Read O Debleskro Drom - I Bibla an o Romano Rakepen 2021 Remarja 11 Bible Online

Remarja 11 - O Debleskro Drom - I Bibla an o Romano Rakepen 2021 bible

Remarja 11

¹Me putchau tumendar kanna: Tchiwas o Dewel kol menshen infam, kai job peske win rodas? Na-a! Kowa hi gar jaake. Me hom ninna i Israelitari, i tchawo o Abrahamestar, un mire menshe hi Benjaminarja.

²Glan rah tsiro rodas o Dewel i Israelitarjen win, te wenn le leskre menshe. Doleske tchiwell lo len gar infam. Djinenn tumer gar, hoi an o Debleskro lab pral o Elija tchinlo was? Job was glan o Debleste, un rakras leha pral o tchilatchepen, hoi i Israelitarja kran.

³Mo rai, penas lo, jon maran tire rakepangren. Un i barra, hoi wan tuke pre tardo, kran le paash. Me kokres atchom djido, un man kamenn le ninna te marell.[28]

⁴Hoi penas o Dewel leske? Job penas: Efta serja mursha atchan mange pral. Kolla tchiwan pen gar tele ap i tchanga glan o Baal.[29]

⁵Jaake djal ninna kanna an kau tsiro. Hi menshe koi, kai o Debleske pral atchan. Kolen rodas o Dewel win dran peskro kamlepen.

⁶Kran jon latcho koowa? Un doleske rodas lo len win? Na-a! Te krals lo kowa, wals peskro kamlepen gar o tchatcho kamlepen.

⁷Hoi kanna? Kowa, hoi kaman i Israelitarja te lell, kowa lan le gar. Kolen kokres, kai o Dewel peske win rodas, kolla lan kowa. I tsele wawaren hi i dji dran bar.

⁸Jaake hi tchinlo an o Debleskro lab: O Dewel bitchras i sopaskro ducho ap lende, kai kras len khino. Pengre jakentsa dikenn le les gar, un pengre kandentsa shunenn le les gar. Kowa hi jaake bis ap kau diwes.[30]

⁹Un o baro rai David penas lendar: Jon chatchrenn viechen o Debleske un patsenn, te dikell o Dewel latches ap lende. Jaake hi kowa gar. O Dewel dikell gar latches ap lende. Na-a. Well o diwes, kai lenn le pengri phagi.

¹⁰Korelo wenn lengre jaka, te dikenn le buder tchi. Lengro trupo hunte well bango hako tsiro. [31]

¹¹Me putchau tumendar kanna: Peran jon o Debleskro dromestar tele, te nai stenn le buder gar pre? Na-a. Kowa hi gar jaake. Har peran jon o Debleskro dromestar tele, was o Debleskri bacht pash kolende, kai hi kek bibolde, jaake te silwerenn i bibolde ap kolende.

¹²Har i bibolde peran o Debleskro dromestar tele, was o Debleskri bacht pash i tsele menshende ap i phub. Un kowa, hoi i biboldenge gar mishto hi, was i bacht kolenge, kai kek bibolde hi. Te hi kowa jaake, har bud bareder hi koi bacht, te wenn i tsele bibolde pale ap o Debleskro drom!

¹³Tumer han kek bibolde. Un tumenge penau me: Man hi o Jesuseskro wast. Job bitchras man pash tumende. Un me parkrau man pash leste, te nai sikrap tumende leskro drom.

¹⁴Me kamaus, te silwerenn mire menshe ap tumende, te anap nai kolendar ninna ap o Jesuseskro drom.

¹⁵Har jon ap i rig tchiddo wan, nai wan i wawar menshe ap i phub pash o Debleste. Jaake was dran i tchilatcho koowa i latcho koowa. Har bud shukeder well kowa, te wenn i bibolde pale pash o Debleste. Kowa hi jaake shukar, har te wans le mulo un palle djido.

¹⁶Hako bersh well o djob tchinlo, un dell newo maro. Te denn le i kotar newo maro o Debleste, hi kowa jaake, har te well o tselo maro o Debleste dino. Jaake hi ninna pash o ruk. Te was leskro drab[32] o Debleste dino, palle hi ninna leskre kashta o Debleske.

¹⁷I bibolde hi har i latcho djeteskro ruk. Ko latcho djeteskro rukestar wan kashta tele tchinlo. Tumer han har i kasht o diwjo rukestar. Un tumer wan ap ko djeteskro ruk dren tchiddo, un djiwenn lestar, un lenn i soor lestar.

¹⁸Dran kowa penau tumenge: Ma sharenn tumen pral kol kashta, hoi tele tchinlo wan. Tumer hidjrenn gar o djeteskro ruk. Na-a. O djeteskro ruk hidjrell tumen.

¹⁹Kanna nai penenn tumer mange: Kol kashta tchinas o Dewel tele, te was mer dren tchiddo kote, kai kol kashta his, hoi wan tele tchinlo.

²⁰Kowa hi tchatcho. I bibolde patsan gar o Debles. Jaake hi le har kol kashta, hoi wan tele tchinlo. Tumer han har wawar kashta, hoi wan dren tchiddo ap ko rukeste kokres dran tumaro patsepen. Doleske ma krenn tumen bares! Denn jak!

²¹Te tchinas o Dewel i tchatche kashta ko djeteskro rukestar tele, palle nai tchinell lo tumen ninna tele.

²²Jaake dikah, o Dewel nai well latcho, un job nai dell i phagi. Kolla, kai peran leskro dromestar tele, kolen dell lo i phagi. Latcho hi lo ap tumende, kai djiwenn dran leskro latchepen. Te djiwenn tumer buder gar dran leskro latchepen, tchinell lo tumen ninna tele.

²³Kol bibolde, kai wenn pale ap o Debleskro drom, un patsenn ap o Jesus Kristeste, hi har kashta, kai tchiwell o Dewel pale dren an ko djeteskro ruk. O Dewel haiwell te krell kowa.

²⁴Job tchinas tumen o diwjo rukestar tele, un tchiwas tumen dren an ko latcho ruk, kolestar tumer gar wan. Kitse budeder tchiwell lo kol tchatche kashta pale ap o djeteskro ruk, kolestar jon wan.

²⁵Mire phrala, me kamau tumenge i baro tchatchepen te penell, hoi djinenn i menshe gar. Te djinenn tumer kowa, palle penenn tumer gar: “Har gosewo ham mer!” Tumer hunte djinenn, hoske hi bud bibolden i dji dran bar, un patsenn gar ap o Jesus Kristeste. Kowa atchella jaake rah, bis te wan kol tsele menshe dran i wawar themma ap o Jesuseskro drom, kolendar o Dewel kamell, te wenn le pash leste.

²⁶Pal kowa wenn i tsele bibolde ninna ap o Jesuseskro drom. An o Debleskro lab hi tchinlo: Dran o foro Zion well kowa, kai lell o tselo tchilatchepen o Jakobeskre tchawendar krik.

²⁷Ap ko tsiro, kai lau lengro tchilatchepen lendar krik, penell o Dewel, hi kowa kerdo, hoi me lenge penom, un miro wast pre dom.[33]

²⁸Te dikau, har patsenn i bibolde gar ap o latcho lab o Jesus Kristestar, hunte penap: Jon hi gar o Debleskre mala. Kowa was jaake, te nai wenn tumer pash o Debleste. Te dikau, har rodas o Dewel lengre phuren an o phuro tsiro win, hunte penap, kai leskro kamlepen lenge his.

²⁹Kowa, hoi job della, lell lo gar pale, un kones job gole della, un win rodella, koles tchiwrell lo gar ap i rig.

³⁰Glan i tsiro shunan tumer gar ap o Debleste. Un palle was o Debleskro kamlepen ap tumende. Kowa was an kau tsiro, kai i bibolde gar ap leste shunan.

³¹Kanna shunenn i bibolde gar ap o Debleste. Un jaake, har o Debleskro kamlepen ap tumende was, jaake well o Debleskro kamlepen ninna ap lende.

³²O Dewel mukas i tsele menshen i tsiro, kai shunan le gar ap leste, te nai well lo lauterenge latches.

³³Har baro hi o Debleskro latchepen ap lauterende! Har baro hi leskro goswepen! Job djinell halauter, hoi kek wawar nai djinella. Kek nai djinell, har job rakrell o tchatchepen win. Kek nai haiwell leskre tsele dromma.

³⁴Kek haiwell lauter kowa, hoi hi an o Debleskro dji. Job hi o rai. Kek nai penell leske, hoi job hunte krella.

³⁵Koon das les tchomone, hoi job hunte dell pale? Kek.

³⁶Lestar was halauter. Halauter djiwell lestar, un halauter djal pale pash leste. Sharas o Debles kanna un hako tsiro! Amen.