Read O Debleskro Drom - I Bibla an o Romano Rakepen 2021 Bitchepangre 9 Bible Online

Bitchepangre 9 - O Debleskro Drom - I Bibla an o Romano Rakepen 2021 bible

Bitchepangre 9

¹An ko tsiro his o Saules i bari choli ap kolende, kai djan o Jesuseskro drom, kamas len te marell, un djas pash ko baro rashajeste,

²un mangas kolestar lila, te nai djal lo an i biboldengre kangria an o foro Damaskus, te nai taprell job kote kolen, murshen har djuwjen, kai ap o Jesuseskro drom djana, te anell lo len an o foro Jerusalem.

³Har o Saulo ap ko drom his, kai djas an o foro Damaskus, was ap jek kopo i soreli momeli dran o bolepen trul leste.

⁴Un job peras ap i phub un shunas i rakepen. Kowa penas ap leste: “Saulo, Saulo, hoske leh tu man palla?”

⁵Penas lo: “Rai, koon hal tu?” Kowa penas: “Me hom o Jesus, koles, kai tu palla leh.

⁶Ste pre un dja an ko foro! Koi penenn le tuke, hoi te kress.”

⁷Kol mursha, kai pash leste his, kolenge atchas o rakepen krik. Jon shunan i rakepen un dikan kekes.

⁸Har o Saulo pre stas un i jaka pre kras, his lo korelo. Jon lan les pash o wast un anan les an o foro Damaskus.

⁹Triin diwessa nai dikas lo gar, un chas un pijas tchi.

¹⁰An o foro Damaskus his i patslo mursh. Kowa kharas Anania. Kolestar mukas pes o rai Jesus an i suni te dikell. Un job penas: “Anania!” Un o Anania penas: “Ake, hom, mo rai.”

¹¹Un o rai Jesus penas ap leste: “Ste pre un dja ap ko drom, kai kharell o tchatcho drom. Putch an ko kheer o Judasestar pal i mursheste, kai kharell Saulo dran Tarsus. Job mangell o Debles an,

¹²un dikas tut, Anania, an i suni, har wal tu pash leste un tchiwal leske i wasta pre, te nai dikell lo pale.”

¹³O Anania penas: “Rai, me shunom bud pral ko mursheste, hawo tchilatcho koowa job kol patslenge an o foro Jerusalem kras.

¹⁴Mer shunam ninna, kai las job lila kol bare rashajendar, te nai taprell job men un tchiwell men stildo, lauter kolen, kai tut an-mangenna.”

¹⁵Penas o rai Jesus leske: “Dja pash leste! Me rodom koles win, te well job mange koi, te djal lo pash kolende, kai kek bibolde hi, pash lengre bare rajende, un pash kol tsele biboldende, te penell lo lenge mandar.

¹⁶Me kamau leste te sikrell, kai hunte lell job bud duka mange ap peste.”

¹⁷O Anania djas koi, was an ko kheer, tchiwas i wasta ap o Sauleste un penas: “Miro phraal Saulo, maro rai Jesus bitchras man, kowa, kai mukas pes ap ko drom tutar te dikell. Job kamell, te dikess tu nai pale, un te wess pherdo Debleskro Ducho.”

¹⁸Ap jek kopo, har te perals ko tamlepen leskre jakendar tele, dikas lo nai pale, stas pre un mukas pes te taufrell.

¹⁹Palle chas un pijas o Saulo un was pale sorelo. Un o Saulo atchas i tsiro pash kol patslende an o foro Damaskus,

²⁰un rakras an i biboldengre kangria, un sikras len, kai o Jesus o Debleskro tchawo hi.

²¹Lauter kolla, kai shunan kowa, atchas o rakepen krik, un jon penan: “Hi kowa gar ko mursh, kai las an o foro Jerusalem i tsele patslen palla, un kamas len te marell, kolen, kai denn o Jesuseskro lab an-gole? Was job gar kate, te anell job i patslen pandlo glan kol bare rashajende an o foro Jerusalem?”

²²O Saulo rakras bari sorjah un sikras len, kai hi o Jesus o Kristo, kai was o Deblestar bitchedo, jaake te nai penan i bibolde, kai an o foro Damaskus djiwan, tchi buder.

²³Pal budeder diwessa wan kol bibolde khetne, rakran pral ko koowa, un penan: “Mer marah les.”

²⁴Kowa was o Sauleske penlo. I rati un ap o diwes dan i bibolde jak glan kol foreskre wudja, te taprenn le les, un te marenn le les.

²⁵Doleske anan leskre mala les an i rati pash koi massuri[31], hoi trul o foro hi, un mukan les an i korba pral i massuri tele, te was lo dran o foro win.

²⁶Un job djas an o foro Jerusalem, un kote kamas lo pash kol patslende te djal. Kolla trashan lestar lauter un patsan gar, kai job ap o Jesuseskro drom djala.

²⁷O Barnabas las les pash peste un anas les pash kol Jesuseskre bitchepangre, un penas lenge, har o Saulo ap ko drom, kai djal an o foro Damaskus, o rai Jesuses dikas, un kowa leha rakras, un har job an o foro Damaskus i menshenge o Jesusestar penas, un les kek daar his, te rakrell lo lestar.

²⁸Un o Saulo atchas an o foro Jerusalem, un djas pash i patslende dren un win, un sikras i menshende o Jesuseskro drom un trashas gar, te rakrell lo o Jesusestar.

²⁹Job rakras ninna kol biboldentsa, kai rakrenn grichtikes, un tchingras lentsa pral kowa, hoi an o Debleskro lab tchinlo hi. Kal bibolde kaman les te taprell un te marell.

³⁰Har kol patsle kowa shunan, anan le les an o foro Cesarea, un bitchran les dureder an o foro Tarsus.

³¹I patsle an i themma Judea, Galilea un Samaria, kolen his kanna i latcho tsiro, kek las len buder palla. Un o Debleskro Ducho kras len soreles an o patsepen. Un jon shunan ap o Debleste un bud un budeder menshe wan patslo.

³²Har o Petro an o tselo them trujel djas, was job ninna pash kol patslende an o foro Lidda.

³³Koi hatsas lo i murshes, leskro lab hi Aneas. Kowa his ochta bersha ap o tchiben tchiddo, un nai nashas gar.

³⁴O Petro penas ap leste: “Aneas, o Jesus Kristo krell tut sasto. Ste pre un kre kokres tiro tchiben!” Koi stas job sik pre.

³⁵Koi dikan le les lauter, kai an i forja Lidda un Saron djiwenna. Un jon dan pengro djipen o Jesuseste, maro rajeste.

³⁶An o foro Joppe djiwas i patsli. Lakro lab his Tabita ap hebretikes un Dorkas ap grichtikes. Koja kras bud latcho koowa, un das bud lowe kol tchorwelende.

³⁷An ko tsiro was joi nasseli un meras. Koi thowan jon lat un tchiwan lat an koi pralstuni isema.

³⁸O foro Joppe his pash o foro Lidda tchiddo. Un har i patsle shunan, kai o Petro an ko foro his, bitchran jon dui murshen pash leste, un mangan les, te well job jaake sik har djala pash lende.

³⁹O Petro stas pre un djas lentsa. Har job kote was, anan jon les an koi pralstuni isema, kai koi muli djuwel tchiddo hi. Bud djuwja, kolengre romma mulo hi, his kote un rowan. Kolla wan pash leste un sikran leste kol ripja, kai i Tabita kras, har joi djiwas.

⁴⁰Un o Petro tradas len win, djas ap i tchanga[32] glan o Debleste, mangas o Debles, un djas pash koi muli djuwjate un penas: “Tabita, ste pre!” Koi kras joi peskre jaka pre. Har joi o Petres dikas, beshas pes li pre.

⁴¹Un job das lat o wast un hadas lat pre. Palle das job kol patslen gole, ninna kol djuwjen, kolengre romma mulo his. Un joi his djido glan lende tardo.

⁴²Kowa shunan i tsele menshe an o foro Joppe, un bud wan patslo ap o rai Jesuseste.

⁴³Un o Petro atchas bud diwessa an o foro Joppe pash ko mursheste, kai kharell Simon. Kowa his jek, kai budrell viechengre mortsi[33].