Read O Debleskro Drom - I Bibla an o Romano Rakepen 2021 1. Korintarja 3 Bible Online

1. Korintarja 3 - O Debleskro Drom - I Bibla an o Romano Rakepen 2021 bible

1. Korintarja 3

¹Mire phrala, me nai rakrom tumentsa gar har patslentsa, kai djiwenn jaake, har o Debleskro Ducho kamella. Me hunte rakrom tumentsa har kolentsa, kai djiwenn pengro phuro djipen. Tumer hans har tikne tchawe an o patsepen.

²Me dom tumen thud te pijell, un kek mass te chal. Kowa nai dandran tumer gar. Ninna kanna nai chan kowa gar.

³Tumer djiwenn jaake har te prindjrenn o Jesus Kristes gar. Te hi tchingepen mank tumende, un te silwerenna, palle djiwenna jaake har i menshe, kai prindjrenn o Jesus Kristes gar.

⁴Jek tumendar penella: “Me krau, hoi o Paulo penella.” Un ko wawar penella: “Me rikrau man ap o Apolleste.” Me penau tumenge: Jaake rakrenn kol menshe, kai prindjrenn o Debles gar.

⁵Dikenn, koon hi o Apollo, un koon hom me, o Paulo! O Debleskre budepangre ham mer un kram, kai wan tumer patslo. Hakeno mendar kras koi budi, har o Dewel leste das.

⁶Me hom har i hacho, kai witsras o djob an i phub. O Apollo hi har jek, kai tchoras o pani pre. Un o Dewel mukas o djob bares te well.

⁷Kowa, kai o djob an i phub witsrella, hi gar bareder har kowa, kai o pani pre tchorella. O Dewel hi bareder, kai mukell o djob bares te well.

⁸Kowa, kai o djob an i phub witsrella hi jaake baro har kowa, kai pani pre tchorella. Un o Dewel dell hakenes, hoi leskri budi moldo hi.

⁹Mer ham o Debleskre budepangre. Tumer han o Debleskri hachetikri phub. Un tumer han har i kheer, hoi o Dewel peske krella.

¹⁰O Dewel his latches ap mande un das man i budi, te budrap ap ko kheer. Jaake tchiwom me i telstune barra. Me krom kowa, har i gosewo budepaskro, koon haiwella khera te krell. Ap kol telstune barra tchiwell i wawar budepaskro wawar koowa pre. Hakeno hunte dell garda, hoi job pre tchiwella.

¹¹Kek nai tchiwella i wawar telstuno bar, har ko bar, hoi tchiddo hi. Kowa hi o Jesus Kristo.

¹²Hi budepangre, kai tchiwenn sonakai, rup, kutch barra, pre. Wawar tchiwenn kasht, phuss, khass pre.

¹³Well ko diwes, kai dikenn le, hoi hakeno pre tchiwas. Ap ko diwes well lauter an i jag. Un koi jag sikrella, hoi haki budi moldo hi.

¹⁴Te chatchrell kowa gar krik, hoi jek pre tchiwas, lell job tchomone o Deblestar.

¹⁵Te chatchrell kowa an i jag krik, hoi job pre tchiwas, nashrell job lauter. Job kokres djal gar nashedo. Job hi har jek, kai nashell dran i kheer win, hoi chatchella.

¹⁶Djinenn tumer gar, kai han tumer o Debleskro kheer, un kai o Debleskro Ducho an tumende djiwella?

¹⁷Koon o Debleskro kheer paash krella, koles phagella o Dewel. O Debleskro kheer hi o Debleske. Un kau kheer han tumer.

¹⁸Ma chochenn tumen kokres! Koon patsella, te hi lo gosewo ap kai phub, kowa hunte dikell dren, te molella leskro goswepen tchi.

¹⁹Kowa, hoi pash i menshende goswepen hi, hi an o Debleskre jaka dinlepen. An o Debleskro lab hi tchinlo: O Dewel taprell kolen an lengro chochepen, kai penenn pendar, kai jon gosewo hi.[5]

²⁰Hi ninna tchinlo: O Dewel djinella, hoi an i menshengro dji glan djala, kai lengro goswepen tchi molella.[6]

²¹Doleske hunte sharell pes kek mensho, koon peskro sikepaskro hi. Lauter hi tumaro:

²²o Paulo, o Apollo, o Kefas. Un tumaro hi ninna: kai phub, o djipen, o merepen, kowa, hoi kanna hi, un kowa, hoi wella. Lauter hi tumaro.

²³Tumer han o Jesus Kristeskre. O Jesus Kristo hi o Debleskro.