Read O Debleskro Drom - I Bibla an o Romano Rakepen 2021 Remarja 8 Bible Online

Remarja 8 - O Debleskro Drom - I Bibla an o Romano Rakepen 2021 bible

Remarja 8

¹Jaake djal kek nashedo, kai djiwell o Jesus Kristeha khetne.

²Un o Debleskro Ducho, koles o Jesus Kristo men das, hi kanna o rai pral mende. Un kowa dell men o djipen un lell men win dran o tchilatchepen un o merepen.

³O Moseskre laba nai dan ko djipen gar. I menshe nai kran kowa gar, hoi an o Moseskre lila tchinlo hi. Ko tchilatchepen, hoi an lende his, mukas len gar te krell, hoi o Dewel lendar kamas. Doleske penas o Dewel: “O tchilatchepen hunte merell.” Un job bitchras peskro tchawes, te well lo i mensho har mer, kai tchilatcho ham. Job las maro tchilatchepen ap peste un meras. Un jaake meras o tchilatchepen leha un nashras peskri soor pral mende.

⁴Kowa kras o Dewel, te was mer jaake tchatcho glan leste, har job mendar kamella. Job kras kowa menge, kai djiwah kanna o newo djipen, hoi o Debleskro Ducho men das, un buder gar maro phuro djipen.

⁵Kolla, kai djiwenn pengro phuro djipen, djiwenn jaake, har jon kamenna. Kolla, kai djiwenn o newo djipen, hoi o Debleskro Ducho len das, kolla kamenn kowa te krell, hoi o Debleskro Ducho kamella.

⁶Kolla, kai djiwenn jaake, har jon kamenna, kolla merenna. Kolla, kai krenna, hoi o Debleskro Ducho lenge penella, kolla len o Debleskro djipen un leskri bacht.

⁷Koon kamell jaake te djiwell, har job kamella, kowa kamell gar o Debles. Job shunell gar ap kowa, hoi o Dewel penella. Job nai krell les witar gar.

⁸Kolla, kai pengro phuro djipen djiwenna, pral kolende nai well o Dewel gar bachtelo.

⁹Tumer djiwenn buder gar tumaro phuro djipen. Na-a. Te hi o Debleskro Ducho an tumende, djiwenn tumer ko newo djipen, hoi job tumende das. Kones hi gar o Jesus Kristeskro Ducho an leste, kowa hi gar i Debleskro tchawo.

¹⁰Te djiwell o Jesus Kristo an tumende, han tumer tchatcho glan o Debleste, un o Debleskro Ducho dell tumen o djipen, ninna te well ko diwes, kai hunte merell tumaro mass. O tchilatchepen an i menshende kras, te hunte merell o mass.

¹¹O Dewel kras o Jesus Kristes i mulendar djido. Te djiwell leskro Ducho an tumende, palle krell lo tumen ninna djido. O Debleskro Ducho, kai an tumende hi, krell kowa.

¹²Mire phrala, kanna hunte djiwas buder gar maro phuro djipen.

¹³Te djiwenn tumer tumaro phuro djipen, merenn tumer. Te djiwenn tumer jaake, har o Debleskro Ducho kowa kamella, un penenn ‘na-a’ ap o tchilatchepen, hoi an tumaro shero hi, palle djiwenna.

¹⁴Kolla, kai shunenn ap o Debleskro Ducho, kolla hi o Debleskre tchawe.

¹⁵O Dewel das tumen gar peskro Ducho, te darenn lestar, har i budepangre darenna pengro rajestar. Na-a, tumer han o Debleskre tchawe. Un o Debleskro Ducho krell, te penah mer: “Tata” ap o Debleste.

¹⁶Un o Debleskro Ducho penell menge an o dji, te ham mer o Debleskre tchawe.

¹⁷Gar kokres leskre tchawe ham mer. Mer lah ninna lestar ko tselo latchepen, hoi les menge hi an o bolepen. Kowa lah khetne o Jesus Kristeha. Te wenn duka ap mende, jaake har wan duka ap o Jesus Kristo, palle krell men o Dewel ninna baro un railo leha.

¹⁸Me patsau soreles, kol duka, hoi an kau tsiro ap mende wenna, hi bud bud tikneder har ko baro railepen, hoi o Dewel men della an ko tsiro, hoi wella.

¹⁹Halauter, hoi o Dewel kras, dikell peskro tselo djijeha ap ko tsiro, kai o Dewel halauteren sikrella, koon leskre tchawe hi.

²⁰Halauter, hoi o Dewel kras, hunte djal paash, ninna te kamenn le kowa gar. O Dewel kamas kowa jaake. Jaake kras lo ninna, te dikenn le ap ko tsiro,

²¹kai hunte merenn le buder gar un wenn jaake newo un railo har o Debleskre tchawe newo un railo wenna.

²²Mer djinah, halauter, hoi o Dewel kras, rowell un dell gole i dukatar bis kau diwes.

²³Un gar kolla kokres, na-a, men ninna hi duka un dikah o tselo djijeha ap ko tsiro, kai wah tchatchepah Debleskre tchawe un merah buder gar. Ninna te hi men kanna o Debleskro Ducho an mende, dikah ap ko tsiro, kai merah buder gar.

²⁴Ninna te djinah, o Debleskro djipen hi maro, dikah mer ap ko tsiro, kai lah les tchatchepah. Men te wals ko djipen, palle hunte dikams buder gar ap ko tsiro, kai mer lah les.

²⁵Maro dji nashell pal kowa, hoi glan mende hi, un hoi dikah nai gomme gar. Doleske wah mer gar khino an mare djia bis te lah les.

²⁶Ninna well o Debleskro Ducho ap mari rig, kai ham gar sorelo. Te kamah mer te rakras o Debleha un djinah gar, hoi te mangas lestar, palle rakrell o Debleskro Ducho menge i labentsa, hoi kek nai rakrell win.

²⁷Un o Dewel, kai djinell, hoi an o menshengro dji hi, djinell ninna, hoi o Debleskro Ducho lestar menge mangella.

²⁸Mer djinah, halauter well mishto kolenge, kai o Debles kamenna. Glan rah tsiro his o Debles an peskro dji, te dell lo menshen gole, te djiwenn le leha khetne.

²⁹Har rodas lo len win, his an leskro dji, te wenn le jaake har peskro tchawo. Kowa te well o phureder mank bud phralende un phenjende.

³⁰Kolen job win rodas, kolen das lo ninna gole, te djiwenn le leha khetne. Un kolen, kai job gole das, kolen tchiwas lo an o tchatchepen. Un kolen, kai job an o tchatchepen tchiwas, kolen kras lo ninna erligo, te djiwenn le leha khetne an leskro railepen.

³¹Hoi te penas mer budeder? O Dewel hi ap mari rig! Koon nai krell menge i tchilatchepen? Kek!

³²O Dewel rikras peskro tchawes gar pash peste. Job das les menge lauterenge an o merepen. Patsenn tumer gar, te dell lo men khetne leha kowa lauter, hoi job menge penas?

³³Kek nai anell i doosh ap kolende, kolen o Dewel peske win rodas. O Dewel tchiwas len an o tchatchepen.

³⁴Kek nai penell ap mende: Tu djal nashedo! O Jesus Kristo meras menge. Un kowa hi gar lauter. O Dewel kras les ninna i mulendar djido. Un job hi ap leskri tchatchi rig, un rakrell menge mishto.

³⁵Tchi nai lell mendar o Jesus Kristeskro kamlepen krik! Kek duka, kek daar. Ninna te lenn le men palla, ninna te hi men tchi te chal un tchi an-ripaske, ninna te kamenn le men tchilatchepen te krell, ninna te marenn le men, ko tselo koowa nai lell gar o Jesus Kristeskro kamlepen mendar krik.

³⁶An o Debleskro lab hi tchinlo: Mer ham tiro. Doleske kamenn le men hako tsiro te marell. Jon dikenn ap mende, har te wams bakre, hoi wenn maredo.[14]

³⁷O Jesus Kristo, kai kamell men o tselo djijestar, job krell men soreles an lauter kowa hoi ap mende wella.

³⁸Me djinau soreles: Tchi nai lell o Debleskro kamlepen mendar krik: kek merepen, kek djipen, kek bolepangre[15], witar kek tchilatche sorja. Tchi, hoi ap mende wella, kanna un an ko tsiro, hoi wella,

³⁹tchi, hoi pral an o bolepen hi un tchi, hoi tele an i phub hi, un kek wawar, hoi djiwella, nai krell, te kamell men o Dewel buder gar. Kowa, hoi maro rai, o Jesus Kristo, menge kras, sikrell men, har baro o Debleskro kamlepen hi.