Read O Debleskro Drom - I Bibla an o Romano Rakepen 2021 Bitchepangre 19 Bible Online

Bitchepangre 19 - O Debleskro Drom - I Bibla an o Romano Rakepen 2021 bible

Bitchepangre 19

¹Har o Apollo an o foro Korint his, djas o Paulo an i themma Galatia un Frigia, un palle was lo an o foro Efesus. Koi hatsas job ninna patslen.

²Ap kolende penas job: “Was o Debleskro Ducho ap tumende, har wan patslo?” Koi penan jon ap leste: “Mer shunam gar, kai hi o Debleskro Ducho kai.”

³Un job putchas lendar: “Ap hoi han tumer taufedo?” Penan jon: “Mer wam jaake taufedo, har o Johanni kowa penas.”

⁴Koi penas lenge o Paulo: “O Johanni taufras kolen, kai kaman te sikrell, kai mukan le pengro phuro djipen. Un job penas i menshenge, te hunte patsenn le ap koleste, kai pal leste wella. Un kowa hi o Jesus.”

⁵Har kol patsle kowa shunan, mukan pen le ap o lab o Jesusestar, maro rajestar, te taufrell.

⁶Un o Paulo tchiwas i wasta ap lende, un o Debleskro Ducho was ap lende. Un jon rakran an wawar rakepen, un penan kowa, hoi o Dewel lende sikras.

⁷Koi his nai deesh-te-dui mursha khetne.

⁸Triin tchon atchas o Paulo kote un rakras an i biboldengri kangri. Un les his kek traash un penas i menshenge i bari sorjah, kai o Dewel o Jesus Kristes bitchras, te lell lo len dran o tchilatchepen win.

⁹Koi his ninna menshe pashel, kai kaman o Jesusestar tchi te djinell un kaman gar ap leste te patsell. Un glan i menshende rakran le djungelo koowa pral o patsepen ap o Jesuseste. Koi mukas o Paulo kol wawar patslentsa i biboldengri kangri, un rakras hako diwes an ko sikepaskro kheer, kai o Tiranno o sikepaskro hi.

¹⁰Kowa kras job dui bersha, te shunan i bibolde un kolla, kai kek bibolde hi, an o them Asia o Debleskro lab.

¹¹Un o Dewel his pash o Pauleste, un job nai kras bud baro un sorelo koowa an o Debleskri soor.

¹²Hi jaake, kai lan i menshe ninna i koola un menjakre dikle, hoi ap o Pauleste his, un tchiwan len ap kol nasslende, un o nasslepen djas lendar. Un i benga djan dran i menshende win, un jon wan sasto.

¹³Kote his bibolde, kai nashan an o them trujel, un tradan i bengen dran i menshende win. Jon kaman ninna an o Jesuseskro lab kol bengen win te tradell, un jon penan ap lende: “Mer penah tumenge an o lab ko Jesusestar, kolestar o Paulo rakrella: Awenn dran ko mensheste win!”

¹⁴Kolla, kai kowa kran, his i efta tchawe i biboldestar. Kowa kharas Skevas un his i baro rashai.

¹⁵Har kaman jon i benges win tradenn, penas job ap lende: “O Jesuses prindjrau me, un o Paulestar shunom ninna. Koon han tumer?”

¹⁶Un ko mursh, kai o beng an leste hi, stas ap lende pre, un das len jaake dawa, kai nashan jon ratles un nanges dran o kheer.

¹⁷I menshe, kai an o foro Efesus djiwan, shunan kowa lauter. Un i bibolde, ninna kolla, kai kek bibolde hi, lan bari traash. Un ko lab o rai Jesusestar was soreles sharedo.

¹⁸Wan ninna bud kolendar, kai patslo wan, un penan glan i menshende, hoi jon tchilatches kran.

¹⁹Bud durkepangre lan pengre lila un chatchran len glan halauterende. Kol lila his nai pantch-deesh serja (50.000) rupene beme moldo.

²⁰Jaake shunan bud un budeder o Jesusestar, maro rajestar. Un job kras, te was peskro lab sorelo mank lende.

²¹Pal kau koowa kamas o Paulo pral i themma Macedonia un Achaja an o foro Jerusalem te djal, un penas: “Un pal kowa hunte dikap me o foro Rom ninna.”

²²Un job bitchras dujen, kai budran leske, o Timotes un o Erastes, an o them Macedonia. Job atchas i tsiro an o them Asia.

²³Ap ko tsiro was i baro tchingepen an o foro Efesus pral o newo patsepen ap o Jesuseste.

²⁴Koi his i mursh, kowa kharas Demetrio. Kowa kras tikne rupene khera, hoi wi-dikan har o kheer, kai mangan i menshe i debletsa an, kai Artemis kharella. O Demetrio anas peske un peskre budepangre bud lowe dren.

²⁵Un job das kol tsele murshen khetne gole, kai kran ninna koi budi, hoi job kras un penas ap lende: “Murshale, tumer djinenna, kai anell men koi budi bud lowe dren.

²⁶Tumer dikan un shunan, kai o Paulo i menshenge penella: I dewel, kai i wastentsa kerdo wella, hi kek dewel. I menshe an o foro Efesus un an o them Asia shunenn ap o Pauleskro rakepen.

²⁷Nai well, te rakrenn le djungelo koowa pral mari budi. Un mari debletsa Artemis, un lakro baro kheer hi lenge buder tchi moldo. I menshe bistrenn lakro railepen, kai well sharedo an o them Asia un ap i tseli phub.”

²⁸Har jon kowa shunan, was i bari choli ap lende, un jon dan gole: “Bari hi i debletsa Artemis an o foro Efesus!”

²⁹Un i tsele menshe an kau foro wan diwjo. Un jon tapran kol dui murshen, o Gajes un o Aristarches, kai wan o Pauleha dran o them Macedonia. Un lauter khetne nashan le an o khelepaskro kheer un tserdan kol dui murshen sorjah peha.

³⁰O Paulo kamas pash kol menshende an o khelepaskro kheer te djal. Leskre mala rikran les pale.

³¹Ninna mank i pralstunende an ko them Asia his mursha, kai ap o Pauleste latcho his. Kolla mukan leske soreles te penell, te djal job gar an o khelepaskro kheer.

³²An kau kheer dan halauter gole. Ko jek das kowa gole un ko wawar das wawartchandes gole. Bud djinan gar, hoske wan le khetne.

³³Mashkral lende his menshe, kolla djan pash o Alexandro, un penan leske, hoske i menshe jaake diwjo hi. Un i bibolde mangan lestar, te rakrell job ap halauterende. Job hadas i wasta pre, te sikrell lo len, kai job kamas te rakrell lentsa.

³⁴Har jon haiwan, kai o Alexandro i biboldo his, dan jon i rah tsiro[55] jaake gole, har te well kowa dran jek mui: “Bari hi i debletsa Artemis an o foro Efesus!”

³⁵Pal kowa har o moskro lenge penas, te mukenn le tele, penas job ap lende: “Murshale an o foro Efesus, hako mensho djinella, kai an maro foro i menshe garda denna ap i bari debletsa Artemis un ap lakro baro kheer. Un ninna djinell hakeno, kai peras koi barreskri debletsa, kai koi tardo hi, dran o bolepen tele.

³⁶Kek nai penella, kai kowa gar tchatcho hi. Kanna atchenn un mukenn! Ma krenn tchomone, hoi khaitell tumen!

³⁷Hoske anan tumer kal menshen kate an o khelepaskro kheer? Jon rakran kek djungele laba pral mari debletsa un tchoran tchi dran lakro kheer.

³⁸O Demetrio un kolla menshe, kai leha khetne budrenn, jon te trashenn, te lenn le buder kek lowe dren, palle nai djan le pash i tchatchepangre un moskre. Kolenge nai penenn le lengro koowa.

³⁹Tumer, te hatsenn wawar koowa ap kal murshende, palle hunte well kowa win kerdo ap i tsillo.

⁴⁰Kau diwes kran tumer i menshen diwjo tchitcheske. Kanna hunte trashas mer, te well kowa glan i tchatchepangre. Un mer nai penah lenge tchi, hoske kram kowa.” Un har job kowa penas, bitchras lo len khere.