i djuwja wawar murshentsa; te chan le kek mass i viechendar, kai o rat gar win nashas, te pijenn le lendar witar kek rat.

²¹Kowa, hoi o Mose penas, kowa well i menshenge an hake forja penlo. Hako Debleskro diwes wenn o Moseskre laba an i biboldengre kangria glan-drawedo.”

²²O Jesuseskre bitchepangre un i phureder mank i patslende, khetne i tsele patslentsa rodan murshen mashkral i patslende win, te djan jon o Pauleha un o Barnabeha an o foro Antiochia. Kol mursha his o Judas, koles his ninna ko lab Barsabas, un o Silas. Kolla his pralstune mursha mashkral kol patslende.

²³An ko liil, hoi jon peha lan, his tchinlo: “Kau liil tchinan o Jesuseskre bitchepangre un i phureder mank i patslende. Mer ham tumare phrala un tchinah kau liil ap i patslende, kai kek bibolde hi, un kai djiwenna an kol themma Antiochia, Syria un Cilicia.

²⁴Mer shunam, te wan menshe mendar pash tumende, un kran tumen dineles, jaake te lan tumer traash. Djinenn, kolen bitchram mer gar pash tumende.

²⁵Doleske wam mer khetne, un penam jek djijeha: Mer rodah murshen win, un bitchrah len pash tumende. Lentsa wenn ninna mare latche phrala, o Paulo un o Barnabas.

²⁶Kolla hi mursha, kai budrenna maro rajeske, o Jesus Kristeske, un lengri budi leske hi lenge budeder moldo har lengro djipen.

²⁷Kol dui murshen, kai bitchram kanna pash tumende, o Judas un o Silas, kolla penenn tumenge kol emlige laba, hoi mer tchinam:

²⁸O Debleskro Ducho un mer kamah gar tumaro djipen phares te krell. Mer penah tumenge tchi wawar har kawa:

²⁹Chan kek mass, hoi was glan i figura anlo, hoi i menshe an-mangenn, har te wals li o Dewel. Pijenn kek rat! Chan kek mass i viechestar, kai o rat gar win nashas! I murshenge penah, te sowenn le gar wawar djuwjentsa. Un i djuwjenge penah, te sowenn le gar wawar murshentsa. Te rikrenn tumen ap kowa, hi kowa mishto. Atchenn o Debleha!”

³⁰Koi djan le an o foro Antiochia, lan i patslen khetne, un dan len ko liil.

³¹Har kolla ko liil draweran, wan jon lauter bachtelo pral kol laba.

³²O Judas un o Silas his o Debleskre rakepangre. Jon rakran kol patslentsa, un mangan len, te atchenn le an o patsepen. Un lengre labentsa dan jon len soor, te djan jon dureder ap o Jesuseskro drom.

³³Un har jon i tsiro an o foro Antiochia his, mukan kol patsle len te djal. Un jon djan pale an o foro Jerusalem pash kolende, kai bitchran len.

³⁵O Paulo un o Barnabas atchan an o foro Antiochia. Un jon khetne bud wawarentsa sikran i menshende o Jesuseskro drom, un penan lenge, hoi o rai Jesus lenge penas un kras.

³⁶Pal jek tsiro penas o Paulo ap o Barnabeste: “Djas pale pale an kol tsele forja, kai mer o Debleskro lab i menshenge penam! Dikas pal mare phralende an i wawar themma, har lenge djala!”

³⁷O Barnabas kamas ninna o Johanni Markes peha te lell.

³⁸O Paulo penas ap o Barnabeste: “Kowa hi gar mishto, te las o Markes peha. Job mukas men an o them Pamfilia kokres, djas peske, un budras gar mentsa.”

³⁹Un kote tchingran pen o Paulo un o Barnabas pral o Markeste jaake, kai djas hakeno peskro drom. O Barnabas las o Markes peha, un jon uleran ap o shiffo an o them Ciprus.

⁴⁰O Paulo rodas peske o Silases win, un djas peske leha. Un kol patsle penan lenge: “O Dewel djal tumentsa!”

⁴¹Un o Paulo un o Silas djan an i themma Syria un Cilicia, un jon dan i tsele patslen soor an o patsepen.