Read O Debleskro Drom - I Bibla an o Romano Rakepen 2021 Bitchepangre 26 Bible Online

Bitchepangre 26 - O Debleskro Drom - I Bibla an o Romano Rakepen 2021 bible

Bitchepangre 26

¹O Agrippa penas ap o Pauleste: “Tu nai rakreh kanna tuke.” Koi hadas o Paulo o wast, un penas:

²Baro rai Agrippa, me hom bachtelo, te nai penap tuke kau diwes lauter, hoi i bibolde ap mande pre anan.

³Me djinau, kai tu prindjreh o biboldengro patsepen. Tu djineh, har i bibolde djiwenna. Un tu djineh ninna pral hawo koowa jon pen tchingrenna. Doleske mangau tutar: De man ko tsiro, te penap tuke halauter!

⁴I tsele bibolde prindjrenn miro djipen, un har me i terno tchawo homs, un har me mashkral mire menshende an o foro Jerusalem djiwom.

⁵Jaake rah prindjrenn le man. Un jon te kamenn, palle nai penenn le tuke, kai homs i Farisari, un rikrom man o tselo djijeha ap i phurengre laba un ap o Moseskre laba.

⁶Un me patsau ap kowa, hoi o Dewel mare phurenge penas. Doleske hom me kate glan o tchatchepaskro tardo.

⁷Mare menshe, kai wenna i deesh-te-dui Israeleskre tchawendar, kolla mangenn o Debles diwes un rati, te well kowa, hoi job mare phurenge penas. Baro Agrippa, me patsau, kai kowa was, kolestar o Dewel penas, te well job. Doleske kamenn man i bibolde i phagi te dell.

⁸Hoske patsenn tumer gar, te krell o Dewel i mulen djides?

⁹His i tsiro, kai kamom me ninna miri tseli sorjah kau newo patsepen ap o Jesuseste dran Nazaret paash te krell.

¹⁰Kowa krom me an o foro Jerusalem, un anom bud patslen an o stilepen. Kol bare rashaja dan an miro wast, te krap kowa. Un har kaman le len te marell, penom me ninna: Awa, krenn kowa!

¹¹An i tsele biboldengre kangria mukom me kol patslen dawa te dell i tchupnijah, un kamom, te denn le pengro patsepen pre. Me homs jaake chojedo ap lende, te lom len ninna an forja an wawar themma palla.

¹²Jaake bitchran man i bare rashaja an o foro Damaskus, un dan man lila mantsa, te nai taprau i patslen kote.

¹³Me homs ap o drom, baro Agrippa, har dikom mashkral o diwes i bari momeli dran o bolepen. Un koja was trul mande un trul kolende, kai pash mande his. Koi momeli his sorleder har o kham.

¹⁴Un mer lauter peram ap i phub. Un me shunom jekes, kai penas ap hebretikes ap mande: Saulo, Saulo, hoske leh tu man palla? Tiro kurepen hi tchitcheske. Me hom sorleder har tu.

¹⁵Me penom: Rai, koon hal tu? O rai penas: Me hom o Jesus, koles tu palla leh.

¹⁶Ste pre un atch ap tire pire tardo! Me mukom man tutar te dikell, te wess miro budepaskro, un te peness i menshenge, hoi tu dikal. Un lauter, hoi me tut sikrau, hunte peness.

¹⁷Me bitchrau tut pash i biboldende un pash kolende, kai kek bibolde hi, un me dau garda ap tute.

¹⁸Tu kress lenge i jaka pre, te wenn jon dran o tamlepen[65] pash i momeli, te less len dran o bengeskro wast win, un te aness len pash o Debleste. Te patsenn le ap mande, palle lell o Dewel lengri doosh lendar krik. Un jon wenn o Debleskre tchawe, un djiwenn leha an o bolepen khetne lauterentsa, kai Debleskre tchawe hi.

¹⁹Doleske krom kowa, baro Agrippa, hoi ko rakepen dran o bolepen mange penas.

²⁰Me djom an o foro Damaskus, un palle an ko foro Jerusalem. Un i tsiro koi pre djom an ko them Judea. Un pal kowa djom pash kolende, kai kek bibolde hi, un penom lauterenge, te mukenn le pengro tchilatcho drom, un te djan le ap o Debleskro drom, un te djiwenn le jaake, kai i wawar dikenna, kai jon pengro phuro djipen mukan.

²¹Doleske tapran man kol bibolde an o Debleskro baro kheer, un kaman man te marell.

²²O Dewel his hako diwes pash mande. Un kanna hom kate tardo, un penau barenge un tiknenge, hoi o Dewel kras. Me penau tchi wawares, har kol Debleskre rakepangre un o Mose glan i rah tsiro penan.

²³Kolla penan: Ko baro rai, koles o Dewel bitchrella, hunte lell bud duka ap peste, un hunte well maredo. Un job hi o ersto mensho, koles o Dewel i mulendar djido kras. Un job sikrell i biboldende un kolende, kai kek bibolde hi, i bari momeli, hoi anell len dran o tchilatchepen un o merepen win.

²⁴Har o Paulo kowa rakras, te sikrell lo, kai hi kek doosh ap leste, das o Festo gole: “Paulo, tu hal dinelo! Tu hal jaake gosewo, te wal narwelo.”

²⁵O Paulo penas: “Railo Festo, hom gar narwelo! Hoi me rakrau, hi tchatcho un kek dinlepen.

²⁶O baro rai Agrippa djinell kowa lauter. Man hi kek traash, te rakrap leha pral halauter. Me djinau, job shunas kowa lauter. Kowa, hoi koi djas, atchas gar khatedo.

²⁷Patseh tu, baro rai Agrippa, hoi kol Debleskre rakepangre penan? Me djinau, kai tu kolen patseh.”

²⁸Koi penas o Agrippa ap o Pauleste: “Rakreh tu kate ap mande, te djap me ninna ap o Jesuseskro drom, un kawa an sawo tikno tsiro?”

²⁹O Paulo penas ap leste: “Tikno tsiro, rah tsiro, — me mangau o Debles, te wess tu un kol tsele wawar, kai man kate shunan, patslo har me patslo hom. Hoi gar kamau, hi, te wess pandlo, har me.”

³⁰Un o baro rai Agrippa peskri phenjah Bernike, un o themeskro rai Festo, un kolla, kai pash lende beshdo his, stan pre.

³¹Har jon penge djan, rakran jon tel pende: “Kau mursh kras tchi, te hunte well lo maredo, witar tchi, te well lo stildo.”

³²O Agrippa penas ap o Festo: “Kau murshes mukams mer nai dran o stilepen win te djal, te penals job gar, te kamell lo glan o baro rajeste an o foro Rom te djal, te rakrell kowa o tchatchepen pral leste win.”