Read O Debleskro Drom - I Bibla an o Romano Rakepen 2021 2. Korintarja 5 Bible Online

2. Korintarja 5 - O Debleskro Drom - I Bibla an o Romano Rakepen 2021 bible

2. Korintarja 5

¹Mer djinah, maro djipen ap kai phub atchell gar. Pal maro merepen lah i newo trupo[5]. Ko newo trupo hi har i kheer, hoi kras o Dewel un kek mensho. Ko kheer atchell hako tsiro an o bolepen.

²Kate ap kai phub hi menge ropaske, un mer kamah o tselo djijestar, te las ko newo bolepaskro trupo ap mende.

³Kowa hi jaake, har te wals i ripen ap mende. Te lah ko newo trupo gar ap mende, palle wams mer nango koi tardo.

⁴Jaake rah, har djiwah ap kai phub, hi menge ropaske un men hi duka. Mer kamah ko phuro trupo gar tele te tchiwell[6], kamah budeder ko newo trupo an-riwell, hoi buder gar merella.

⁵O Dewel das men gole, te las ko newo djipen an o bolepen, un job das men peskro Ducho, te djinas, kowa well jaake.

⁶Doleske atchell maro dji sorelo. Mer djinah: Jaake rah, har djiwah ap i phub, ham gar khere pash maro rajeste, o Jesuseste.

⁷Mer djiwah dran o patsepen, un djiwah gomme gar an ko tsiro, kai dikah les.

⁸Tchatchepah, maro dji hi sorelo, un mer kamams, te mukas i phub, te was khere pash o Debleste.

⁹Doleske kamah lauter te krell, te well job bachtelo pral mende kate ap kai phub, un ninna kote pash leste.

¹⁰Ap ko diwes, kai rakrell o Jesus Kristo o tchatchepen pral mende win, hunte was mer halauter glan leste tardo. Un hakeno lell pal kowa, hoi job kras, har djiwas lo ap i phub: latcho koowa har tchilatcho koowa.

¹¹Mer djinah, har trashas maro rajestar. Doleske rakrah i menshenge an o dji, te patsenn le ap leste. O Dewel djinell, te djah mer o tchatcho drom. Kamoms, te djinenn an tumare djia kowa ninna.

¹²Kowa penah gar, te sharas mer men pash tumende. Na-a, kowa penah, te nai sharenn tumen mentsa. Jaake djinenn tumer, hoi te penenn nai kol menshenge, kai dikenn ap kowa, hoi pash i menshende bud moldo hi. I djudjo dji hi lenge tchi moldo.

¹³Te penell jek, mer ham narwelo, — mishto! Te ham narwelo, ham kowa o Debleske. Te ham gar narwelo un rakrah jaake, te haiwenn le men, palle hi kowa mishto tumenge.

¹⁴O baro kamlepen, hoi o Jesus Kristo men das, bitchrell men pash i menshende. Un mer djinah, te meras jek menge, hi kowa jaake, har te merans le lauter.

¹⁵O Jesus meras halauterenge. Un kanna hunte djiwenn kolla, kai lan leskro djipen, buder gar penge kokres. Na-a, jon hunte djiwenn koleske, kai meras lenge, un was o Deblestar djido kerdo.

¹⁶Doleske dikah kanna buder gar jaake ap i mensheste har an o tsiro, har hams gomme gar patslo. Ninna prindjrah mer o Jesus Kristes kanna wawartchandes har an ko tsiro, har djiwas lo ap i phub.

¹⁷Kanna djinah: Koon o Jesus Kristeha djiwella, kowa hi i newo mensho, un djiwell buder gar peskro phuro djipen. I newo koowa was an leskro djipen.

¹⁸Kowa lauter well o Deblestar. Job bitchras o Jesus Kristes menge an o merepen, te lell lo kowa krik, hoi his tardo mank mende un o Debleste, te nai was mer kanna pash leste. Un mende das lo koi budi, te penas i menshenge, te nai wenn le pash leste.

¹⁹O Dewel his an peskro tchaweste, o Jesus Kristeste, un kras, te nai wenn i menshe leha khetne. Lengri doosh las lo lendar krik. Jaake was kowa krik lino, hoi his mank lende un o Debleste tardo. Mende das lo kai budi, te penas kal latche laba i menshenge.

²⁰Jaake ham mer o Debleskre bitchepangre. Men hi o Jesus Kristeskro tchatcho wast. Doleske mangah i menshendar, te wenn le pash leste. Un kowa hi jaake, har te dell len o Jesus Kristo gole: “Awenn pash o Debleste! Awenn leskre mala!”

²¹O Dewel tchiwas mari tseli doosh ap maro rajeste, o Jesus Kristeste, kai job kek tchilatchepen kras, te was mer tchatcho un erligo glan o Debleskre jaka.