Read O Debleskro Drom - I Bibla an o Romano Rakepen 2021 Bitchepangre 27 Bible Online

Bitchepangre 27 - O Debleskro Drom - I Bibla an o Romano Rakepen 2021 bible

Bitchepangre 27

¹Har kran le win, te ulerah mer ap o shiffo[66] an o them Italia, dan le o Paules un wawar stilden an i wasta i baro lurdestar. Leskro lab his Julio. Kowa his i pralstuno pral kol lurdende, kai o baro rajeskre lurde kharedo wenna.

²Mer djam ap o shiffo. Kowa was dran o foro Adramitsjon un uleras an kol forja, kai pash o pani an o them Asia tchiddo hi. Mentsa was ninna i mursh dran o foro Tessalonika. Leskro lab his Aristarcho.

³O wawar diwes wam an o foro Sidon. O Julio his kamlo ap o Pauleste, un mukas les pash peskre malende te djal, te wenn kolla leske koi.

⁴Har mer dureder uleram, phurdas i baro ducho pral o baro pani. Doleske uleram mer ap koi rig ko themestar Ciprus, kai ko baro ducho gar jaake soreles phurdas.

⁵I themma Cilicia un Pamfilia mukam mer tchatches tchiddo, un wam an ko them Licia an o foro Mira.

⁶Koi hatsas ko baro lurdo i shiffo, hoi was dran o foro Alexandria, un kamas an o them Italia te ulerell. Un mer djam ap ko shiffo.

⁷Bud diwessa wam gar sik dureder, un maram men tele, te was pash ko foro Knidus. O baro ducho phurdas jaake soreles pral o pani, te nashte djam gar, kai kamam. Jaake uleram pash o them Kreta, un dureder trul ko kotar them, kai kharella Salmone.

⁸Menge his phares, te was dureder. Palle wam ap i wawar rig, kai kharella Latchi platsa. Koi pashel hi o foro Lasea tchiddo.

⁹Har kote wam, nashram bud tsiro. O wend his glan o wudar, un mer lam daar, te uleras dureder. Doleske penas o Paulo ap lende:

¹⁰“Murshale, te ulerah mer ap o pani dureder, dikau me, te wella bud bibacht ap mende. Gar kokres o shiffo nai djal paash un kowa, hoi koi pre hi, djal nashedo. Ninna bud mendar nai tassenn.”

¹¹Ko baro lurdo shunas budeder ap koleste, kai ulerell ko shiffo un ap koleste, kai hi o rai pral ko shiffo, har ap o Pauleste.

¹²Kote, kai maro shiffo tchiddo his, his gar mishto, te atchas mer pral o wend. Doleske kaman i budester mursha dureder te ulerell, te wenn jon glan o wend an o foro Fenix. Kawa his o feteder foro an o them Kreta, kai jon nai atchans pral o wend.

¹³Har i latcho baro ducho[67] phurdas, patsan le, kai ko tsiro was, te nai ulerams dureder. Un jon uleran, jaake neesh har djala, langs ko them Kreta.

¹⁴Pal i tikno tsiro phurdas o baro ducho soreles dran i wawar rig. Ko ducho kharella Eurakulon.

¹⁵Kau sorelo ducho tapras o shiffo, un mer nai rikram les buder gar, jaake sorelo his lo. Koi mukam mer o shiffo jaake te djal, har ko baro ducho kowa kamas.

¹⁶Mer uleram dureder ap o pani pash ko them Kauda, un mer maram men tele, te nashras gar o tikno bero[68].

¹⁷Jon tserdan les pre, un palle pandan le shelle trul o tselo shiffo, te djal lo gar paash. Halauter daran, te nai ulerals o shiffo ap i barra, kai glan o them Libia tel o pani hi. Doleske witsran le ko sasterno shello an o pani tele, hoi rikrell o shiffo pale, te djal lo gar jaake sik. Un jon mukan o shiffo jaake te djal har o baro ducho les pral o pani phurdas.

¹⁸Ko baro ducho phurdas jaake soreles, kai witsran le o wawar diwes bud koowa an o pani, hoi kaman le an wawar forja te anell.

¹⁹O triinto diwes witsran jon kowa an o pani, hoi ap o shiffo his, te nai ulerell lo.

²⁰Bud diwessa nai dikam o kham un i bolepangre momlia gar, jaake sorelo phurdas o baro ducho pral o baro pani, un das sorelo brishin. Koi patsam mer, kai nashrah mer maro djipen.

²¹Har chan le i rah tsiro tchi, djas o Paulo mashkral lende, un penas: “Murshale, tumer hunte shunans ap mande, un atchans an o them Kreta. Jaake wals i tseli bibacht gar pral mende.

²²Kanna penau tumenge: Denn gar pre! Kek tumendar merella. Kokres kau shiffo djal paash.

²³Kai rat was i bolepaskro pash mande. Koles bitchras miro Dewel, koleske budrau.

²⁴Kowa penas ap mande: Ma traash, Paulo! Tu hunte wess glan o baro rajeste an o foro Rom anlo. O Dewel shunas tut: Kek ap kau shiffo merella.

²⁵Doleske murshale, ma trashenn! Me patsau o Debles, lauter well jaake, har job mange penas.

²⁶O baro ducho phurdell men ap i tikno kotar them an o baro pani.”

²⁷Mer hams deesh-te-star diwessa ap o baro pani Adria. An koja rat patsan kol budepangre ap o shiffo, te dikenn le i kotar them.

²⁸Koi witsran jon i saster an o pani, hoi ap i shello pandlo hi, te dikenn le, har dur kowa tele djala. Kowa djas star-deesh metarja dur tele. I kotar dureder kran jon kowa pale, un dikan, kowa djas trijanda metarja dur tele.

²⁹Koi trashan le, te ulerenn le ap i bare barra, hoi tel o pani his. Un jon witsran star sasterne shelle, pal o shiffo an o pani, te well lo gar krik tserdedo. Un o shiffo atchas kote tchiddo, bis te was o wawar diwes.

³⁰Kol budepangre ap o shiffo kaman penge tchorchanes mendar te djal, un penan chochenes ap i wawarenge: “Mer mukas ko tikno bero[69] an o pani, te nai witsras ninna glan o shiffo sasterne shelle an o pani.”

³¹O Paulo penas ap ko baro lurdeste un ap kol lurdende: “Te atchenn kolla gar ap o shiffo, ham mer lauter nashedo.”

³²Koi dan i lurde kol shelle tele, un mukan ko tikno bero an o pani te perell.

³³Un har buder gar jaake tamlo[70] his, penas o Paulo ap lauterende, te chan jon tchomone: “Tumer maran tumen deesh-te-star diwessa tele,” penas job, “un an ko tselo tsiro chan tumer tchi.

³⁴Doleske mangau tumen: Chan kanna tchomone! Kowa hunte krenn, te atchenn djido. Kek tumendar nashrell i bal ap o shero.”

³⁵Un har job kowa penas, las job o maro, parkras pes pash o Debleste glan lauterende, phagas o maro, un chas.

³⁶Har jon kowa dikan, tapran le newi soor un chan ninna.

³⁷Mer hams lauter khetne ap o shiffo dui-sheel-efta-deesh-te-shob (276) mursha.

³⁸Un har jon lauter tchalo his, witsran le o tselo djob an o pani, te well o shiffo buder gar jaake pharo.

³⁹Har diwes was, dikan kol budepangre ap o shiffo i kotar them an o pani. Kowa prindjran jon gar. Kote dikan le i kotar phub, kai o shiffo tchiddo nai wals. Un jon penan penge: Te djal kowa, djah kote ap o them.

⁴⁰Un jon dan kol sasterne shelle tele, un witsran len an o pani, un pandan kol shelle pre, hoi rikran ko kasht, hoi o shiffo ap i tchatchi rig anell. Palle tserdan le ko baro than pre, te phurdell o baro ducho koi dren un anell len ap o them.

⁴¹Ap jek kopo uleran le ap i barra, hoi tel o pani hi. Un o shiffo his glanstunes soreles ap i barra beshdo. Un o sorelo pani kras o palstuno kotar paash.

⁴²Koi kaman i lurde i stilden te marell, te nashell kek peske.

⁴³Ko baro lurdo kamas gar, te well o Paulo mulo dino. Job djas koi mashkral un penas, te stenn kanna kolla an o pani, kai nai rikrenn pen pral o pani, te wenn le wergel ap o them.

⁴⁴un te tchiwenn pen i tsele wawar ap i kashta an o pani, te nai wenn le halauter wergel ap o them. Jaake wam mer lauter djido ap o them.