Read O Debleskro Drom - I Bibla an o Romano Rakepen 2021 Bitchepangre 4 Bible Online

Bitchepangre 4 - O Debleskro Drom - I Bibla an o Romano Rakepen 2021 bible

Bitchepangre 4

¹Har o Petro un o Johanni kowa i menshenge penan, wan i rashaja pash lende, ninna ko pralstuno kol klistendar an o Debleskro baro kheer, un i Sadduzarja.

²Jon his chojemen pral o Petreste un o Johanneste, te sikran kalla i menshende o Debleskro drom un penan, kai o Jesus i mulendar pre stas.

³Doleske tapran le len un tchiwran len i rati an o stilepen.

⁴Bud kolendar, kai shunan kol laba, hoi o Petro penas, wan patslo. Nai his pantch serja menshe.

⁵O wawar diwes, taissarlake, wan i biboldengre pralstune un phureder un tchatchepangre an o foro Jerusalem khetne.

⁶Ninna o Hannas, ko baro rashai, un o Kajafas, un o Johanno, un o Alexandro, un kol tsele wawar, kai his kol bare rashajengre menshendar, his koi pashel.

⁷Un jon mukan o Jesuseskre bitchepangren glan pende te anell, un jon putchan lendar: “An koneskri soor un an koneskro lab kran tumer kowa?”

⁸Un o Petro, pherdo Debleskro Ducho, penas ap lende: “Tumer pralstune un tumer phureder, shunenn!

⁹Mer kram i latcho koowa ap i nasselo mensheste. Un doleske ham kanna glan tumende tardo. Tumer putchenn mendar, har job sasto was.

¹⁰Jaake hunte djinenn tumer un i tsele menshe an o them Israel: O Jesus Kristo dran Nazaret, koles tumer ap o trushel dan, kras kau murshes sasto. Kau Jesuses mukas o Dewel i mulendar pre te stell.

¹¹Kowa hi ko bar, kai tumer ap i rig witsran.[15] Kowa was i bar, kai hidjrell o tselo kheer.

¹²Kek wawar har o Jesus kokres nai anell men pash o Debleste. Ap i tseli phub das o Dewel kek wawares, kai nai lell men dran o tchilatchepen un o merepen win.”

¹³Har jon dikan, har o Petro un o Johanni rakran, kai kek traash an lende his, kran le bare jaka. Un jon haiwan, kai kolla kek bare rakepangre un gosewe mursha hi, un djinan ninna, kai jon o Jesuseha khetne his.

¹⁴Ninna dikan le ko murshes, kai sasto was, pash lende tardo, un nai penan buder tchi.

¹⁵Koi bitchran le len win, un rakran mank pende un penan:

¹⁶“Hoi kras mer kal menshentsa? Hakeno an o foro Jerusalem djinell kanna, kai kran kolla i baro koowa, hoi kek wawar nai krella. Mer nai dah kowa gar buchoste.

¹⁷Das len soreles trad, te penenn jon kekeske buder tchi o Jesusestar, te djal ko rakepen gar dureder pash i tsele menshende!”

¹⁸Un jon dan len gole, dan len trad, un penan ap lende: “Ma rakrenn buder tchi o Jesusestar! Ma penenn i menshenge tchi, hoi job tumenge penas!”

¹⁹O Petro un o Johanni penan ap lende: “Penenn menge, hi kowa mishto glan o Debleste, te shunas mer budeder ap tumende har ap o Debleste?

²⁰Mer nai rikrah gar maro mui pral kowa, hoi dikam un shunam.”

²¹Koi dan le len soreles trad, un mukan len te djal. Jon hatsan tchi ap lende, kai nai dans jon lenge i phagi. I menshe sharan o Debles pral kowa, hoi koi djas.

²²Ko mursh, kai sasto was, his star-deesh bersha phuro.

²³Un har kolla mukan len te djal, wan jon pash i patslende, un penan lenge, hoi kol bare rashaja, un kol biboldengre phureder ap lende penan.

²⁴Har i patsle kowa shunan, mangan jon khetne o Debles an, un penan: “Rai, tu kral o bolepen un i phub, un o baro pani, un lauter, hoi djiwella.

²⁵O Debleskro Ducho rakras dran o Davideskro mui: Hoske hi i menshe ap kai phub tchilatcho? Hoske krenn jon kowa, hoi tchitcheske hi?

²⁶I bare raja ap kai phub un i bare pralstune wan lauter khetne. Jon hi chojemen ap o Debleste un ap ko baro rajeste, kones o Dewel bitchras. [16]

²⁷Tchatchepah, jon wan lauter an kau foro khetne: O Pilato, o Herodes, i Remarja, un i tsele bibolde dran bud themma. Jon hi chojemen ap tiro budepaskro Jesus, kai tutar was. Koles rodal tu win, maro Dewel, te well lo baro rai.

²⁸Jaake kran jon kowa, hoi tu glan i rah tsiro penal, te well kowa lauter jaake.

²⁹Rai, shuneh tu, kai jon men kanna trad denna? Mer ham tire budepangre. De men koi soor, te nai rakras tutar!

³⁰Sike lende tiri soor! Kre i nasselen sasto, un kre bud baro un sorelo koowa an ko lab o Jesusestar, kai tutar was un tiro budepaskro hi!”

³¹Ap jek kopo, har jon o Debles an-mangan, trissas[17] i phub kote, kai jon his. Un o Debleskro Ducho was ap lauterende. Un jon penan o Debleskro lab, un kek traash his an lende.

³²Kol tsele patslen his jek dji un jek djipen. Kek lendar penas: Ko brawlepen, hoi man hi, hi mange kokres. Na-a, kowa his lauterenge koi!

³³Bari sorjah penan o Jesuseskre bitchepangre i menshenge, kai o Jesus i mulendar pre stas, un i menshe haiwan o Debleskro latchepen.

³⁴Hakenes his doha djipaske. Kolen, kai hi len i kotar phub, i kheer, un wawar koowa, bikran kowa,

³⁵un anan kol lowe pash i Jesuseskre bitchepangre. Un jon dan hakenes jaake bud, te his hakenes doha djipaske.

³⁶Jaake kras kowa ninna o Josef. Kowa his i Levitari un was dran o them Ciprus. O Jesuseskre bitchepangre dan les ninna Barnabas gole. Ko kharella ap lengro rakepen: O mursh, kai rakrell i menshentsa latcho, te hi lengro dji pharo.

³⁷Un koles his i kotar phub. Ko kotar phub bikras job, un anas kol lowe pash o Jesuseskre bitchepangre, te denn le kol lowe i patslende.