Read O Debleskro Drom - I Bibla an o Romano Rakepen 2021 1. Korintarja 11 Bible Online

1. Korintarja 11 - O Debleskro Drom - I Bibla an o Romano Rakepen 2021 bible

1. Korintarja 11

¹Krenn kowa jaake, har me kowa krau! Un me krau kowa, hoi o Jesus Kristo kras.

²Me hom bachtelo pral tumende, te bistran tumer gar, hoi me tumenge penom. Kowa, hoi shunom un tumenge penom, krenn tumer.

³Me kamau te djinenn tumer, kai o Jesus Kristo hi o pralstuno pral hako mursheste. Un o rom hi o pralstuno pral peskri romjate. Un o Dewel hi o pralstuno pral o Jesus Kristeste.

⁴Hako mursh, kai mangell o Debles an, un hako mursh, kai penella, hoi o Dewel leste sikras, un les hi i stadi ap o shero, kowa anell ladj ap peste.

⁵Haki romni, kai mangell o Debles an, un haki romni, kai penella, hoi o Dewel late sikras, un kowa krell li, te hi lat tchi ap o shero, koja anella ladj ap peste. Kowa hi jaake, har te wans lake i balla tele tchinlo.

⁶Te kamell i romni tchi ap peskro shero te tchiwell, nai mukell joi ninna peskre balla tele te tchinell. Te wenn lake i balla tele tchinlo, un lat hi buder kek balla ap o shero, hi kowa lake i ladj. Doleske hunte tchakrell li peskro shero.

⁷I mursh hunte tchiwell kek stadi ap peskro shero. Job was kerdo pal o Debleste. Un o Dewel sharell pes leha. Jaake sharell pes o rom peskri romjah.

⁸O mursh hi gar i djuwjatar. I djuwel hi o murshestar.

⁹O Dewel kras o murshes gar i djuwjake. Na-a! Job kras i djuwjat o mursheske.

¹⁰Doleske hunte tchakrell i romni peskro shero, te dikenn i bolepangre, kai lakro rom o pralstuno pral late hi.

¹¹Pash i patslende hi kowa jaake: O rom hi tchi peske kokres. Un i romni hi tchi peske kokres.

¹²I djuwel well o murshestar. Un o mursh well i djuwjatar boldo. Un jon dui wenna o Deblestar.

¹³Me putchau tumendar: Hi kowa latcho, te mangell i romni o Debles an, un lat hi tchi ap peskro shero? Na-a!

¹⁴Hakeno djinella: Te hi i murshes lengste bal, hi kowa i ladj leske.

¹⁵Un te hi i djuwjat lengste bal, hi joi shukar. Lakre balla hi lake har i diklo.

¹⁶Te hi jek pash tumende, kai kamell pes pral kowa tchingrell, jaake hunte djinell job, kai mer tchingrah men pral sawo koowa gar, un kote, kai i patsle o Debleske khetne wenna, witar gar.

¹⁷Kanna hunte penap tumenge tchomone, kai nai sharau tumen gar. Te wenn tumer patsle khetne, krenn tumer budeder, hoi tumenge gar mishto hi, har te krans kowa, hoi tumenge mishto hi.

¹⁸Me shunom, te wenn tumer khetne, palle tchingrenn tumer khetne, un ko jek penell: Me krau, hoi kawa penella, un ko wawar penell: Me krau hoi kowa penella. Un me patsau, i paash kolestar, hoi pral tumende shunom, hi tchatcho.

¹⁹Kowa hunte well jaake, te dikell hakeno, koon tumendar an o patsepen mishto tardo hi.

²⁰Me shunom ninna, te wenn tumer khetne, palle chan tumer o Jesuseskro chapen gar jaake, har maro rai Jesus kowa kamella.

²¹Hakeno chal peskro chapen kokres, hoi job peha las, un dell kek wawares tchomone. Doleske hi mashkral tumende phrala un phenja, kai hi len bok un trush. Un wawaren hi jaake bud te pijell, te wenn le mato.

²²Nai chan un pijenn tumer gar khere? Hi kol patsle, kai o Debleske khetne wenna, tchi moldo an tumare jaka? Kamenn tumer ladj ap kolende te anell, kolen tchi hi? Hoi penap me tumenge? Sharap me tumen? Na-a! Doleske sharau me tumen gar.

²³Hoi me tumenge penom, kowa penas mange o rai Jesus. Koi rati, kai was ap maro rajeste, o Jesuseste, phukedo, las job ko maro,

²⁴parkras pes pash o Debleste, un phagas ko maro un penas: “Kawa hi miro mass, hoi tumenge dino wella. Hako kopo, kai phagenn tumer o maro, ma bistrenn, hoi me tumenge krom!”

²⁵Un pal o chapen las job ko khoro un penas: “Kai mool an kau khoro hi miro rat, hoi tumenge ratau. Jaake krau i newo drom, kai o Dewel un i menshe mala wenna. Hako kopo, kai pijenn tumer dran ko khoro, ma bistrenn, hoi me tumenge krom!”

²⁶Hako kopo, kai chan tumer ko maro, un kai pijenn tumer dran ko khoro, penenn tumer dureder, kai maro rai Jesus meras. Kowa krenn tumer jaake rah, bis te job pale wella.

²⁷Koon chal ko maro, un pijell dran o rajeskro khoro jaake, te well maro rai gar sharedo, kowa anell doosh ap peste. Job kras har te wals o Jesuseskro mass un rat tchi moldo.

²⁸Doleske hunte dikell hakeno ap peste, har hi lo an o patsepen tardo. Un palle chal job o maro un pijell dran ko khoro.

²⁹Koon chal ko maro, un pijell dran ko khoro, un leske hi tchi moldo, hoi o rai Jesus leske kras, kowa anell doosh ap peste un lell i phagi.

³⁰Doleske hi bud nassele mashkral tumende, ninna sawe, kai hi len kek soor an lende. Un bud meran ninna.

³¹Te dah jak ap mende, har mer an o patsepen tardo ham, lah kek phagi.

³²Te lah mer i phagi o Deblestar, palle krell job kowa, te djas mer gar khetne i wawar menshentsa nashedo.

³³Doleske, mire phrala, te wenn tumer khetne, te chan o rajeskro chapen, denn jak jek ap o wawareste, te lenn ko chapen khetne.

³⁴Te hi jekes bok, palle mu te chal job khere, jaake te anenn kek doosh ap tumende. Ko wawar penau tumenge, te wau pash tumende.