Read O Debleskro Drom - I Bibla an o Romano Rakepen 2021 Bitchepangre 5 Bible Online

Bitchepangre 5 - O Debleskro Drom - I Bibla an o Romano Rakepen 2021 bible

Bitchepangre 5

¹I mursh, kai kharas Ananias, leskri romni kharas Safira, jon khetne bikran i kotar phub.

²Un job rikras lowe peske pale. Leskri romni djinas kowa. Un jon anan gar i tsele lowe glan o Jesuseskre bitchepangre.

³O Petro penas ap o Ananias: “Hoske kral tu o bengeske tiro dji pre? Hoske chochral tu o Debleskro Duches, un rikral lowe tuke?

⁴Tu nai rikrals tiro kotar phub. Un har bikral les, nai rikrals kol lowe ninna. Har nai kral tu sawo koowa? Tu chochral gar i menshen. Tu chochral o Debles.”

⁵Har o Ananias kol laba shunas, peras job khetne un meras. Un i bari traash was ap kolende, kai shunan kowa.

⁶Koi stan i terne mursha pre, un tchiwan pral leste i kotar plachta, hidjran les win un paskran les.

⁷Pal i tsiro was leskri romni dren un djinas gar, hoi koi djas.

⁸O Petro putchas latar: “Lan tumer jaake bud lowe, har tumer koi kotar phub bikran?” “Awa, jaake bud lowe lam,” penas li.

⁹O Petro penas ap late: “Hoske kran tumer kowa win, un chochran o Debles? Kol mursha, kai paskran tiro romes, hi glan o wudar tardo, un hidjrenn ninna tut win.”

¹⁰Koi peras li khetne un meras. Un har i terne mursha dren wan, hatsan le lat mules, hidjran lat win, un paskran lat pash lakro romeste.

¹¹Koi was i bari traash pral i tsele patslende un pral kolende, kai shunan kowa.

¹²Un o Jesuseskre bitchepangre kran bud baro un sorelo koowa an o Debleskri soor ap i menshende. Un i tsele patsle his an o Salomeskri bari isema an o Debleskro baro kheer khetne.

¹³Kol wawar, kai gar patsle his, trashan, te beshenn le pen pash lende. Ninna te trashan le lendar, rakran le lendar mishto.

¹⁴Bud mursha un djuwja patsan ap o Jesuseste un wan i patslentsa khetne.

¹⁵Un i menshe hidjran pengre nasselen ap i dromma, un tchiwan len kote ap o tchiben. Jon penan penge, te well o Petro koi pashel un leskro shatto perell ap lende, wenn le sasto.

¹⁶Ninna dran wawar forja, hoi trul o foro Jerusalem tchiddo his, anan jon i nasselen un kolen, kai an lende benga his. Un lauter wan sasto.

¹⁷Ko baro rashai un kol Sadduzarja, kai pash leste his, kolla silweran ap o Jesuseskre bitchepangre,

¹⁸un tapran len, un witsran len an o stilepen.

¹⁹An i rati was i bolepaskro[18] o Deblestar un kras kol wudja an o stilepen pre, un anas len win, un penas ap lende:

²⁰“Djan an o Debleskro baro kheer, un penenn i menshenge halauter pral o djipen, hoi gar pre-herella.”

²¹Har jon kowa shunan, djan jon taissarlake an o Debleskro baro kheer un sikran i menshende o Debleskro drom. Ko baro rashai un kolla, kai pash leste his, dan i pralstune bibolden khetne gole, ninna i tsele phureden an o them Israel. Un jon bitchran i klisten an o stilepen, te anenn le len glan lende.

²²Un har jon an o stilepen djan, his jon buder gar kote. Un kol kliste wan pale un penan:

²³“Ko stilepen his pandlo, un kol lurde his glan o wudar tardo. Un har i lurde menge pre pandan, his kek dren.”

²⁴Har ko pralstuno klisto pral o Debleskro baro kheer un kol bare rashaja kowa shunan, djinan jon gar, hoi te patsenn le, un putchan pendar har kowa dureder djala.

²⁵Koi was jek un penas lenge: “Kol mursha, kai tumer stildo tchiwan, hi an o Debleskro baro kheer tardo, un penenn i menshenge o Debleskro lab.”

²⁶Koi djas ko pralstuno klisto kol wawar klistentsa an o Debleskro baro kheer, un lan i Jesuseskre bitchepangre win. Kowa kran le kek sorjah. I kliste daran i menshendar, te marenn le len i barrentsa.

²⁷Un jon anan len glan kol tsele pralstunende, kai khetne wan. Un o baro rashai penas ap lende:

²⁸“Mer dam tumen soreles trad, te rakrenn tumer tchi buder o Jesusestar. Un kanna well lestar rakedo an o tselo foro Jerusalem. Un tumer penenn, kai mer maram les. Kamenn tumer, te well leskro rat pral mende?”

²⁹O Petro un i wawar Jesuseskre bitchepangre penan: “Mer hunte shunas ap o Debleste budeder har ap i menshende.

³⁰Ko Dewel mare phurendar mukas o Jesuses i mulendar pre te stell, koles, kai tumer ap o trushel dan un maran.

³¹Koles hadas o Dewel un beshas les ap peskri tchatchi rig, te well lo rai un lell i menshen dran o tchilatchepen un o merepen win. Kowa kras o Dewel, te mukenn i menshe an o them Israel pengro phuro djipen, jaake te nai lell lo lengri doosh lendar krik.

³²Kowa dikam mer un penah nai tumenge, un o Debleskro Ducho ninna. Koles dell o Dewel kolende, kai shunenn ap leste.”

³³Har jon kowa shunan, wan jon chojemen ap lende, un kaman len te marell.

³⁴Mank kol pralstunende his i Farisari, leskro lab his Gamalijel. Job his i biboldengro tchatchepaskro un an-diklo pash i tsele biboldende. Un kowa stas pre un penas: “Bitchrenn len i tikno tsiro win!”

³⁵Un pale penas lo: “Murshale an Israel, denn garda un dikenn, hoi tumer kal menshentsa kamenn te krell!

³⁶Glan i tsiro his i mursh, kowa kharas Thoidas. Job patsas pestar, te his lo i baro. Star-sheel mursha his pash leste, kai shunan ap leste. Palle was lo mulo dino. Un har job mulo his, atchan jon gar khetne. Un kek rakrell buder lendar.

³⁷Koi pal was i mursh dran o them Galilea, kowa kharas Judas. Kowa his an ko tsiro har i laba i biboldendar pre tchinlo wan. Kowa anas bud menshen ap peskri rig, te krenn le i kurepen i Remarjentsa. Ko Judas was ninna mulo dino, un kolla, kai pash leste his, hi gar buder koi. Un kek rakrell buder lendar.

³⁸Un kanna penau me tumenge: Mukenn tumare wasta kal menshendar! Mukenn len te djal! Te hi ko koowa i menshendar, palle atchella ko koowa gar.

³⁹Te hi ko koowa o Deblestar, palle nai phagenn les gar. Denn jak, te tchingrenn tumer gar ap o Debleste.” Un jon shunan ap o Gamalijel.

⁴⁰Palle dan jon o Jesuseskre bitchepangren gole, dan len dawa i tchupnijah, un dan len trad, te rakrenn le buder gar o Jesusestar. Un palle mukan le len te djal.

⁴¹Koi djan jon penge i pralstunendar. Un jon his bachtelo, te hi le o Debleske jaake bud moldo, te rodas lo len win, te chan le dawa o Jesuseske.

⁴²Jon mukan gar tele, te penenn le o latcho lab o Jesus Kristestar. Hako diwes djan le an o Debleskro baro kheer un pash i menshende an i khera, un sikran len o Jesuseskro drom.