Read O Debleskro Drom - I Bibla an o Romano Rakepen 2021 Remarja 9 Bible Online

Remarja 9 - O Debleskro Drom - I Bibla an o Romano Rakepen 2021 bible

Remarja 9

¹Glan o Jesus Kristeste penau tumenge: Kowa, hoi tumenge kanna penau, hi o tchatchepen un kek chochepen. Ninna o Debleskro Ducho an miro dji penell mange kowa.

²Job djinell, miro dji rowella un dukella hako tsireske mire phralenge, kai bibolde hi har me. Mange wals tchatcho, te woms me mire phralenge praassedo o Deblestar, te wenn jon pash leste, ninna te woms me palle buder gar o Jesus Kristeha khetne.

⁴Jon hi Israelitarja. Kolen rodas o Dewel win, te wenn le leskre tchawe. Lende sikras lo peskro railepen. Lentsa kras lo win, te well lo lengro Dewel un jon peskre menshe. Lende das lo peskre laba, hoi penenna, har te djiwenn le, ninna kol laba, hoi sikrenna, har te budrenn le leske an peskro kheer. Lentsa rakras lo pral o djipen un o brawlepen, hoi kamell lo len te dell an ko tsiro, hoi wella.

⁵Lengre phure hi o Abraham, o Isaak un o Jakob. Ninna o Jesus Kristo was i Israelitari, har was lo boldo. Sharas o Debles pral kowa lauter hako tsireske. Amen!

⁶Kanna penau kate gar, te hi o Debleskro lab buder tchi moldo, hoi job ap i Israelitarja penas. Na-a! Hoi kamau te penell, hi kowa: I tsele Israelitarja hi gar lauter o Debleskre menshe.

⁷Witar gar wenn halauter, kai wan pal o Abrahameste, leskre tchawe kharedo. O Dewel penas ap o Abrahameste: Kolla, kai o Isaakestar boldo wenna, kolla hi tire tchawe.

⁸Jaake dikah, o Abrahameskre tchawe hi gar lauter leskre tchatche tchawe, un doleske witar gar o Debleskre tchawe. Na-a, kolla hi leskre tchawe, kolendar o Dewel glan-wi penas, te lell len o Abraham,

⁹jaake har das o Dewel o Abrahameste peskro lab un penas: Kau tsiro an o wawar bersh wau pale. Palle las i Sara i tchawes.

¹⁰Kowa hi gar kate kokres jaake. Na-a, ninna pash i Rebekka hi kowa jaake. I Rebekka las dui tchawen, kolengro dad his maro phuro dad, o Isaak.

¹¹Har i tchawe gomme gar boldo his, penas o Dewel lake: I tsiro wella, kai budrell o phureder tchawo o terneder tchaweske. Har job kowa penas, kras kek lendar i latcho koowa, witar kek tchilatcho koowa. Jaake dikah, lauter wella, har o Dewel kamella. Te rodell lo jekes win, krell lo kowa jaake, har job kamella. Job dikell gar ap kowa, hoi jek kras.

¹³Jaake hi kowa an o Debleskro lab tchinlo: Me kamom o Jakobes. O Esaes kamom gar.

¹⁴Hoi te penas mer kanna: Djal o Dewel gar pal o tchatchepen? Na-a! Kowa hi gar jaake.

¹⁵Job penas ap o Moseste: Me hom latches koleske, ap koleste me kamau te wap latches. Un man hi i baro dji koleske, ap koleste man i baro dji hi.[16]

¹⁶Jaake nai krell kek mensho dran peste, te well o Dewel latcho ap leste, ninna te kamell lo kowa. Na-a, lauter well dran o Debleskro kamlepen.

¹⁷An o Debleskro lab hi tchinlo, har mukas o Dewel ap o baro rajeste pral o them Egiptia te penell: Me krom tut bares, te sikrap miri soor ap tute, jaake te well miro lab ap i tseli phub prindjedo.

¹⁸Lauter krell lo jaake, har job kamella. Ap koneste job latches kamell te well, ap koleste hi lo latcho. Koneske job i dji dran bar kamell te dell, koleske dell lo i dji dran bar.

¹⁹Kanna putcheh tu mandar: Te hi kowa jaake, hoske tchingrell lo mentsa pral maro tchilatchepen? Mer nai krah gar wawartchandes. O Dewel kamas les jaake.

²⁰Palle penau tuke: Tu hal i mensho. Tu nai peneh gar ap o Debleste: Hoi kreh tu kote? Job kras tut. Tu nai peneh gar ap leste: Hoske kral man tu jaake?

²¹Kowa hi jaake har pash i mensheste, kai krell tchare un pirja dran jek kotar loli phub. Te kamell lo, krell lo i shukar tcharo, hoi bud moldo hi. Un te kamell lo, krell lo i wawar tcharo, kai tchiklo koowa dren tchiddo wella.

²²Jaake hi kowa ninna o Debleha. Job kamas, te sikrell lo peskri soor, un te well peskri choli pral i menshende, kai nashedo hi. Ninna te kamas lo kowa te krell, rikras lo peskri choli i rah tsiro lendar pale.

²³Kowa kras lo, te sikrell lo peskro baro railepen ap kolende, kai lan leskro kamlepen. Kolen rodas lo win, te djiwenn le leha khetne an leskro railepen.

²⁴Un mank kolende ham mer. Dran i tsele menshende rodas lo men win, gar dran i bibolde kokres.

²⁵O Debleskro rakepaskro, o Hosea, penas, hoi o Dewel leste sikras: Kolla, kai hi kanna gar mire menshendar, kolen rodau me win, te wenn le mire menshe. Un kolen, kai kek kamas, kolen kamau me o tselo djijestar.

²⁶Kote, kai ap lende penlo was: Tumer han gar mire menshendar, kote wenn le kharedo: I tchawe o djido Deblestar.

²⁷Pral i Israelitarja rakras o Debleskro rakepaskro, o Jesaja, kol laba: Ninna te wans i Israelitarja jaake bud har i tikne barra pash o baro pani, kol budendar atchella jek wast pherdo pral, un well dran o Debleskri choli win.

²⁸Kowa, hoi o Dewel penas, well sik pral i phub. Job rakrell i phagi soreles win pral i menshende.[17]

²⁹Kowa hi jaake har o Debleskro rakepaskro, o Jesaja, penas: Te mukals o Dewel, ko rai pral o bolepen un i phub, gar tchawe mendar te atchenna pral, palle merans mare tsele menshe jaake har i menshe an i forja Sodom un Gomorra.

³⁰Jaake nai penah: Kol menshe, kai hi kek bibolde, rodan gar pal o tchatchepen. Un kolen tchiwas o Dewel an o tchatchepen. Jon patsan ap leste. Un doleske kras lo len tchatcho glan peste.

³¹Kowa his wawartchandes pash i Israelitarja. Kolla kaman jaake te djiwell, har o Moseskre laba penenna, te wenn le tchatcho glan o Debleste. Un jon nai djiwan gar jaake, un wan gar tchatcho glan o Debleste.

³²Hoske gar? Jon kaman tchatcho te well dran pengri soor, un kaman gar te patsell ap o Jesus Kristeste. Un jaake wan le har menshe, kai perenn pral i baro bar, hoi ap lengro drom tchiddo hi.

³³An o Debleskro lab hi tchinlo: Dikenn, me tchiwau i baro bar an o foro Zion. Pral koleste perenn le, un ap koleste choirenn le pen. Un kowa, kai ap leste patsella, kowa hunte ladjell pes gar glan mande.[18]