Read O Debleskro Drom - I Bibla an o Romano Rakepen 2021 2. Korintarja 3 Bible Online

2. Korintarja 3 - O Debleskro Drom - I Bibla an o Romano Rakepen 2021 bible

2. Korintarja 3

¹Tumer penans nai: Kanna sharenn le pen pale glan mende. Kowa krah mer gar. Witar gar hunte anas mer tumenge lila, kai dren tardo hi, har mishto mari budi hi. Wawar menshe krenn kowa, mer hunte kras kowa gar. Witar gar kamah tumendar, te tchinenn tumer menge sawe lila.

²Tumer han o feteder liil menge, tchinlo an mare djia. Ap tumende nai dikenn i tsele menshe, har kram mer mari budi.

³Dran mari budi wan tumer pash o Jesus Kristeste. Un kanna han har i liil, hoi wella o Jesus Kristestar. Kau liil tchinas o Ducho o djido Deblestar, un kek mensho. Kau liil was gar tchinlo ap i barra. Na-a. Kau liil was tchinlo an i menshengre djia, an tumare djia.

⁴Mer patsah soreles, te krell o Dewel sawo liil dran tumende. Kau patsepen das men o Jesus Kristo.

⁵Dran mari soor nai krams mer mari budi gar mishto. Kai budi krah mer dran o Debleskri soor. Un kowa, hoi haiwah, well o Deblestar.

⁶Job kras dran mende peskre budepangre, te sikras mer i menshende o newo drom, kai o Dewel un i menshe mala wenna. Ap o phuro drom hunte rikrenn le pen ap i tchinle laba. Kol phure tchinle laba anenn i menshen an o merepen. Ap o newo drom lenn le o Debleskro Ducho, hoi dell len o djipen.

⁷Kol phure tchinle laba, hoi anenn i menshen an o merepen, his tchinlo ap i barra. Har anas o Mose i menshenge kol barra, was leskro mui jaake railes, te dikan nai i Israelitarja gar ap leste. Jaake dikah, ninna ap o phuro drom was o Debleskro railepen diklo, ninna te djas ko railepen pal i tikno tsiro krik.

⁸Kitse shukeder hi o newo drom, kai lenn le o Debleskro Ducho!

⁹Kau newo drom, kai wenn i menshe tchatcho glan o Debleste, hi bud bud shukeder har ko phuro drom, kai djan i menshe nashedo, ninna te was kote i tikno kotar railepen diklo.

¹⁰Tchatchepah, o railepen ap o newo drom hi bud bud bareder har ko railepen ap o phuro drom.

¹¹Kowa djas krik pal i tikno tsiro. Har bud raileder hi kowa, hoi atchella!

¹²Mer djinah soreles, te hi kowa jaake. Doleske hi men kek traash, te penas kowa jaake i menshenge.

¹³Mer krah kowa gar har o Mose: Kowa tchiwas i diklo glan peskro mui, te dikenn kol Israelitarja gar, har leskro railepen krik djas.

¹⁴Kolengre djia wan har bar. Ninna kau diwes haiwenn i bibolde gar, hoi an o Moseskre lila tchinlo hi pral o phuro drom, te shunenn le kol laba an i biboldengre kangria. Kowa hi jaake, har te well i diklo ap lengre jaka tchiddo, te dikenn le gar. O Jesus Kristo kokres nai lell ko diklo lengre jakendar tele.

¹⁵Ninna kau diwes hi kowa jaake. Te shunenn le o Moseskre laba, hi ko diklo ap lengre djia, te haiwenn le len gar.

¹⁶Ap ko diwes, kai mukenn i Israelitarja pengro drom un djan ap o Jesuseskro drom, lell job ko diklo lendar krik.

¹⁷Maro rai Jesus un o Debleskro Ducho hi jek. Te djiwell o Debleskro Ducho an jekeste, hi ko mensho buder gar pandlo, un hunte djal buder gar ap o phuro drom.

¹⁸Mer lauter, kai patslo ham, dikah o Debleskro railepen jaake mishto, har te dikah an i dikepaskri[2]. Kek diklo hi ap mare jaka tchiddo. Un har mer dikah ap leste, wah mer bud un budeder jaake, har job hi. Kowa krell o Debleskro Ducho an mende.