Read O Debleskro Drom - I Bibla an o Romano Rakepen 2021 Bitchepangre 2 Bible Online

Bitchepangre 2 - O Debleskro Drom - I Bibla an o Romano Rakepen 2021 bible

Bitchepangre 2

¹Ap i biboldengro baro diwes, hoi kharella Fingsta[5] his jon lauter an jek kheer khetne.

²Ap jek kopo phurdas i sorelo un diwjo ducho dran o bolepen an ko tselo kheer, kai jon khetne his.

³Koi dikan le tchomone, hoi hi har jagakre tchipja. Un ap hakeneste tchiwas pes jek tchip.

⁴Un jon wan lauter pherdo Debleskro Ducho, un rakran an wawar rakepen. Un jon rakran ko rakepen, hoi o Debleskro Ducho len das.

⁵Ap ko tsiro his an o foro Jerusalem bibolde dran bud themma, kai mangan o Debles an.

⁶Har jon ko baro un sorelo ducho shunan, wan jon lauter koi khetne, un kran bare jaka, har hakeno shunas len an leskro rakepen te rakrell.

⁷“Kowa dell gar!” dan i bibolde gole. “Kolla, kai rakrenn kote, hi dran o them Galilea.

⁸Har well kowa, kai jon an maro rakepen rakrenna, har te wans le an maro them boldo?

⁹Mer wah dran i themma Partia, Media, Elam, Mesopotamia, Judea, Kappadocia, Pontus, Asia[6], Frigia, Pamfilia, Egiptia, dran o foro Kirene, kai hi an o them Libia, un ninna dran o foro Rom.

¹⁰

¹¹Wawar mendar wan dran i themma Arabia un Kreta. Mer shunah len an maro rakepen te rakrell, hawo baro koowa o Dewel kras!”

¹²Un i bibolde dan i wasta pral o shero khetne, un djinan gar buder, hoi kowa hi. Un jek putchas i wawarestar: “Hoi well kowa?”

¹³Wawar san len win, un penan: “Kol mursha hi mato!”

¹⁴Koi stas o Petro un kol wawar deesh-te-jek Jesuseskre bitchepangre pre, un o Petro das gole, un penas ap i biboldende: “Murshale dran o them Judea, un tumer tsele wawar, kai djiwenn kanna an o foro Jerusalem, me kamau tumenge te penell, hoi kate lauter djala kolentsa, kai rakrenna an wawar rakepen. Shunenn, hoi tumenge penau!

¹⁵Kol mursha hi gar mato, har tumer penenna. Hi enjenge taissarlake.

¹⁶Kowa, hoi tumer kate dikenna, penas o Debleskro rakepaskro Joel glan i rah tsiro:

¹⁷Ko tsiro wella, penell o Dewel, kai me tchiwau miro Debleskro Ducho ap i tsele menshende. Un tumare tchawe un tcha dikenn nai glan-wi, hoi wella. Un i terne mursha dikenn kowa, hoi o Dewel len sikrell, un i phure mursha denn suni.

¹⁸Ninna ap mire budepangre, mursha har djuwja, tchiwau me miro Debleskro Ducho. Un jon penenn i menshenge mire laba.

¹⁹Un me kamau baro un sorelo koowa te krap, an o bolepen un ap i phub. Tumer dikenn rat, un jag, un tampa.

²⁰O kham well kalo, un o tchon well lolo har o rat.[7] Koi djinenn tumer, te well ko baro diwes sik, kai well o rai Jesus pale.

²¹Un koon ap leste gole della, koles lell lo dran o tchilatchepen un o merepen win.

²²Murshale dran Israel, shunenn kal laba, hoi penau tumenge! O Dewel bitchras ko murshes, o Jesuses dran Nazaret, pash tumende. Kowa kras baro un sorelo koowa mank tumende, hoi kek wawar nai krella. Jaake sikras o Dewel, kai o Jesus lestar was. Tumer djinenn kowa, un dikan kowa lauter.

²³Tumer dan o Jesuses an i wasta kolendar, kai gar ap o Debleste patsenna. Un kolla dan les ap o trushel, un kote meras job. Un hoi tumer leha kran, kowa his jaake glan-diklo o Deblestar.

²⁴Ko Jesuses kras o Dewel djido. Job las les i mulendar win, un kek soor nai rikras les pash i mulende pale.

²⁵Ninna o David rakras o Jesusestar, har job penas: Me dikau hako tsiro ap o Debleste, miro rajeste. Job dell man soor, te rikrap man ap leste.

²⁶Doleske hom me bachtelo an o dji un me giwau. Ninna te merau, djinau:

²⁷Tu mukeh man gar pash i mulende, un kameh gar, te merell miro mass tele.

²⁸Tu sikral mange ko drom, hoi dell man o djipen. Un pash tute hom me bachtelo.” [8]

²⁹Un o Petro penas dureder ap lende: “Murshale, mire phrala, mukenn man tumenge te penell, hoi man ap o dji hi. Maro baro rai David meras, un was paskedo. Leskro mulengro kheer nai dikenn tumer kau diwes.

³⁰O David his i Debleskro rakepaskro, kai nai dikas glan-wi, hoi wella. O David djinas, hoi o Dewel leske penas, te well jek pal leste, hoi well o baro rai. Un kowa wella leskre menshendar. O Dewel das pes sowel, te well kowa jaake.

³¹Un o Dewel mukas o David glan-wi te dikell, kai o Jesus Kristo i mulendar pre stella. Lestar penas o David, te atchell job gar pash i mulende, un te ferdjal gar leskro mass.

³²Kau Jesuses mukas o Dewel i mulendar pre te stell. Kowa djinah mer. Mer halauter dikam les djido.

³³Un o Dewel kras les rai pral halauter, un tchiwas o Debleskro Ducho ap leste, jaake har job penas. Un ko Debleskro Duches tchiwas o Jesus ninna ap mende. Kawa shunenn un dikenn tumer kate.

³⁴O David djas gar pre an o bolepen. Jaake rakras job gar pral peste, har job penas: O Dewel penas ap miro rajeste: Besh tut ap miri tchatchi rig,

³⁵bis te tchiwau kolen tel tire pire, kai kamenn tut gar.[9]

³⁶I tsele menshe an Israel hunte djinenna, o Dewel kras, te hi kau Jesus, koles tumer ap o trushel dan, o rai pral halauter. Job hi ko baro rai, kolestar o Dewel penas, te well job.”

³⁷Har kol menshe kowa shunan, djas lenge kowa an lengro dji. Un jon putchan o Petrestar un kol wawar Jesuseskre bitchepangrendar: “Murshale, mire phrala, hoi kras mer?”

³⁸Koi penas o Petro ap lende: “Tumer anan doosh[10] ap tumende. Mangenn tumen tele glan o Debleste! Un mukenn tumen ap o Jesus Kristeskro lab te taufrell, te lell o Dewel tumari doosh tumendar tele, un te lenn tumer o Debleskro Ducho!

³⁹O Dewel penas, te dell lo peskro Ducho tumende, un tumare tchawende, ninna kolende lauterende, kai kanna dur lestar hi, un kai job pash peste gole della.”

⁴⁰Un bud wawar labentsa rakras o Petro lentsa, un mangas len, un penas ap lende: “Mukenn tumen win te lell dran o tchilatchepen, te lenn gar koi phagi, hoi well pral kal tchilatche menshende, kai djiwenn an kau tsiro.”

⁴¹Kolla, kai lan leskre laba an pengro dji pre, mukan pen te taufrell. Un ap ko diwes wan triin serja menshe ap o Jesuseste patslo.

⁴²Un hako tsiro wan le khetne un shunan, hoi o Jesuseskre bitchepangre lenge penan. Un jon chan o maro khetne, un mangan o Debles an.

⁴³Un o Jesuseskre bitchepangre kran bud baro un sorelo koowa, hoi kek wawar nai krella. Un i traash was pral i menshende.

⁴⁴Kolla, kai patslo wan, atchan lauter khetne. Un jon tchiwan pengro tselo brawlepen khetne, un kowa his lauterenge koi.

⁴⁵Jon bikran kowa, hoi len his, i kotar phub un wawar kutch koowa, un dan les kol patslende, kai len tchi his.

⁴⁶Hako diwes wan le khetne an o Debleskro baro kheer. Jon chan o maro khetne an i khera. Un jon his bachtelo, te dan jon nai i phralen ninna te chal. Kowa kran le o djijestar.

⁴⁷Jon sharan o Debles, un i tsele menshe dikan latches ap lende. Un hako diwes wan wawar menshe koi pashel, hoi patslo wan.