Read O Debleskro Drom - I Bibla an o Romano Rakepen 2021 Bitchepangre 22 Bible Online

Bitchepangre 22 - O Debleskro Drom - I Bibla an o Romano Rakepen 2021 bible

Bitchepangre 22

¹Tumer mursha, phrala un dada, shunenn, hoi kamau tumenge te penell!

²Har jon shunan, kai rakrell job hebretikes, dan le buder gar gole. Un job penas:

³Me hom i biboldo, un wom boldo an o foro Tarsus, an ko them Cilicia. Baro wom an o foro Jerusalem. Miro sikepaskro his o Gamalijel. Kowa sikras mande, te djiwap jaake, har mare phure djiwan. Jaake har tumer pal o Moseskre laba djiwenna, djiwom me ninna o tselo djijestar.

⁴Me lom kolen palla, kai djan ap o newo drom — me lom len jaake palla, te marom len. Murshen un djuwjen pandom, un witsrom len an o stilepen.

⁵Ko baro rashai un kol tsele biboldengre phureder nai penenn, kai kowa tchatcho hi, hoi penau kate. Har kamom an o foro Damaskus te djal, dan man i rashaja lila peha i biboldenge an o foro, te nai pandap ninna kote kolen, kai djan ap ko newo drom, te anap len an o foro Jerusalem, te lenn le kote pengri phagi.

⁶Jaake djom ap o drom an o foro Damaskus. Har me homs i paash diwes glan o foro Damaskus, was ap jek kopo i bari momeli dran o bolepen trul mande.

⁷Me perom ap i phub, un shunom, har jek ap mande penas: Saulo, Saulo, hoske leh tu man palla?

⁸Me penom: Koon hal tu, mo rai? Un job penas ap mande: Me hom o Jesus dran Nazaret, koles tu palla leh.

⁹Kolla mursha, kai pash mande his, dikan nai koja momeli. Jon shunan gar kol laba, hoi job ap mande penas.

¹⁰Me putchom: Rai, hoi krap? Un o rai penas ap mande: Ste pre un dja an ko foro Damaskus! Kote well tuke penlo, hoi tu hunte kress.

¹¹Koi bari momeli his jaake sorelo, kai kras li man korelo. Un kolla, kai pash mande his, lan man ap o wast, un anan man an o foro Damaskus.

¹²Koi his i patslo mursh. Kowa kharas Anania. Job rikras pes ap kowa, hoi an o Moseskre lila tardo hi. Kowa his an-diklo pash i tsele biboldende, kai kote djiwan.

¹³Kowa was pash mande un penas: “Miro phraal Saulo, tu dikess pale.” Un ap jek kopo dikom me pale.

¹⁴Palle penas lo ap mande: “Ko Dewel mare dadendar rodas tut win, te djiness tu, hoi job kamella, un te dikess tu koles, kai hi kek tchilatchepen an leste, un shuness, hoi job penella.

¹⁵Tu hunte rakress lestar glan i tsele menshende un peness, hoi tu dikal un shunal.

¹⁶Un kanna ste pre! De leskro lab an-gole! Un muk tut te taufrell, un tiri doosh tele te thowell!”

¹⁷Har me pale an o foro Jerusalem wom, un an o Debleskro baro kheer o Debles an-mangom, was o Debleskro Ducho soreles ap mande.

¹⁸Un me dikom o Jesuses, un job rakras ap mande: Dja jaake sik har djala dran o foro Jerusalem. Kal menshe kate patsenn gar, hoi tu pral mande peneh.

¹⁹Me penom: Rai, jon djinenna, kai me kolen, kai ap tute patsenn, an o stilepen witsrom, un me mukom len an i biboldengre kangria i tchupnijah te dell.

²⁰Me homs bachtelo, har maran le o Stefanes, koles, kai tutar rakras. Me homs pashel tardo, har maran le les. Un kolla, kai maran les, ap kolengre koola dom jak.

²¹O rai Jesus penas ap mande: Dja dran o foro Jerusalem win! Me bitchrau tut an i wawar themma pash kolende, kai kek bibolde hi.

²²Har kol tsele menshe o Pauleskre laba shunan, dan le lauter gole: “Anenn les krik un denn les mulo!”

²³Jon dan bari gole, tserdan pengre koola i choljatar pendar tele un witsran tchik an o bolepen.

²⁴Koi penas ko baro lurdo, te anenn le o Paules an o lurdengro kheer, un te denn le les dawa i tchupnijah[60], te penell job, hoske kol bibolde jaake chojemen ap leste hi.

²⁵Har jon les pandan, te denn le les i tchupnijah, penas o Paulo ap ko baro lurdeste, kai kote pashel tardo hi: “Nai denn tumer jekes i tchupnijah, kai hi i Remari, un was gomme gar glan i tchatchepangre anlo?”

²⁶Ko baro lurdo djas pash peskro pralstuneste, un penas ap leste: “Hoi kameh te krell? Kau mursh hi i Remari.”

²⁷Koi djas ko pralstuno pash o Pauleste, un putchas lestar: “Pen mange: Hal tu i Remari?” Penas lo: “Awa!”

²⁸Koi penas ko pralstuno: “Me dom bud lowe, te wap i Remari.” Penas o Paulo: “Me wom jaake boldo.”

²⁹Un kolla, kai kaman les dawa te dell, djan penge sik. Un ko pralstuno daras, har shunas lo, kai hi o Paulo i Remari, un te mukas lo i Remares te pandell.

³⁰O wawar diwes kamas o pralstuno lurdo win te hatsell, hawi doosh kol bibolde ap o Pauleste pre anan. Un job las les dran o stilepen win, un penas, te wenn kol bare rashaja un kol tsele pralstune bibolde khetne. Un job anas o Paules glan lende.