Read O Debleskro Drom - I Bibla an o Romano Rakepen 2021 1. Korintarja 6 Bible Online

1. Korintarja 6 - O Debleskro Drom - I Bibla an o Romano Rakepen 2021 bible

1. Korintarja 6

¹Te hi jekes tumendar i tchingepen i wawar patsleha un kamell peskro tchatchepen, har nai anell lo kowa glan i tchatchepangre, kai gar patslo hi? Hoske djal lo gar pash i patslende?

²Well jek tsiro, koi rakrenn i patsle o tchatchepen win pral i tsele menshende ap kai phub. Djinenn tumer kowa gar? Tumer te krenn o tchatchepen win pral kol tsele menshende ap kai phub, hoske nai rakrenn tumer kanna gar o tchatchepen win pral kol phralende, kai i tikno djungelo koowa kran?

³Djinenn tumer gar, te well ko tsiro, kai rakrah mer o tchatchepen win pral i bolepangre? Te hi kowa jaake, palle nai rakrah ninna o tchatchepen win pral i phralende, kai tchingrenn pen pral i tikno phubjakro koowa.

⁴Hoske anenn tumer ko tikno koowa glan kol tchatchepangre, kai hi tchi penepaske pral i patslende, un kamenn kolendar tumaro tchatchepen?

⁵Kowa, hoi tumer kran, hi i bari ladj. Hi kek gosewo mursh mank tumende, koon nai penella, kones tchatcho hi?

⁶Tumer han phrala. Un tumer tchingrenn tumen glan kol tchatchepangre, kai gar patslo hi!

⁷Tumaro tchingepen hi i tchilatcho koowa an peste. Hoske rikrenn tumer gar win, hoi kol wawar tumentsa krenna? Hi feteder te nashrenn tumaro koowa, har te djan glan i tchatchepangre.

⁸Un kowa hi gar lauter! Tumer krenn i wawarenge ninna tchilatchepen un lenn tumenge lendar kowa krik, hoi len hi. Un kowa krenn tumer ninna i patslentsa.

⁹Tumer hunte djinenn, kolla, kai tchilatcho koowa krenna, wenn gar pash o Debleste an o bolepen, un lenn gar ko latcho koowa, hoi o Debles peskre tchawenge hi. Ma chochenn tumen kokres! Kolla, kai wi-ladjedo koowa krenna, wenn gar pash o Debleste an o bolepen, witar gar kolla, kai mangenn wawar koowa an har o Debles, witar gar kol mursha, kai chochenn pengri romjat i wawar djuwjah, witar gar kol djuwja, kai chochenn pengro romes i wawar mursheha, witar gar kol mursha, kai krenn wi-ladjedo koowa wawar murshentsa un tchawentsa,

¹⁰witar gar i tchorepangre, witar gar kolla, kai ap i lowe pandlo hi, i dre-phagepangre, i pipangre un kolla, kai praassenn i wawaren, — kolla lauter wenna gar pash o Debleste an o bolepen.

¹¹Hi menshe mank tumende, kai kran sawo koowa. Kanna was tumari doosh tele thodo. Un tumer wan erligo kerdo glan o Debleste, un han tchatcho glan leskre jaka. Kowa lauter kras maro rai, o Jesus Kristo, un o Debleskro Ducho tumenge.

¹²Tumer penenn: “Mer nai krah halauter.” Me penau: Gar lauter, hoi tumer krenna, hi tumenge mishto. Ninna te nai krau lauter, hunte wap me gar pandlo ap kowa, hoi krau.

¹³O chapen hi koi, te djal lo an o per. Un o per hi o chapaske koi. Well jek diwes, kai krell o Dewel, te hi o chapen un o per buder gar koi. O Dewel kras men gar, te lubras mer trujel. Mer ham koi o Jesuseske, maro rajeske. Un job hi ninna o rai pral maro mass.

¹⁴Jaake har o Jesus meras, un o Dewel les djido kras, jaake krell leskri bari soor men ninna djido.

¹⁵Djinenn tumer gar, kai han jek o Jesus Kristeha? I mensho, kai hi jek o Jesus Kristeha, nai well gar khetne i lubjah. Kowa djal gar!

¹⁶Djinenn, te djal jek pash i lubni, wenn kol dui jek. O Debleskro lab penella: Kol dui wenna jek.

¹⁷Ko mensho, kai djal o Jesuseha, maro rajeha, koles hi jek ducho leha.

¹⁸Doleske penau tumenge: Ma lubrenn trujel! Te kreh tu sawo koowa, tchineh tu tuke kokres an o mass. Hako wawar tchilatchepen kreh tu ap i wawarende. Te lubreh trujel, kreh tu o tchilatchepen ap tute.

¹⁹Djinenn tumer gar, kai han tumer o kheer, kai o Debleskro Ducho djiwella? Kowa hi an tumende un well o Deblestar. Un tumer han leskre, un nai krenna buder gar, hoi kamenna.

²⁰O Dewel plaissras tumenge peskro tchaweskro rateha. Doleske sharenn les tumaro tselo djipah!