Read O Debleskro Drom - I Bibla an o Romano Rakepen 2021 Remarja 16 Bible Online

Remarja 16 - O Debleskro Drom - I Bibla an o Romano Rakepen 2021 bible

Remarja 16

¹Te well mari pheen, i Febe, pash tumende, mangau tumendar, len lat latches pash tumende pre. Joi hi o Debleskri budepaskretsa an o foro Kenchrea. Lenn lat jaake latches pash tumende pre, har maro rai Jesus kowa i patslendar kamella. Denn lat lauter kowa, hoi lat hunte well djipaske! Joi his bud patslenge koi, ninna mange.

³Penenn latche laba mandar ap i Priska un ap o Akwila! Jon budrenn mantsa o Jesus Kristeske.

⁴Har kaman man i menshe te marell, wan le ap miri rig. Lengro djipen his lenge tchi moldo. Pash lende parkrau man gar kokres, na-a, ninna i tsele patsle, kai kek bibolde hi, parkrenn pen pash lende.

⁵Penenn ninna latche laba mandar ap kol patslende, kai an lengro kheer khetne wenna, un ap miro latcho maal, o Epaineto. Job was o ersto patslo an o them Asia.

⁶Penenn ninna latche laba mandar ap i Mariat! Kaja budras jaake bud tumenge.

⁷Penenn ninna latche laba mandar ap o Androniko un i Junia! Kolla hi ninna bibolde har me un his mantsa an o stilepen. Jon hi an-diklo mank kolende, kolen o Jesus Kristo win bitchras, te penenn le leskro lab. Kol dui wan glan mande ap leste patslo.

⁸Penenn ninna latche laba ap o Ampliato, miro latcho maal an o patsepen,

⁹un ap o Urbano, kai mentsa khetne o Jesus Kristeske budrella, un ap miro latcho maal, o Stachis.

¹⁰Penenn ninna latche laba ap o Apelles! Kowa sikras, te hi lo soreles tardo an o patsepen. Penenn ninna latche laba ap o Aristobolo un ap kolende, kai djiwenn an leskro kheer.

¹¹Penenn latche laba ap o Herodion, kai hi i biboldo har me, un ap o Narzisso un kol patslende an leskro kheer.

¹²Penenn latche laba ap i Trifena un i Trifosa! Kolla budrenn o Jesuseske, maro rajeske. Penenn latche laba ap miri latchi pheen, i Persis! Koja kras i bari budi i patslenge.

¹³Penenn latche laba ap o Rufo, koles maro rai Jesus win rodas, un ap leskri date. Kaja hi mange jaake har miri dai.

¹⁴Penenn latche laba ap o Asinkrito, i Flegonta, o Hermes, o Patrobas, o Hermas un ap i patslende, kai pash lende hi.

¹⁵Penenn latche laba ap o Filologo un i Julia, o Nereo un leskri pheen, un ap o Olimpas un kol tsele patsle, kai pash lende hi.

¹⁶Taprenn tumen trujel, un denn tumen i tchum! Kowa sikrella hakeneste, tumer han phrala un phenja an o patsepen. I tsele patsle, kai ap o Jesus Kristeste patsenna, penenn tumenge: Atchenn maro Debleha!

¹⁷Mire phrala, me mangau tumen, denn jak, te shunenn tumer gar ap kolende, kai anenn tchingepen mank i patslende un sikrenn o Debleskro drom wawartchandes har kowa, hoi tumende siklo was, un krenn tumaro patsepen paash! Rikrenn tumen lendar pale!

¹⁸Sawe menshe budrenn gar maro rajeske, o Jesus Kristeske. Na-a, jon krenn, hoi lenge kokres mishto hi. Shukar labentsa un baro rakepen anenn le kolen o Debleskro dromestar tele, kai denn gar jak.

¹⁹Bud menshe shunan, kai tumer ap o Debleste patsenn un ap leste shunenn. Doleske hom me bachtelo pral tumende. Un me kamau o tselo djijestar, te haiwenn tumer bud un budeder, hoi latcho hi, un te krenn kek tchilatcho koowa.

²⁰O Dewel, kai dell tumen peskri bacht an o dji, krell o bengeskri soor paash. Un ko tsiro well sik. O latchepen maro rajestar, o Jesus Kristestar, djal tumentsa!

²¹O Timoteo, kai mantsa budrella, penell tumenge latche laba. Ninna o Luka, un o Jason, un o Sosipater, — kolla hi lauter bibolde har me, — jon penenn tumenge latche laba.

²²Me, o Tertio, tchinom an kau liil kowa, hoi o Paulo mange penas, un me penau tumenge ninna latche laba.

²³O Gajo, — kowa las man an leskro kheer dren, — penell tumenge latche laba. An leskro kheer wenn i tsele patsle khetne. Ninna o Erasto, kai dell garda ap o foreskre lowe, un o Kwarto, miro latcho phraal an o patsepen, penenn tumenge latche laba.

²⁴O latchepen maro rajestar, o Jesus Kristestar, djal tumentsa lauterentsa! Amen.

²⁵Sharedo well o baro Dewel! Les hi i soor, te krell lo tumaro patsepen soreles. Jaake penell les o latcho lab, hoi me penau i menshenge, ko latcho lab o Jesus Kristestar. Kate well siklo o drom pash o Debleste. Kowa djinan le i rah tsiro gar.

²⁶Kanna well ko drom diklo. Ko dromestar tchinan i Debleskre rakepangre an pengre lila, jaake har o baro Dewel kamas. Kowa djiwella hako tsiro, un kamas i tsele menshendar ap i phub, te patsenn le un shunenn le ap leste.

²⁷Job kokres hi gosewo, un bitchras menge o Jesus Kristes. Sharedo well job hako tsiro! Amen.