Read O Debleskro Drom - I Bibla an o Romano Rakepen 2021 2. Korintarja 6 Bible Online

2. Korintarja 6 - O Debleskro Drom - I Bibla an o Romano Rakepen 2021 bible

2. Korintarja 6

¹Mer ham o Debleskre budepangre. Doleske penah tumenge: Ma witsrenn gar o Debleskro latchepen an i tchik!

²O Dewel penell an peskro lab: “Ap o tchatcho tsiro shunau tut, ap ko diwes lau tut dran o tchilatchepen win un dau tut o newo djipen.” Shunenn, kanna hi o tchatcho tsiro kai! Kanna lell lo tumen dran o tchilatchepen win!

³Kowa hi ap miro dji, te djiwas jaake, te hatsell kek i doosh ap mende, te rakrell nai kek djungeles pral mari budi.

⁴Mer kamah, te dikenn le hako tsiro ap mende, kai ham o Debleskre budepangre. Doleske dah gar pre, ninna te well bud pharo koowa ap mende. Ninna te hi men gar doha djipaske, te well i daar ap mende, rikrah win.

⁵Ninna te denn le men dawa, te witsrenn le men an o stilepen, te lenn le men palla, dah mer gar pre. Mer marah men tele, un della diwessa, kai sowah gar un chah gar.

⁶Maro djipen sikrella, te ham o Debleskre budepangre. Mer djiwah i djudjo djipen un djinah, hoi o Dewel kamella. Mer wah gar khino an mare djia, ham kamlo, un krah, hoi o Debleskro Ducho menge penella. Un an maro kamlepen hi kek chochepen.

⁷Mer penah i menshenge o Debleskro tchatchepen un rakrah dran leskri soor. Kowa, hoi krah un rakrah, hi tchatcho. Jaake hi maro djipen un maro rakepen har i charo, koleha i kurepaskro kurell pes peskro rajeske.

⁸Hi menshe koi, kai sharenn men, un wawar, kai praassenn men. Hi menshe, kai rakrenn djungeles pral mende, un wawar, kai rakrenn kamles pral mende. Ko jek penell: “Chochene!” ap mende, kol wawar djinenn, mer penah o tchatchepen.

⁹Pash jekeste ham prindjedo, pash i wawarende ham gar prindjedo. Ninna te hi o merepen glan mare jaka, ham gomme djido. Mer lam dawa un meram gar.

¹⁰Menge hi ropaske, un mer nai sanah. Mer ham tchorwelo, un krah i wawaren brawelo. Men hi tchi ap kai phub, un lauter hi menge.

¹¹Mire phrala an o foro Korint, mer penam tumenge lauter jaake, har kowa hi. Mer kram mare djia dur pre tumenge.

¹²Maro kamlepen tumenge hi gar tikno. Tumaro kamlepen menge was tikno.

¹³Me rakrau tumentsa har i dad peskre tchawentsa. Krenn tumer ninna tumare djia menge pre!

¹⁴Ma tchiwenn tumen khetne kolentsa, kai patsenn gar ap o Jesus Kristeste. Kolla, kai djiwenn an o tchatchepen un kolla, kai djiwenn gar an o tchatchepen, nai djiwenn gar khetne. O diwes un i rati nai wenn gar khetne. Jaake nai well o latchepen un o tchilatchepen witar gar khetne.

¹⁵Hoi hi o Jesus Kristes i bengeha khetne? Tchi! Nai wenn i patslen jek dji un jek djipen kolentsa, kai patsenn gar? Na-a!

¹⁶An o Debleskro baro kheer well o djido Dewel kokres sharedo un kek wawar koowa. Mer halauter ham o djido Debleskro baro kheer. O Dewel penas: Me kamau te djiwap pash lende un mashkral lende. Me kamau lengro Dewel te well, un jon hi mire menshe.[7]

¹⁷Doleske penell o Dewel: Djan kolendar krik, kai sharenn wawar koowa! Ma awenn lentsa khetne! Lenn tchi an tumare wasta, hoi hi pale-tchiddo glan mire jaka! Palle lau tumen kamles pash mande pre.

¹⁸Un me kamau tumaro dad te well, un tumer han mire tchawe un mire tcha.[8] Kowa penell o baro Dewel, kai hi o rai pral o bolepen un i phub.