Read O Debleskro Drom - I Bibla an o Romano Rakepen 2021 Bitchepangre 20 Bible Online

Bitchepangre 20 - O Debleskro Drom - I Bibla an o Romano Rakepen 2021 bible

Bitchepangre 20

¹Har i menshe buder gar diwjo his, das o Paulo i patslen pash peste gole, un das len soor an lengro patsepen. Palle penas lo lenge: “Atchenn o Debleha!” un djas peske, te djal lo an o them Macedonia.

²Kote djas lo an i gaba un forja, kai i patsle khetne wenna, un das len soor an lengro patsepen. Koi pal was lo an o grichtikro them.

³Har job triin tchon an kau them his, kamas lo ap o shiffo an o them Syria te ulerell. Koi shunas lo, kai kamenn i bibolde les te marell. Doleske djas lo pale pale an o them Macedonia.

⁴Khetne leha djas ninna o Sopater dran o foro Berea, leskro dad his o Pirro. Dran o foro Tessalonika djas ninna o Aristarcho un o Sekundo lentsa. Dran o foro Derbe was o Gajo lentsa. Ninna o Timoteo djas lentsa. Un o Tichiko un o Trofimo wan dran ko them Asia lentsa.

⁵Kolla uleran glan-wi, un atchan an o foro Troas, bis te wam ninna kote.

⁶Har i diwessa trujel his, kai i bibolde kek shutlo maro chan, uleram mer ap o shiffo dran o foro Filipi win, un wam pal pantch diwessa an o foro Troas. Kote atcham efta diwessa.

⁷Ap o kurko[56] wam mer khetne, te phagas o maro. Un o Paulo penas o Debleskro lab i menshenge. Un o wawar diwes kamas job ap o shiffo dureder te ulerell. Doleske rakras job jaake rah bis deesh-te-dujenge an i rati.

⁸An koi pralstuni isema, kai mer khetne hams, his bud momlia.

⁹Pash i wochni his i terno mursh beshdo. Kowa kharas Euticho. Har o Paulo jaake rah rakras, sowas o Euticho dren, un peras dran i pralstuni wochni ap i phub. Un har jon les pre hadan, his job mulo.

¹⁰O Paulo djas tele, tchiwas pes ap leste, tapras les trujel, un penas: “Ma trashenn! Job djiwella.”

¹¹Koi djas o Paulo pale pre, phagas o maro, chas les lentsa, un rakras i tseli rat lentsa, un palle djas lo peske.

¹²Un kol wawar anan kol terno murshes djides pale an o kheer, un lauter his bachtelo.

¹³O Paulo kamas kokres o tselo drom an o foro Assos te nashell. Mer wawar djam lauter ap o shiffo, un uleram glan-wi an o foro Assos. Kote kamam mer o Paules ap o shiffo te lell. Jaake kamas o Paulo kowa mendar.

¹⁴Har job men an o foro Assos tapras, lam les mer pash mende, un palle djam mer khetne an o foro Mitilene.

¹⁵O wawar diwes wam pash o foro Kios. Palle wam an o foro Samos. Un i diwes koi pal wam an o foro Milet.

¹⁶O Paulo kamas gar an o foro Efesus te djal, te nashrell lo an ko them Asia kek tsiro. Job kamas jaake sik har djala an o foro Jerusalem te djal, te well lo kote ap o baro diwes, kai kharella Fingsta.

¹⁷Har hams an o foro Milet, bitchras o Paulo jek phrales an o foro Efesus, un mukas kol phureden mank i patslende gole te dell, te wenn le pash leste.

¹⁸Har jon pash o Pauleste wan, penas lo ap lende: “Tumer djinenna, har djiwom un hoi krom o tselo tsiro, har homs pash tumende an o them Asia.

¹⁹Me krom man gar bareder har me hom. Me hom o rai Jesuseske koi. His mange jek, te djal mange djungeles. I bibolde lan man palla, un bud kope his mange ropaske.

²⁰Man his kek daar, te penap tumenge o tselo tchatchepen, har me tumende o Debleskro drom sikrom. Un me penom o Debleskro lab an tumare khera.

²¹Me penom i biboldenge un kolenge, kai kek bibolde hi, te mukenn le pengro tchilatcho drom, un te djan le ap o Debleskro drom, un te patsenn le ap maro rajeste, o Jesuseste.

²²Un kanna penell mange o Debleskro Ducho, te djap an o foro Jerusalem. Un me hunte shunap ap leste. Hoi i bibolde an o foro Jerusalem mantsa krenna, kowa djinau gar.

²³O Debleskro Ducho penas mange an hako foro, kai djom, kai wau stildo un kai duka ap mande wenna.

²⁴Me dau tchi buder ap miro djipen. Jek koowa kamau me an miro djipen te krell: Me kamau koi budi te krell, hoi das man maro rai Jesus: Job penas mange, te penap i menshenge, har latcho o Dewel lenge hi, un har kras job i drom, te nai wenn le pash leste.

²⁵Me djom pash bud menshende un penom lenge, te dell o Dewel len pash peste gole, te lell lo len dran o tchilatchepen win. Kanna shunenn: Me djinau, kai dikenn tumer halauter man buder gar pale.

²⁶Jek penau tumenge kau diwes: Man hi kek doosh, te djal jek tumendar nashedo.

²⁷Me mukom gar tele, te penap tumenge halauter, hoi o Dewel tumenge kras.

²⁸Denn garda ap tumende un ap kol tsele patslende! Kolen ginas o Dewel peskro tchaweskro rateha. O Debleskro Ducho das len an tumare wasta, te denn garda ap lende. Tumer han lengre bakrengre.

²⁹Me djinau, te hom me gar buder koi, wenn diwje djukle pash tumende un marenn bud tumendar.

³⁰Ninna dran tumende wenn mursha, kai penenn i patslenge chochene laba, hoi gar o Deblestar wella. Un jon tserdenn i patslen ap pengri rig.

³¹Doleske denn jak! Un rikrenn tumare jaka pre! Triin bersha homs me pash tumende, un rowom hako diwes un haki rat ap tumende, te krenn tchi, hoi gar mishto hi an o Debleskre jaka. Ma bistrenn kowa!

³²Me tchiwau tumen kanna an o Debleskro wast, te dell job jak ap tumende. Atchenn pash o Debleste un pash leskro lab! Leskro lab sikrell tumende o Debleskro latchepen. Les hi i soor, te krell lo tumen soreles an o patsepen. Un o Dewel dell tumen jek brawlepen an o bolepen. Kowa hi o djipen, hoi gar pre-herella. Kowa dell job lauterende, kai leskre tchawe hi.

³³Tumer djinenna: Me mangom kekestar tumendar tchomone: kek sonakai, kek rup, kek an-ripaske. Mire wastentsa budrom, te well man un kolen, kai pash mande hi, te chal.

³⁵Jaake sikrom tumende, kai hunte budras, te nai dah ninna i tchorwelende tchomone. Ma bistrenn kol laba, hoi o rai Jesus penas: Kowa, kai della, hi bachtleder har kowa, kai lella.”

³⁶Har o Paulo kowa penas, djas lo lauterentsa ap i tchanga[57] un mangas o Debles lenge.

³⁷Koi rowan le lauter soreles, tapran les trujel un tchumran les.

³⁸Ko lab, hoi o Paulo penas, te dikenn le les buder gar pale, kras len bare duka an o dji. Palle djan le leha pash o shiffo.