Read O Debleskro Drom - I Bibla an o Romano Rakepen 2021 Remarja 15 Bible Online

Remarja 15 - O Debleskro Drom - I Bibla an o Romano Rakepen 2021 bible

Remarja 15

¹Mer, kai ham sorelo an o patsepen, hunte dikas ap kolende, kai hi gar sorelo an o patsepen, te hidjras mer lentsa, hoi lenge pharo hi. Mer hunte dikas gar ap mende kokres, te djal menge mishto.

²Hakeno mendar hunte djiwell jaake, te dikell o wawar latches ap leste un well sorleder an o patsepen.

³Ninna o Jesus Kristo dikas gar ap peste, te djal leske mishto. An o Debleskro lab hi tchinlo pral leste: O praassepen kol menshendar, kai o Debles praassan, peras ap leste.[38]

⁴Lauter kowa, hoi an o phuro tsiro an o Debleskro lab tchinlo was, was tchinlo, te las mer newi soor dran o Debleskro lab, un das maro patsepen gar pre, un dikas ap ko latchepen, hoi o Dewel men della, an ko tsiro hoi wella.

⁵Un o Dewel, koon dell i newi soor un krell tumen soreles, te denn tumaro patsepen gar pre, lestar mangau me, te well tumen jek dji un jek djipen, jaake har o Jesus Kristo kowa tumendar kamella.

⁶Palle nai sharenn tumer o baro Debles halauter khetne. Job hi o dad maro rajestar, o Jesus Kristestar.

⁷Jaake har hi o Jesus Kristes i dji tumenge, jaake hunte well tumen i dji jek o wawareske! Palle well o Dewel sharedo.

⁸Un me penau tumenge: O Jesus Kristo was i biboldenge, te dikenn le, o Dewel rikrell ap peskro lab, hoi das job lengre phurende.

⁹Un job was tumenge, kai han kek bibolde, te sikrell lo tumende o Debleskro baro latchepen, jaake te sharenn tumer o Debles. An o Debleskro lab hi tchinlo, har penell o Jesus Kristo ap o Debleste: Doleske sharau tut mank kolende, kai hi kek bibolde, un giwau gilja tuke.

¹⁰Kote hi ninna tchinlo: Tumer, kai han kek bibolde, awenn bachteles khetne i biboldentsa. Jon hi kol menshe, kolen job peske win rodas!

¹¹Un ninna hi tchinlo: Tumer lauter, kai han kek bibolde, sharenn o Debles! Tumer, kai wenna dran i tsele themma, giwenn leske gilja!

¹²Un o Debleskro rakepaskro, o Jesaja, penas glan i rah tsiro: Koi well i mursh i menshendar, kolengro dad hi o Isai,[39] kowa well o rai pral i menshende an i tsele themma. Ap koleste dikenn le, te well lo lenge latches.[40]

¹³Un o Dewel, kolestar o tselo latchepen wella, ap koleste dikah, lestar mangah, te wenn tumer tchalo i bachtjatar an o dji dran tumaro patsepen, jaake te djinenn tumer: Ko latchepen, hoi dell men o Dewel an o tsiro, hoi wella, kowa well tchatchepah. Un o Debleskro Ducho dell tumen i soor, te dikenn bud un budeder ap o Debleste.

¹⁴Mire phrala, me djinau tchatchepah, tumaro dji hi pherdo latchepen. Un tumer djinenn lauter, hoi o Dewel tumendar kamella. Jaake nai sikrell ko jek o wawareste o tchatcho drom.

¹⁵Ninna te djinau kowa, tchinom tumenge pral bud koowa an kau liil. Me tchinom sorele labentsa, te bistrenn kowa gar. Koi budi das man o Dewel an peskro latchepen.

¹⁶Job bitchras man, te budrap o Jesus Kristeske un te djap pash kolende, kai kek bibolde hi, te sikrap len o Debleskro drom. Jaake hom har i rashai, kai anell kol menshen, kai kek bibolde hi, pash o Debleste. Un o Dewel dell len peskro Ducho, te wenn le leskro. Un job dikell latches ap lende.

¹⁷O Jesus Kristo das man kai budi. Doleske ladjap gar, te rakrap pral kowa, hoi krau o Debleske.

¹⁸Me kamau gar te rakrap pral wawar koowa har pral kowa, hoi kras o Jesus Kristo mank kolende, kai kek bibolde hi. Dran maro rakepen un mari budi anas o Jesus Kristo len pash peste, te shunenn le ap leste.

¹⁹Un job sikras peskri soor, har kras o Debleskro Ducho baro koowa, hoi kek wawar nai krella. Jaake penom o latcho lab o Jesus Kristestar an o tselo them trul o foro Jerusalem bis an o them Illirikum.

²⁰Ap o tselo drom penom ko lab kokres kote, kai o Jesus Kristo gar prindjedo his, jaake te penell kek ap mande: “Tu budreh kote, kai i wawar glan tute budras.”

²¹Jaake krom kowa, hoi an o Debleskro lab tchinlo hi: Kolenge tchi lestar penlo was, kolla prindjrenn les kanna. Kolla, kai lestar tchi shunan, kolla haiwenn kanna.

²²Doleske his man kek tsiro te wap pash tumende.

²³Kanna hi miri budi an kol themma kerdo. Un me nai wau pash tumende. Jaake kamom me kowa glan bud bersha te krap.

²⁴Ap miro drom an o them Spania, kamoms te dikap tumen, un te atchap i tikno tsiro pash tumende. Te hom tumentsa khetne, lau newi soor. Palle djau dureder, un tumer nai denn man lauter, hoi man hunte well ap o drom.

²⁵Glan kowa, kai wau pash tumende hunte djap an o foro Jerusalem, te anap kote i tchorwele patslenge kol lowe, hoi i patsle an i themma Macedonia un Achaja kolenge khetne tchiwan.

²⁷Kol lowe dan le pengro tselo djijestar. I patsle an o foro Jerusalem penan o Debleskro latcho lab kolenge, kai kek bibolde hi. Jaake hunte denn i patsle, kai kek bibolde hi, i biboldende lauter kowa, hoi hunte well len djipaske. Koja hi lengri sijaan.

²⁸Te dom i patslen an o foro Jerusalem kol tsele lowe, palle kamau ap o drom an o them Spania pash tumende te well.

²⁹Un me djinau, te wau pash tumende, anau tumenge i tseli bacht, hoi wella o Jesus Kristestar.

³⁰Mire phrala, mangau tumendar an o lab maro rajestar o Jesus Kristestar, un an o kamlepen, hoi o Debleskro Ducho men das: Mangenn mantsa khetne o Debles o tselo djijeha,

³¹te wap me gar dino an i wasta kolendar, kai patsenn gar ap o Debleste an o them Judea. Mangenn les ninna, te lenn kol patsle an o foro Jerusalem kol lowe latches pre, hoi anau lenge.

³²Palle nai wau bachteles pash tumende, jaake har kamell o Dewel, te lap newi soor pash tumende.

³³O Dewel djal tumentsa lauterentsa un dell tumen peskri bacht an o dji! Amen.