Read O Debleskro Drom - I Bibla an o Romano Rakepen 2021 Remarja 14 Bible Online

Remarja 14 - O Debleskro Drom - I Bibla an o Romano Rakepen 2021 bible

Remarja 14

¹Lenn ninna koles latches pre, kai hi gar sorelo an o patsepen. Ma tchingrenn leha pral o patsepen!

²Ko jek patsell, kek chapen hi pale-tchiddo. Ko wawar, kai hi gar sorelo an o patsepen, kowa patsell, te nai chal lo kek mass.

³Kowa, kai chal o mass, hunte rikrell pes gar feteder har ko wawar, kai chal kek mass. Kowa, kai chal kek mass, hunte penell ko wawareske gar: “Kowa, hoi tu kreh, hi pale-tchiddo koowa.” O Dewel tchiwas hake dujen an o tchatchepen.

⁴Kowa hi gar tiro koowa, te peneh pral i wawareskro budepaskro: “Kowa, hoi job kras, hi gar mishto.” Leskro rai kokres nai penell: “Kowa hi mishto, kowa hi gar mishto.” Un maro rai, o Jesus Kristo, les hi i soor, te rikrell lo les pash peste, jaake te atchell lo tardo an o patsepen.

⁵Jekeske hi jek diwes i Debleskro diwes, ko wawareske hi lo kowa gar. Hakeno hunte djinella peske, kowa, hoi job krella, hi tchatcho un latcho.

⁶Koon rikrell o Debleskro diwes bareder har i wawar diwessa, krell kowa o Debleske. Koon patsell, te nai chal lo lauter, krell kowa o Debleske un parkrell pes pash leste. Koon patsell, te nai chal lo gar lauter, kowa krell les ninna o Debleske, un sharell o Debles ninna.

⁷Kek mendar djiwell peske kokres, un kek mendar merell peske kokres.

⁸Te djiwah, djiwah o Debleske. Te merah, merah o Debleske. Hako tsiro ham mer leskro, — an o djipen har an o merepen.

⁹O Jesus Kristo meras, un was pale djido, te well lo o rai pral kolende, kai mulo hi, un pral kolende, kai djido hi.

¹⁰Kek tumendar hunte penell pral i wawar patsleste: “Kowa djal gar mishto ap o Debleskro drom.” Kek tumendar hunte dikell tele ap i wawar patsleste. Ko diwes wella, kai rakrell o Dewel pral hakeneste mendar o tchatchepen win.

¹¹An o Debleskro lab hi tchinlo: O Dewel penell: Jaake har tchatcho hi, te djiwau, jaake perell hakeno glan mande tele, te sharell lo man. Un hakeno penella: Tu hal o baro Dewel.[37]

¹²Ap ko diwes well hakeno mendar glan o Debleste un hunte penell leske, hoi job kras un hoske job kowa kras.

¹³Doleske hunte penell kek mendar ap o wawareste: “Tu djal gar mishto ap o Debleskro drom.” Denn jak, te tchiwenn tumer i wawar patsleske tchi an o drom, jaake te djinell lo buder gar, har te djal lo ap o Debleskro drom.

¹⁴Me djinau soreles, — maro rai Jesus sikras man kowa: Dell tchi, hoi hi pale-tchiddo an peste. Kowa kokres, kai patsell, te krell tchomone les pale-tchiddo, koleske hi kowa pale-tchiddo.

¹⁵Te dikell tiro phraal, te chah tu halauter, un kowa dukell les an peskro dji, palle kameh tu les gar o djijestar. O Jesus Kristo meras ninna koleske. Doleske de jak, te anell sawo tikno koowa les gar o Debleskro dromestar tele.

¹⁶Krenn tchi, te rakrenn i wawar djungeles pral kowa, ninna te hi kowa, hoi tumer krenn, mishto an tumare jaka!

¹⁷Kolla, kai o Dewel o rai pral lende hi, kolla tchingrenn gar pral kowa, hoi jon chana un hoi jon pijenna. Na-a. Jon djiwenn pal o tchatchepen, hoi o Deblestar wella un tchingrenn gar, un o Debleskro Ducho dell len bacht an o dji.

¹⁸Koon jaake djiwella, kowa sharell o Jesus Kristes. Ap leste dikell o Dewel latches. Un pash i menshende hi lo an-diklo.

¹⁹Kanna kras lauter, te well kek tchingepen mank mende. Kras kowa, hoi krell men lauter soreles an o patsepen.

²⁰Ma krenn kowa paash, hoi o Dewel kras! Ninna te hi kek chapen pale-tchiddo an peste, nai well jekes i pharo dji, te chal lo tchomone, hoi leske pale-tchiddo hi. Un kowa hi gar mishto.

²¹Hi feteder, te chah tu kek mass un te pijeh tu kek mool un kreh tchi, hoi anell tiro phrales o Debleskro dromestar tele.

²²Kowa, hoi tu patseh an kau koowa, djineh tu un o Dewel kokres. Tu hunte sikress les lende gar. Bachtelo hal tu, te kreh lauter jaake, te hunte peness tuke gar: Kowa, hoi krom, his gar mishto.

²³Koon chal tchomone, un leskro dji well pharo koi pashel, kowa kras tchomone, hoi was gar dran o patsepen. Doleske anas lo doosh ap peste. Kowa, hoi well gar dran o patsepen, anell doosh ap mende.