Read O Debleskro Drom - I Bibla an o Romano Rakepen 2021 Bitchepangre 25 Bible Online

Bitchepangre 25 - O Debleskro Drom - I Bibla an o Romano Rakepen 2021 bible

Bitchepangre 25

¹Pal triin diwessa djas o Festo dran o foro Cesarea an o foro Jerusalem.

²Kote wan kol bare rashaja un kol pralstune bibolde pash leste, un anan doosh ap o Pauleste pre.

³Un jon mangan o Festestar soreles, te krell lo lenge i latchepen, te mukell lo o Paules an o foro Jerusalem te anell. Mank pende kran i bibolde win, te marenn le o Paules ap o drom an o foro Jerusalem.

⁴Koi penas o Festo ap lende: “O Paulo atchell an o foro Cesarea stildo! Me djau an i tikno tsiro kote pale.

⁵Kolla, kai len pash tumende tchomone penepaske hi, kolla wenn mantsa, un nai penenn mange kote, hawi doosh job ap peste anas.”

⁶O Festo atchas ochta diwessa an o foro Jerusalem. Pal kowa djas lo pale an o foro Cesarea. O wawar diwes beshas pes lo ap ko beshepaskro, kai o tchatchepaskro rai beshdo hi, un mukas o Paules glan peste te well.

⁷Har o Paulo glan leste was, his trul leste kol tsele bibolde tardo, kai dran o foro Jerusalem wan. Kolla anan bud tchilatcho koowa glan, hoi job krals. Un kek nai penas, kai o Paulo kowa tchatchepah kras.

⁸O Paulo mukas kowa gar ap peste, un penas: “Me krom tchi, hoi pal o biboldengro tchatchepen tchilatcho hi. Un me krom gar o Debleskro baro kheer praassedo. Un me penom kek tchilatcho koowa pral o baro rajeste an o foro Rom.”

⁹O Festo kamas tchomone te krell, hoi hi mishto an i biboldengre jaka. Doleske penas lo ap o Pauleste: “Kameh tu, te anap tut an o foro Jerusalem, te penap kote i phagi pral tute win?”

¹⁰O Paulo penas ap leste: “Me hom kate glan o tchatchepaskro tardo, koles o baro rai an o foro Rom an peskri budi tchiwas. Kote hunte well o tchatchepen pral mande win kerdo. I biboldenge krom kek tchilatcho koowa. Un kowa djineh tu mishto!

¹¹Te kroms me i tchilatcho koowa, kai hunte marans le man, mangoms tutar gar, te atchap djido. Te krom me kowa gar, hoi jon pral mande penan, palle nai tchiwenn tumer man gar an lengre wasta. Me kamau, te well miro koowa glan o baro rajeste an o foro Rom.”

¹²Koi rakras o Festo kolentsa, kolen leha khetne penepaske hi. Palle penas lo ap o Pauleste: “Pash o baro rajeste an o foro Rom kameh tu te djal. Palle dja pash leste!”

¹³Pal budeder diwessa, was o biboldengro baro rai Agrippa[64] peskri phenjah Bernike an o foro Cesarea, te djan le pash o Festeste.

¹⁴Un jon atchan budeder diwessa koi. Un o Festo rakras leha pral o Pauleste un leskro koowa, un penas ap leste: “O Felix, kai kras koi budi glan mande, mukas mange i murshes kate an o stilepen.

¹⁵Har me an o foro Jerusalem homs, wan kol bare rashaja un kol biboldengre phureder glan mande, un mangan mandar, te dap les i phagi.

¹⁶Kolenge penom: Jaake krah mer Remarja kowa gar. Mer dah kekes i phagi, kai dikas kolenge gar an o mui, kai anan doosh ap leste pre. Job hunte penas nai, har job ko koowa dikella.

¹⁷Un har jon kate khetne wan, nashrom kek tsiro. O wawar diwes mukom kau murshes glan mande te anell, te shunap les.

¹⁸Har kol bibolde penan, hawi doosh jon ap leste hatsan, his kowa kek sawo tchilatcho koowa, har me patsom.

¹⁹Jon tchingran pen pral o biboldengro patsepen un pral i mursheste, kai kharas Jesus, un kai meras. Un kolestar penas o Paulo, te hi lo djido.

²⁰Me prindjrau man an ko koowa gar win. Doleske putchom me o Paulestar, te kamell lo an o foro Jerusalem te djal, te well kote o tchatchepen pral leste wi-rakedo.

²¹Kowa kamas lo gar. Job kamas, te anap les glan o baro rajeste an o foro Rom, te lell lo kolestar peskro tchatchepen. Jaake rah kamas lo stildo te atchell. Koi penom me, te rikrenn le les kate stildo jaake rah, bis te bitchroms nai les pash o baro rajeste an o foro Rom.”

²²O Agrippa penas ap o Festo: “Me kamau ko murshes ninna te shunell.” Koi penas o Festo ap leste: “Taissar shuneh les.”

²³O wawar diwes was o Agrippa un i Bernike railes an-rido an o shukar baro kheer, kai i pralstune khetne wenna. Un kol pralstune lurde, un wawar foreskre pralstune wan lentsa kote khetne. Un o Festo mukas o Paules gole te dell.

²⁴Un o Festo penas: “Baro rai Agrippa un tumer lauter, kai han mentsa kate: Dikenn kau murshes! I tsele bibolde an o foro Jerusalem un an kau foro wan pash mande un dan gole: Mare les!

²⁵Me hatsom tchi ap leste, te nai marap les. Job kokres kamell pash o baro rajeste an o foro Rom te djal. Un jaake penom, te well lo kote anlo.

²⁶Me hunte tchinap i liil o baro rajeske an o foro Rom, te penap leske, hawi doosh kau mursh ap peste anas. Un me djinau gar, hoi te tchinap. Doleske anom les kate glan tumende lauterende, un glan tute, baro rai Agrippa, te shunap, hoi job tuke penella. Jaake djinau me, hoi hunte tchinap.

²⁷Kowa wals dinlepen, te bitchroms i stildes pash o baro rajeste an o foro Rom, un nai penau leske gar, hawo tchilatcho koowa job kras.”