Read O Debleskro Drom - I Bibla an o Romano Rakepen 2021 1. Korintarja 2 Bible Online

1. Korintarja 2 - O Debleskro Drom - I Bibla an o Romano Rakepen 2021 bible

1. Korintarja 2

¹Mire phrala, har wom pash tumende, te sikrap tumende o Debleskro drom, hoi tumer gar prindjran, krom me kowa gar bare un gosewe labentsa.

²Jaake rah, har homs pash tumende, kamom me pral kek wawar koowa te rakrell, har o Jesus Kristestar un pral leskro merepen ap o trushel.

³Un har me pash tumende homs, his kek soor an mande, un man his traash.

⁴Me rakrom tumentsa gar sorele un gosewe labentsa, te anap tumen ap o Debleskro drom. Na-a, o Debleskro Ducho rakras soreles ap tumende,

⁵jaake te was tumaro patsepen dran o Debleskri soor un gar dran i menshengro goswepen.

⁶Kowa, hoi mer penah i patslenge, hi o Debleskro goswepen. Kau goswepen hi gar har ko goswepen, kai well kol menshendar, kai prindjrenn o Debles gar, witar gar har o goswepen kolendar, kai hi raja ap kai phub. Kolla hunte merenn.

⁷Mer rakrah pral o Debleskro goswepen, hoi i menshe gomme gar prindjrenna. O bolepen un i phub his gomme gar koi, har his o Debles an o dji, te djiwas mer leha khetne an leskro railepen.

⁸Kowa prindjran i raja ap kai phub gar. Te nai dikans le an o Debleskro dji, dans le o Jesuses, ko rajes pral i tsele rajende, gar ap o trushel.

⁹An o Debleskro lab hi tchinlo: Ko latcho koowa, hoi kek jak dikas, un hoi kek kand shunas, un hoi an kek mensheskro dji dren was, kowa lauter dell o Dewel kolen, kai les o djijestar kamenna.[3]

¹⁰Men das o Dewel peskro Ducho. Un o Ducho sikrell men kowa, hoi hi o Debles an o dji. O Debleskro Ducho dikell an halauter, ninna an o Debleskro dji.

¹¹Hoi an o mensheste hi, djinell kokres leskro dji. Hoi an o Debleste hi, kowa djinell kokres o Debleskro Ducho.

¹²An maro shero hi buder gar ko koowa, hoi hi kol menshen an pengro shero, kai prindjrenn o Debles gar. Mer lam o Debleskro Ducho. Doleske djinah, hoi o Dewel menge kras.

¹³Kau koowa penah i menshenge. Kowa krah mer gar labentsa, hoi wenna dran o menshengro goswepen. Na-a, mer rakrah kowa, hoi o Debleskro Ducho menge penella. Job krell, te haiwas mer o Debleskro koowa, un sikrah kowa kolende, kolen ninna o Debleskro Ducho hi.

¹⁴I mensho, koles o Debleskro Ducho gar hi, haiwell gar, hoi o Debleskro Ducho penella. O Debleskro koowa hi leske dinlepen. Ko mensho nai dikell gar, har o Dewel kowa dikella.

¹⁵I mensho, koles o Debleskro Ducho hi, kowa dikell ap lauter jaake, har o Dewel kowa dikella. Kol menshen, kai o Debleskro Ducho gar hi, kolla nai haiwenn kol menshen gar, kolen o Debleskro Ducho hi.

¹⁶Kowa hi jaake, har an o Debleskro lab tchinlo hi: Kek djinella, hoi an o Debleskro dji hi. Kek nai well leskro sikepaskro.[4] Mer, kai patsle ham, men hi o Jesuseskro Ducho.