Read O Debleskro Drom - I Bibla an o Romano Rakepen 2021 Bitchepangre 8 Bible Online

Bitchepangre 8 - O Debleskro Drom - I Bibla an o Romano Rakepen 2021 bible

Bitchepangre 8

¹His mishto an o Sauleskre jaka, te maran le les. Pal ko diwes lan le i patslen soreles palla an o foro Jerusalem. Un i patsle nashan an o them Judea un an o them Samaria. I Jesuseskre bitchepangre atchan an o foro Jerusalem.

²Un mursha, hoi ap o Debleskro drom djan, paskran o Stefanes un rowan bud pral leskro merepen.

³O Saulo kras lauter, te nai marell lo i tsele patslen. Job djas an i khera, las len koi win, murshen har djuwjen, un witsras len an o stilepen.

⁴Kol patsle, kai ap o naashepen his, djan trujel un penan o latcho lab o Jesus Kristestar.

⁵O Filipo djas an ko foro Samaria un rakras kote o Jesus Kristestar.

⁶Kol menshe dan jak ap kowa, hoi o Filipo penas un kras an o Debleskri soor.

⁷Bud menshendar tradas lo bengen win. Kolla dan soreles gole, har jon lendar win djan. Un bud menshe, kai his bango un nai djan gar, wan sasto.

⁸Un hakeno an kau foro his bachtelo pral kowa, hoi koi djas.

⁹An ko foro Samaria his ninna i mursh, kowa his i durkepaskro. Leskro lab his Simon. Job penas pestar, te hi lo i baro mursh. Un i menshe an ko foro kran bare jaka pral kowa, hoi job kras.

¹⁰Un halauter shunan ap leste, un penan: “Ap ko mursheste hi o Debleskri bari soor.”

¹¹Peskro durkepah tserdas lo len lauter ap peste. Doleske rikran jon bud lestar.

¹²Har kanna o Filipo lenge o Jesus Kristestar penas, koles o Dewel bitchras, te anell lo len pash o Debleste, patsan djuwja un mursha ap kowa, hoi o Filipo lenge penas. Un jon mukan pen te taufrell.

¹³Koi was ninna o Simon patslo, un mukas pes te taufrell. Palle atchas lo pash leste. Un har o Simon ko baro un sorelo koowa dikas, hoi o Filipo an o Debleskri soor kras, atchas leske o rakepen krik.

¹⁴Un kol Jesuseskre bitchepangre an o foro Jerusalem shunan, kai kol menshe an o them Samaria patslo wan. Un jon bitchran o Petres un o Johannes pash lende.

¹⁵Kolla wan an o them Samaria, un mangan o Deblestar, te dell lo i patslende o Debleskro Ducho.

¹⁶Kol patsle his kokres ap o lab maro rajestar Jesus taufedo. O Debleskro Ducho peras gomme gar ap lende.

¹⁷Koi tchiwan o Petro un o Johanni i wasta ap lende, un o Debleskro Ducho peras ap lende.

¹⁸Har o Simon dikas, kai o Debleskro Ducho ap lende was, har o Jesuseskre bitchepangre i wasta ap lende tchiwan, kamas job len lowe te dell,

¹⁹un penas ap lende: “Denn man ninna koi soor, te lell hakeno, koneske me o wast pre tchiwau, o Debleskro Ducho!”

²⁰O Petro penas ap leste: “Dja pash o bengeste, tu un tire lowe! Tu patseh tchatchepah, te nai gineh tu i lowentsa o Debleskri soor!

²¹Kau koowa, hoi mer krah, hi o Debleskro koowa un gar tiro koowa. Tiro dji hi gar tchatcho glan o Debleste.

²²Kanna, muk tiro tchilatcho drom, un pen o Debleske, te khaitell tut ko tchilatcho koowa, hoi tu kral. Un mange lestar, te lell lo koi doosh tutar!

²³Me dikau, kai hal pherdo tchilatcho koowa, un ko tchilatchepen hi o rai pral tute.”

²⁴Koi penas o Simon ap lende: “Mangenn o Deblestar, te well kowa gar pral mande, hoi tumer penan!”

²⁵Har o Petro un o Johanni i menshenge penan, hoi o Jesus penas un kras, djan jon pale an o foro Jerusalem. Ap lengro drom pale wan le an bud gaba an ko them Samaria un sikran kote i menshende o Jesuseskro drom.

²⁶O Debleskro bolepaskro penas ap o Filipo: “Ste pre un dja ap ko drom, kai djal dran Jerusalem tele an ko foro Gaza. Ap ko drom hi gar bud menshe.”

²⁷Koi stas lo pre un djas kote. Ap ko drom his ninna i mursh dran o them Etiopia. Ap kau tsiro his i bari rani i rajetsa pral o them Etiopia. Un ko mursh his i pralstuno an lakro them un das garda ap lakro tselo brawlepen. Kowa was an o foro Jerusalem, te mangell job o Debles an.

²⁸Har job pale ap o drom his, te djal lo khere, his job an peskro wurdin beshdo, un draweras ko liil, kai o Debleskro rakepaskro Jesaja tchinas.

²⁹Koi penas o Debleskro Ducho ap o Filipeste: “Dja pash ko wurdin un atch koi pashel!”

³⁰Un o Filipo nashas koi, un shunas, har kowa ko liil draweras[29], hoi o Debleskro rakepaskro Jesaja tchinas. Un o Filipo putchas lestar: “Haiweh tu, hoi tu drawereh?”

³¹“Na-a,” penas lo, “har nai haiwap, te penell mange kek, hoi koi tchinlo hi?” Un job mangas o Filipes, te well job pash leste an o wurdin, te beshell lo pes pash leste.

³²Kol laba, hoi job draweras, his kolla: Job his har i bakro, kai djal kote, kai well lo maredo. Job kras peskro mui gar pre har i terno bakro, koleske tchinenn le i balla tele.

³³Jon kran leha, har te wals lo tchi moldo un rakran gar o tchatchepen, har anan le les glan i tchatchepangre. Kek nai rakrell leskre tchawendar. Leskro djipen was kai phubjatar krik lino.[30]

³⁴Har ko pralstuno kowa draweras, putchas lo o Filipestar: “Konestar rakrell o Debleskro rakepaskro? Rakrell job pestar? Rakrell job i wawarestar?”

³⁵Koi penas o Filipo leske, hoi kol laba kamenn te penell, un penas leske o latcho lab o Jesusestar.

³⁶Koi wan le pash o pani, un ko pralstuno penas: “Koi hi pani. Hi mange tchomone an o drom tchiddo, te mukap man te taufrell?”

³⁷“Te patseh tu o tselo djijestar ap o Jesus Kristeste, nai krau me kowa,” penas o Filipo. Penas ko pralstuno: “Me patsau, kai hi o Jesus Kristo o Debleskro tchawo.”

³⁸Un job penas, te atchell ko wurdin tardo. Un kol dui, o Filipo un o pralstuno, djan khetne an o pani, un o Filipo taufras les.

³⁹Har jon dran o pani win djan, las o Debleskro Ducho o Filipes ap jek kopo kote krik. Un ko pralstuno dikas les buder gar. Un job djas bachteles peskro drom dureder.

⁴⁰O Filipes hatsan le an o foro Ashdod. Un job djas trujel, un penas o latcho lab o Jesusestar an kol tsele forja. Un jaake was lo an o foro Cesarea.