Read O Debleskro Drom - I Bibla an o Romano Rakepen 2021 1. Korintarja 1 Bible Online

1. Korintarja 1 - O Debleskro Drom - I Bibla an o Romano Rakepen 2021 bible

1. Korintarja 1

¹Kau liil tchinau me, o Paulo. O Jesus Kristo rodas man win, te wap leskro bitchepaskro. Kowa kamas o Dewel jaake. Un me un maro phraal Sostenes tchinah kau liil

²ap i patslende, kai wenn khetne an o Debleskro lab an o foro Korint. Kolen rodas o Dewel win, te wenn le leskre tchawe, un te djiwenn o Jesus Kristeha khetne. Kau liil hi ninna kol tsele wawarenge, kai o Jesus Kristes an hake gaba un forja an-mangenna. Job hi lengro un maro rai.

³Mu well tumen latchepen un bacht an o dji! Kowa dell tumen o Dewel, maro dad, un maro rai, o Jesus Kristo!

⁴Me parkrau man hako tsiro tumenge pash miro Debleste. Job hi tumenge jaake latcho un kras, te prindjrenn tumer o Jesus Kristes.

⁵Job das tumen bud goswepen, te nai penenn o Debleskro lab, un te haiwenn tumer, hoi job kamell tumenge te penell.

⁶O lab o Jesus Kristestar kras tumen soreles an o patsepen.

⁷Tumen hi haki soor, hoi o Debleskro Ducho della. Un tumer dikenn ap ko diwes, kai well maro rai, o Jesus Kristo, pale.

⁸Job dell tumen i soor, te atchenn an o patsepen, bis te well lo pale. Un kek nai anell i doosh ap tumende ap ko diwes.

⁹Kowa, hoi o Dewel penella, kowa rikrell job ninna. O Dewel das tumen gole, te wenn hako tsiro peskro Tchaweha, o Jesus Kristeha, khetne. Un kowa hi maro rai.

¹⁰Mire phrala, me shunom, kai hi tchingepen mashkral tumende. Kowa penan mange kolla dran i familja koi djuwjatar Kloe. Kanna mangau tumen an o lab maro rajestar, o Jesus Kristestar: Ma tchingrenn tumen buder! Atchenn khetne un rikrenn khetne an kowa, hoi tumer krenna un patsenna!

¹²Pash tumende hi menshe, kai penenna: “Mer krah kowa, hoi o Paulo menge penella.” Wawar penenna: “Mer rikrah men ap o Apollo.” Un pale wawar penenna: “O Kefas[1] hi maro sikepaskro.” Un pale wawar penenna: “Mer rikrah men ap o Jesus Kristeste.”

¹³Nai djal kowa? Hi o Jesus Kristo an budeder kotja? Djas o Paulo tumenge ap o trushel? Wan tumer ap o Pauleskro lab taufedo?

¹⁴Me parkrau o Debles, kai taufrom kek wawares tumendar har o Krispo un o Gajo.

¹⁵Jaake nai penell kek, tumer wans ap o Pauleskro lab taufedo.

¹⁶Kowa bistrom: Me taufrom ninna o Stefanes un leskri familja. Budeder djinau me gar, kai taufrom me jekes.

¹⁷O Jesus Kristo bitchras man gar, te taufrap i menshen. Job kamell te penap o latcho lab lestar i menshenge. Me penau kowa gar gosewe labentsa. Te rakroms me gosewe labentsa, merals o Jesus Kristo tchitcheske ap o trushel.

¹⁸Maro rakepen pral o Jesuseskro merepen ap o trushel hi dinlepen kolenge, kai djan nashedo. Mer, kai ham ap maro drom an o bolepen, dikah an ko lab o Debleskri bari soor.

¹⁹O Dewel penella an peskro lab: Pash mande molell o menshengro goswepen tchi. Un kolla, kai penenn, te djinenn le bud, kolende sikrau, kai kowa tchi moldo hi, hoi jon djinenna.[2]

²⁰Hoi nai penah mer pral kol gosewe menshende? Un hoi nai penah pral kolende, kai hi tchinepangre un rakepangre ap kai phub? Jon prindjrenn o Debles gar. Doleske hi lengro goswepen an o Debleskre jaka dinlepen.

²¹Ninna te dikenn i menshe o Debleskro goswepen an halauter, hoi job kras, prindjran jon pengro goswepah o Debles gar. Doleske hatsas o Dewel i wawar drom. Job lell kol menshen dran o tchilatchepen win, kai patsenn ap o rakepen pral o Jesuseskro merepen ap o trushel. Kol wawar menshe, kai gar patsenna, penenna: “Kowa hi i dinelo rakepen, hoi tumer kate rakrenna.”

²²I bibolde kamenn baro un sorelo koowa te dikell. Kolla, kai kek bibolde hi, rodenn goswepen ap kai phub.

²³Mer penah i menshenge, kai o Jesus Kristo ap o trushel hunte meras. Pral kowa hi i bibolde chojemen. Un i wawar menshenge hi kowa dinlepen.

²⁴Mank kolende, kolen o Dewel peske win rodas, hi bibolde un sawe, kai kek bibolde hi. Jon te shunenn o lab o Jesus Kristestar, palle dikenn le an leste o Debleskri soor un leskro goswepen.

²⁵Ninna te penenn i wawar menshe: “Kowa, hoi o Dewel krella, hi dinlepen,” hi job gosweder har i menshe. Ninna te penenn le: “O Debles hi kek soor,” hi job sorleder har jon.

²⁶Dikenn ap tumende, mire phrala: Mank tumende hi gar bud gosewe menshe, gar bud pralstune un gar bud, hoi mishto an-diklo hi.

²⁷O Dewel rodas kolen win, kai an i menshengre jaka gar gosewo hi, te dikenn i gosewe menshe, kai lengro goswepen tchi molella. Job rodas kolen win, kai hi len kek soor an i menshengre jaka, te dikenn i sorele, kai lengri soor tchi molella.

²⁸O Dewel rodas kolen win, kai an i menshengre jaka tchi molenna, un kai gar mishto an-diklo hi, te sikrell lo, kowa, hoi pash i menshende bud molella, hi pash leste tchi moldo.

²⁹Jaake sharell pes nai kek mensho glan o Debleste.

³⁰O Dewel kras, te wan tumer ap o Jesus Kristeskro drom. Kanna djinah, hoi tchatchepah goswepen hi. O Jesus Kristo kras men tchatcho glan o Debleste. Job rodas men win, te was leske koi, un las mari doosh mendar krik.

³¹Kanna well kowa jaake, har o Debleskro lab penella: Te kamell pes jek te sharell, nai sharell lo kowa, hoi o Dewel leske kras.