Read O Debleskro Drom - I Bibla an o Romano Rakepen 2021 2. Korintarja 12 Bible Online

2. Korintarja 12 - O Debleskro Drom - I Bibla an o Romano Rakepen 2021 bible

2. Korintarja 12

¹Tumer kamenn, te sharap man, ninna te molell kowa tchi. Jaake kamau te rakrap pral o bolepaskro koowa, hoi o Jesus Kristo i menshes mukell te dikell.

²Me prindjrau i menshes, kai djiwell o Jesus Kristeha. Kowa was glan deesh-te-star bersha an o triinto bolepen dren anlo. His lo tchatchepah koi pral? Me djinau les gar. Dikas lo kowa an i suni? Me djinau les gar. Kowa djinell o Dewel kokres.

³Me djinau, ko mensho was hadedo an o Debleskri shukar baar, un shunas sawe shukar laba, hoi nai penell kek mensho. His lo tchatchepah koi pral? Me djinau les gar. Dikas lo kowa an i suni? Me djinau les gar. O Dewel djinell kowa.

⁵Ko menshes sharau me. Me sharau man gar. Te sharau man, sharau kowa, hoi sikrella, kai hi man kek soor.

⁶Ninna te sharoms me man, rakroms kek dinelo koowa. Kowa, hoi penoms, wals o tchatchepen. Kamau gar, te rikrenn i menshe budeder mandar har kowa, hoi dikenn le un shunenn le mandar. Doleske sharau me man gar.

⁷O Dewel kamella, te wap gar pre-phurdo pral ko baro bolepaskro koowa, hoi mukas lo man te dikell. Doleske mukas o Dewel tchomone ap mande te well, hoi dukrell man har i subjengro kasht an miro mass. Kowa hi har te dals man i bengeskro kurepaskro dawa, te wap gar pre-phurdo.

⁸Triin kope mangom me o Jesusestar, maro rajestar, te well kowa mandar krik lino.

⁹Un job penas ap mande: “Muk tuke miro latchepen doha te well! Miri soor hi bari an kolende, kai gar sorelo hi.” Un me, o Paulo, penau tumenge: Doleske kamau man me te sharell, kai hi man kek soor. Jaake nai dikell hakeno, o Jesus Kristo peskri sorjah hi pash mande.

¹⁰Doleske hom gar bibachtelo, te hi man kek soor, te lau dawa, te well pharo koowa ap mande, te lenn jon man palla, te well i traash ap mande. Kowa lau o Jesus Kristeske ap mande. Me djinau, te hi man kek soor, palle dell man o Jesus Kristo soor.

¹¹Tumer kran, te rakrom har i dinelo. Me hunte sharoms man gar. Na-a, tumer hunte sharans man. Ninna te woms me tchi, woms me jaake bud moldo har kol bare rakepangre pash tumende, kai penenn, te hi le bitchedo o Jesus Kristestar.

¹²Har homs pash tumende, nai dikan tumer, kai o Jesus Kristo bitchras man. Me budrom mank tumende, un dom gar pre. Me krom baro koowa an o Debleskri soor, jaake te kran i menshe bare jaka.

¹³Me krom tumenge jaake bud, har krom ninna i wawar patslenge, kai an wawar forja khetne wenna. Jek koowa hi wawartchandes: Tumendar lom kek lowe. Te his kowa i doosh, mangau tumendar, bistrenn koi doosh!

¹⁴Me wau kanna o triinto kopo pash tumende. Ninna kau kopo kamau tchi tumendar te lell. Me kamau tumen un gar tumare lowe. O dad un i dai denn pengre tchawen te chal, un gar i tchawe pengro dades un pengri dat.

¹⁵Tumenge doms me lauter, hoi man hi, ninna miro djipen. Miro dji hi baro tumenge. Hi tumen doleske kek kamlepen mange?

¹⁶Tumer djinenna, me djiwom gar dran tumari possita. Kanna penenn mange: Taprom tumen un chochrom tumen? Na-a!

¹⁷Kolla, kai pash tumende bitchrom, tchoran kolla tumare lowe? Na-a!

¹⁸Me mangom o Tites, te djal lo pash tumende, un bitchrom i wawar phrales leha. Nai penenn tumer, kai o Tito tumendar tchomone tchoras? Na-a! O Tites hi o emligo baro dji tumenge har man. Mer dui djah ninna ko emligo drom.

¹⁹Patsenn tumer, te rodah mer maro tchatchepen glan tumende? Kowa hi gar jaake. Mer djiwah o Jesus Kristeha un djinah, o Dewel shunell, hoi mer rakrah. Mire phrala un phenja, mer rakrah jaake, te well tumaro patsepen soreles.

²⁰Me trashau, te wau pash tumende, dikau sawo koowa pash tumende, hoi kamau gar. Palle hom me witar gar jaake har tumer kamenna. Me trashau te dikau tchingepen mank tumende, ninna silwepen, choli, praassepen, djungelo rakepen pral o wawareste, pre-phurdepen, bipandlo djipen, un jek kamell feteder te well har ko wawar.

²¹Me trashau te ladjap man tumenge glan o Debleste ap ko diwes, kai wau pale pash tumende, un te well mange ropaske pral budende, kai kamenn pengro phuro djipen gar pre te dell, un djiwenn an djungelo un wi-ladjedo koowa un lubrenn pen trujel jaake har kran le an ko tsiro, har jon gomme gar patslo his.