Read O Debleskro Drom - I Bibla an o Romano Rakepen 2021 Bitchepangre 3 Bible Online

Bitchepangre 3 - O Debleskro Drom - I Bibla an o Romano Rakepen 2021 bible

Bitchepangre 3

¹His jek diwes, his trinenge, koi djan o Petro un o Johanni an o Debleskro baro kheer, te mangenn le o Debles an.

²Kote his i mursh, kowa his bango jaake rah har djiwell lo. Leskre menshe beshan les hako diwes glan o shukar wudar glan o Debleskro baro kheer, te nai mangell lo lowe kolendar, kai djan an o Debleskro baro kheer dren.

³Har job o Johannes un o Petres dikas, har jon an o Debleskro baro kheer kaman te djal, mangas job lendar lowe.

⁴Jon dikan soreles ap leste, un o Petro penas ap leste: “Dik ap mende!”

⁵Un job dikas ap lende. Job patsas, te denn le les tchomone.

⁶O Petro penas: “Rup un sonakai hi man gar. Hoi man hi, dau me tut. An o lab o Jesus Kristestar dran Nazaret penau me tuke: Ste pre un dja trujel!”

⁷Un o Petro tapras les pash o tchatcho wast, un har job les pre tserdas, wan leskre pire sorelo un sasto.

⁸Job stas sik pre, nai djas, un djas lentsa an o Debleskro baro kheer, nashas un stas trujel un sharas o Debles.

⁹Un i tsele menshe dikan, kai stas job trujel, un sharas o Debles.

¹⁰Un jon prindjran les pale, kai job ko mangepaskro his, kai glan o Debleskro baro kheer beshdo his, glan ko wudar, kai kharell shukar wudar. Un jon kran bare jaka pral kowa, hoi jon dikan, hoi leha djas.

¹¹Un kau mursh djas buder gar lendar krik. Un i tsele menshe nashan pash lende khetne an koi isema, hoi kharell Salomeskri bari isema[11], un jon kran bare jaka.

¹²Har o Petro kolen dikas, penas lo ap lende: “Murshale dran Israel, hoske krenn tumer sawe bare jaka, un dikenn ap mende? Kowa kras gar mari soor, witar gar maro patsepen, te nai nashell kawa mursh.

¹³Na-a! O Dewel o Abrahamestar, un o Isaakestar un o Jakobestar, ko Dewel mare dadendar sikras tumende kate, hawi bari soor un railepen job peskro budepaskres, o Jesuses, das. Koles dan tumer an o Pilateskre wasta, un dan les buchoste, har o Pilato kamas les te djal mukell.

¹⁴Tumer dan koles buchoste, kai was o Deblestar, un kai his kek tchilatchepen an leste. Un tumer mangan o Pilatestar, te mukell lo koles dran o stilepen te djal, kai maras jekes.

¹⁵Ko rajes, kai o djipen della, maran tumer. Koles mukas o Dewel i mulendar pre te stell. Kowa djinah mer, mer dikam les.

¹⁶Mer patsah ap leste. Doleske was kau mursh sasto. Tumer prindjrenn les lauter un djinenn, kai job nashas nai gar. Job patsas ap o Jesus Kristeste, un kowa kras les sasto.

¹⁷Me djinau, mire phrala, kai tumer djinan gar, hoi tumer koi kran o Jesuseha. Un tumare pralstune djinan kowa witar gar.

¹⁸Lauter was jaake, har o Dewel kowa penas. Leskre rakepangre penan glan i rah tsiro, kai hunte merell ko baro rai, kolestar o Dewel penas, te well job un lell i menshen dran o tchilatchepen win.

¹⁹Mukenn tumaro phuro djipen un awenn pash o Debleste, te lell job tumari doosh tumendar!

²⁰Palle well ko latcho tsiro, kai dell tumen o Dewel newi soor. Job bitchrell tumenge koles, kai was tumenge glan i rah tsiro win rodedo. Kowa hi o Jesus Kristo.

²¹Job atchell an o bolepen jaake rah, bis te well ko tsiro, kai wella lauter newes kerdo. Kowa penan menge o Debleskre rakepangre glan i rah tsiro. O Dewel penas les lenge.

²²O Mose penas: I Debleskro rakepaskro har me hom, sawes bitchrell o Dewel pash tumende. Kowa hi jek tumare menshendar. Shunenn ap hako lab, hoi job tumenge penella!

²³Koon gar ap koleste shunella, koles hunte tchiwenn tumer pale, te nai well lo buder gar pash tumende.[12]

²⁴Ninna o Samuel un kol wawar rakepangre, kai pal leste wan, rakran pral kal diwessa, kai mer kanna djiwah.

²⁵Kowa, hoi kol Debleskre rakepangre i menshenge penan, hi tumenge. Tumer han i tchawe kolendar. Un ko lab, hoi o Dewel tumare phurenge penas, un peskro wast pre das, hi ninna tumenge. Job penas ap o Abrahameste: Koi bacht, hoi dau tire menshende, djal dureder ap i tsele menshende, kai ap i phub hi.[13]

²⁶Doleske bitchras o Dewel peskro budepaskres, o Jesuses, glanstunes pash tumende, te anell job tumenge o Debleskri bacht[14], te djal hakeno tumendar peskro tchilatcho dromestar tele.”